روميو عويس: وانتهى المشوار

.. وانتهى المشوار، آخر كتاب الكتروني للشاعر المرحوم روميو عويس بعد كتبه الثلاثة المطبوعة على الورق: كاس نبيد وعناقيد شعر ووين الخطيّه؟..  وبذلك نكون قد نشرنا جميع قصائده، كي لا تضيع في الغربة.

**

 لا تروح

زقَّمتَك كوازي وعناقيدي    

حسَّبت صفّى قَلبَك بإيدي

بحَق الوفا لا تسيبني وتروح   

وتنسى غرامي ونَشوِة نبيدي

عشقتني وعلَّقت فيك الرّوح   

غيابك عذابي وطَلّتَك عيدي

ان كنت ناوي عَ الهجر لا تبوح    

قتلني قبل ماتروح يا سيدي

ولا عيش ع دموعي وتنهيدي

**

اربعه وخمسين

صارت بعمر الأربعه وخمسين     

ومبيّنه بَعدا بنت عشرين!..

نقلاتها العينَين بتلَهّي..     

وبعدُن عيونا بلا كحل حلوين

وشفافها بالورد مدهونين    

وبعدُن نهودا مَلعَب شياطين

وتفّاحها المستور.. بيشَهّي

**

ممنون

عيروني بالوفا.. شو كبار    

ممنون.. بعيوني الوفا قنطار

حكّام.. طَلَّعهُن حدا من القَعر    

تَ يشطبو اسمي من الشعّار

مينهُن؟ تَ يحكمو بالشعر؟    

البَعدُن بمدرسة الشعر قصّار

ال شِعرُن بلا لمعة وَحي ولا سِعر    

متلُن تعَدّى عَ القصيده كتار

" لو زينو عنق الحمار بتبر    

وشَكَّلو جلالو بدهَب وبغار

حصان ما بيطلَع بيضَلّو حمار"

**

علوّاه

علوّاه يا مريولها الازرق      

ترجع عَ درب المدرسه تمرَق

ومَطرَح اللي كون ناطرها    

يوقَعو.. صدفه دفاترها

ونظراتنا.. بنظراتنا تغرَق    

والهوا من لهتنا يعْرَق !..

علوّاه.. يوم الحد.. يوم العيد    

عَ درب لكنيسه بلا مواعيد

لابسه الفستان لمْعَرَّق..     

الورد زَهَّر.. والشجر وَرَّق

بنَقلِه.. بتشبه مَشية النسّاك     

ماشي على درب الكنيسه ملاك

وخَلفو انا.. عطشان.. اتْسَرَّق     

وابلَع بريقي.. واتحَرَّق

وين ضاعِت فيك يا لبنان؟     

ما اوسَعَك.. يا اصغر البلدان

بالبال مَسكَنها بلا عنوان!..     

البعد بيني وبَينها فَرَّق

وما غبت يا مريولها الازرق

**

- ستي - "ام الخوري"

بعد عودتي من لبنان كتبت قصيدة بعنوان - السنيورة - عنيت بها جدتي لوالدتي ويبدو ان الاموات ايضا يغارون ، فباحدى ليالي الاسبوع الماضي تراءت لي جدتي لوالدي في الحلم ما اعتبرته ملامة فكتبت عنها القصيدة التالية.

حضَّرِت قبل الاوان حرامها     

يخفف بغمرات الدفا اوهامها

وكنزه سميكه كانت تحبّا كتير     

يعشعشو صابيعها بكمامها..

ما يوم شفتا لا بجوخ ولا بحرير     

الكنزه وقميصة نومها هندامها

بعدا ببالي مكَمكَره بهاك السرير     

عم تلعن فصول الشتي وإجرامها

وتَحتا جلد خاروف بالصوف الوفير     

يآنسا.. ويعطي الدفا لقدامها

ومَنقَل "طَفي" ما ينطفي فوق الحصير    

 لمْبَسَّطا بلزق التخت قدّامها

ولم قصد نسعل حد فَرشتها تصير     

تكرفت حكي ويقسا علينا كلامها

شو الفَرق عمرا طال؟ او عمرا قصير؟    

 البيكون تَختا والدفا احلامها

وعايشه بالخَوف من ذكر المصير     

ولآخره وعَدل السما واحكامها؟

حراما كَفَنها.. وقَبرها تَختا الزّغير     

العاشِت بِ مَسكَن من وَهم ايامها

رغم الوقايه ورغم سرسابا الكبير     

ما قدر رَد الموت عنها حرامها

**

صورة على الجوّال

اهتدت الى رقم هاتفي بعد اعوام فأتصلت وأشرقت صورتها على شاشة هاتفي

من بعد غيبه والعمر ماشي     

الزَّمَن عَمَّر.. والمسافه مْجال

طَلِّت الصوره.. متل شي فراشه     

وعِّت الذكرى.. بحنايا البال

وتسأل عواطف قَلب.. جيّاشه:      

كيفك بَعد ها العمر؟ كيف الحال؟

وبَوِّس.. وشِمّ.. واغمُر الشاشه      

وما تشبَع عيوني من الجوّال

**

لعيونك

لخصرك العم يحلم بضمّي     

لشهقة طفل عطشان خَلف ستار

لا تطلبي شعر!.. ولا تهتَمّي     

بيوعى الحنين بريشة الختيار

وبتْحَرّكي تحت الرماد النار     

وكل الحكي بيطلَع لكي اشعار

**

هوى تشرين

مَهلَك عليي يا هوى تشرين

صار الهوا ان نَسَّم يمرجحني

العمر شَقَّع عَ كتافي سنين

الضهر محني والعصَب محني

هرّو وراق الخضر بالطربين

وتلج الجرد بالشَّيب لَوَّحني

وعَ السَّن بريِت شفرة السكين

مستور خلّيني!.. لا تفضحني

وبعدك ببالي يا هوى الحلوين

والورد ما بشمّو.. بيجرحني

تاري الهوى ما لو دوا وتخمين

للعين جوع.. وللقلب محني

**

وين غايبه؟

وين غايبه مدّه ما بِيَّنتي؟

الليل متلي بنَغمتِك موعود

الليل ما بيحلا بلا انتي

ومرّه بدونك دَمعة العنقود

**

دفتر مواعيد

يا دفتري شو حامل مواعيد

ما ضَل سطر بْياض بوراقي

مَرّ العمر حب وسهر ونبيد

ولا القلب عم يهدا ولا اشواقي

**

صابون القلوب

 برقبتي.. لو صار في كومة ذنوب

زَعَّلوكي.. وبسببها مكهربي

يخْتي العَتَب بالحب صابون القلوب

فاتشيني بالذنوب وعاتبي

لا تتركي ع البعد محبوبك يدوب

ويدفَع جزا.. بلا محكمه ولا محاسبي

**

العين خطّافه 

وقفِت .. وبيني وبينها مسافه

ببلوز؟ متل الفل.. شفّافه!..

والبرد؟ آخد مَجد بكوانين

قاسي.. كأنّو شَفرِة السكّين

تاريه متلي.. رقيق ع الحلوين

بيلمُس جَسَدهُن قسوتو بتلين

بيصير مذوِق ناعم ودافي

ورَغم المسافه؟ العَين خطّافه

فكِّر شفافي نار!.. لهبانين..

لحقو عيوني لعندها تخمين

وصارو ع جسما متل لمجانين

يتنَقّلو..وقلبي مع شفافي:

يا ريت.. لو بتطير لمسافه

**

صوتها المبحوح

شو بحب نغماتِك المبحوحه

ال زادت انوثه ع الجمال كتير

وشفافك ال بالورد ممسوحه

ولَهتِك الدافي.. وعنقِك الشرّير

ونهود تحت السّتر ملموحه

فْتَحلها بواب القفص.. بتطير

وتفصيلتو؟.. للعَين مَفضوحه

الواعي على شَمّ الهوى بَكّير

صارت عيوني بْشَوق مَفتوحه

بين العنق والصَّدر مرجوحه

توصَل على الورده المجروحه

وطالِع ونازِل تعمل مشاوير

**

وطن مَغدور

يا موطني المغدور عم ابكيك

من بَعد ما كان الفرح دارك

صار الرعب مزروع بلياليك

وصار القلق منشور بنهارك

كنا العرس بالمنطقه نْسَمّيك

ويتوافدو ع العرس زوّارك

مناخ وحلا رب السما عاطيك

وعَ نعمتك محسود من جارك

صرت انتا والتعاسه شريك

ورقة النعوة صارت خبارك

الامراض جَوَّك والفقر ناهيك

اكلو العنب والحصرم كبارك

نَهبو الخزينه ما بقي "مَتليك"

وطلعِت الفلّه بلحية زغارك

كان مفخرة الامم ماضيك..

المجد؟ يبقى مسكنو ديارك

من تربتك.. من نِعَم قَدّيسيك

تقصد حماك الناس تتبارك

كنت احلم عود عَ روابيك..

انشق نسيمك بوِّس حجارك

صرت لولا حلمت حالي فيك

اْتوَسوَس.. وبالحلم اتدارك

علوّاه.. لولا برجَع بلاقيك

ارض الكرامه عاليه سْوارك

شَعبَك موحَّد بالدما يفديك

والجيش وحدو يصونك ويحميك

وما يكون غير الجيش زنّارك

**

دموع الام

منذ ايام ادخلت مستشفى " وستميد" لاجراء عملية جراحية وبينما كنت في الطوارئ اوصل الاسعاف سيدة بغيبوبة شبه تامة ومعها زوجها الذي يمسك ذراع احد اطفاله ويحتضن الرضيع الذي كان يبكي باستمرار وعينه على والدته

وَصَّلا الاسعاف مشفى "وستميد"

وزوجا وعَ َديه تنين من اطفالها

طفل؟ تحت العام عمرو شي أكيد

صْراخو ما يهدا ولا عيونو شالها

عن ميمتو لعندا وَجَع قاسي عنيد

براسا.. إخد كل الوعي من حالها

وصراخ ابنا يزيد والهاجس يزيد

خَوفا عَ حالتها.. وقَلَق عَ عيْالها

ما عْتاد ابنا يكون عن حضنا بعيد

وشو فَهَّمو لشو مْغَيَّره احوالها !..

بالغصب تفتح عَينها وتطلق نَهيد

ودموع حَمرا ع خدودا يكرجو

" بَـكِّت معا كل اللي كانو قبالها "

قدَّيش يَمّي مْنَزّلي دموعك نبيد؟

عَ غيبتي.. وظلم الدني واهوالها

لبعيد رِحتي قَبل ما رِدّ الرَّصيد

وأيّا رصيد بسعر دمعات الحنان

دمعات اغلا من الدني واموالها

**

كل شي تغير

لا عاد في سمامن على الزيتون

ولا عجقة عصافير بالتينه

ولا بالجرد تَكتَك حجل كانون

ولا بالوِدى لْشَحرور تلحينه

ولا ضَل في بلبل ولا حَسّون

تْصَيَّدهًن الانسان عَ الهينه

ولا الصيف كَيف ولا الامن مَضمون

والعيد لا هَيصه ولا زِينه

والعرس صاير بالفرح مَدهون

كان الطبل ع الرقص يدعيني

الجو اسود والوضع مشحون

والشعب ؟ حرّيتو رهينه

محَشَّش ومتل الوطَن مَديون

وأهل السياسه ؟ الف تلوينه

شَيخ الحرامي.. وشاطِر البيخون

وصلّاح ؟ في بالالف دزّينه

الاخلاق؟ بدعه والكرامه ؟ جْنون

الحرّه ؟ بعين الناس مسكينه !..

وشاطره العندا شي ألف زبون

ورجّالها.. معَمشَق بقَنّينه !..

من البكي ما عاد عندي عيون

هَمّ الوطَن بالقلب كاويني

لا تفَتَح جروحات عَ المحزون

دَخلَك.. بحلم الامس خَلّيني !..

لا تقول عَ لبنان لاقيني

**

بيكاتنا

" قصّة واقعية"

من كتر ما ظلمو بايام الصِّبا

وفضحو بنات وعَربَدو ببيت الفقير

وعاشو عَ ضهر الناس من مال الربى

ومن رزق مانّو منشرى ويبقى وفير

عزّاب شاخو وعزُّن حصانو كبا

الظالم حياتو بتنتهي بذات المصير

الروح مرجَعها لعند الواهبا

كل بيك يرحل عندما يدق النفير

ضل بيك واخت بقيت بالخِبا

متل الصنم عند الصبح يوقف خفير

بـ منظر؟ الاطفال منو يرعبا

والمدرسه امتار عن بيتو الكبير

الناس تمرق ما تقلو مرحبا

ومات وبقت اختو وحيدة تستجير

وتستعطف الرب العلي ما يعذّبا

وتتكِل ع رحمة الباري القدير

وتحب مين يزورها ويصاحِبا

الاشباح حَولا وواقع الوحده مرير

"لما اللي قَلّ المال قَلّو قرايبا

والمال ياما جمّع قرايب كتير"

وزغار كنّا.. نزورها ونخاطبا

بالبيت يبقى بكل غرفه في سرير

عَ مخَدّتو "طربوش" ع الفرشه "عبا"

ملَقّحا بترتيب ع شرشف حرير

بنوبة بكي وتاريخ تندب صاحبا

"الخَي بعيون الاخت بيضَلّو امير"

ع دموعها عاشت.. الحزن يغالبا

والهَمّ ضَل مرافقا ليوما الاخير

ما التقى مين يبكيا.. ولا يندبا

"والبيت صَفّى لا صحاب ولا أجير"

**

ابو حنا

رحمه الله كان من اظرف المسنين في بلدتي رشعين وكان مشهور في كثرة السباب ويقال انه سب يوما داخل الكنيسة وهو في طريقه الى كرسي الاعتراف فكان لا يرى في السباب خطيئة لانها اسلوبه في المخاطبة

كان المسا وبظن يوم الحد

المسبحة بإيدو عم يصَلّي

مرَقت مسَّيتو ما كان يرد

تطلعت فيه.. وقفت.. سَبَّلّي

قلت: مسَّيتك .. لشو محْتَد

اكتر مسبّات وَصَّلّي!..

- بوقت الصلا يا...بوزك سد

كلمة مسا الخيرات لا تقلّي

" وبكم سبّه كبار كَمَّلّي "

يا ريت في متلك الف.. عن جَد

مَحْضَرَك مهضوم بيسَلّي

صادق نضيف وسمعتك من ورد

وقلبك بياضو كان متجَلّي

راحت معك ايام جيره وود

عن نفسها ونفسك عم نصَلّي

**

 ربيع لبنان

طَل الربيع وزَهَّر التفّاح

واللوز عَقَّد.."والعرقبانه"

فَتَّح ورَقها.. والنسيم رْتاح

عَ بساط فيّات السنديانه

الشمس عم بتطل كل صْباح

ترش الدفا عَ طيور بردانه

الشحرور عامل بالوِدى زيّاح

والوروره بالجَو سكرانه

وصيف الجبل موعود بالسوّاح

ولَّف السفره وكَتَّر قناني

حفلات فن مبرمجه وافراح

وسهرات فقش وطقش وغناني

ت تعيش يا سايح ليالي ملاح

وايام بالافراح عمرانه

لبنان مهما تعصف الارياح

عايش بقلبي وقلب وجداني

وبالهجر لولا كل عمري راح

ومهما بعدت رح ضل لبناني

**

الله البيدين الناس

بعد الهجوم الوحشي على مسجدين في " نيو زيلندا " ومقتل 50 من المصلين واصابة العشرات وبعد الهجمات البربرية على الكنائس في نيجيريا ومصر والفيليبين كتبت القصيدة التالية:

شـو دَخَّـلَـك بالناس مين بيعـبَـدو

تا تقَتِّل اللي عم يصَلّو ويسجدو؟

اديـان الله كـلّـهـا مْـحَـبّـه ووئـام

كلمن على دينو يـصَلّي بمعبـدو

اشتريو بارخص سعر كشاش الحمام

والمنشرى بيبقى بـإمـرة سـيّـدو

وودّوه يقترف الخطايا والحرام

وبسلاح اعـمى متل قلبو زَوّدو

في ناس انجيلُن منارة بالظلام

تبعو الكنيسه وبالمسيح تْعَمَّدو

وفي ناس بيدين النبي وجدو التمام

اسلمـو.. وبالـدِيـن الله وَحَّـدو

يا كافر الارهاب ما بيفرض نظام

بالعكس.. عن دينك الناس بيبعدو

مـن ايـمـتـى الكفّـار بـتكَفِّر انـام؟

واهل الجهاله بالشريعه بيشـهدو؟

بكل اديان السما ذات الكلام:

اللي بيقتَلو بدور العباده استشهدو

الله البيدين الناس يوم الآخـره

والحق من رقبة عبيدو بياخدو

**

كان يا ما كان 

بَكَّر.. عا كتفو معول ورفش ومشي

شقّ الصبح.. بعدا الطبيعه مْغَبّشه

وبالبيت عيله فراشها عِدل وحصير

من تَعَب كَفّو.. ومن جهادو عايشه

هَيك كان يعيش بالضيعه الفقير

بدَوله على الشعب الفقير مطَنّشه

لنوابها مال الخزينه.. وللوزيـر

ولزمرة محاسيب حَولو مْجَيّشه!..

المش كفايه ممكن معاشو الكبير

بيتاجر بدَم الشعب.. وبيرتشي!..

مْعمَّر قصور وعيشتو عيشة امير

بالدهب والالماس مرتو مكَنفشه

العطر من باريس.. فستانا حرير

بـتزمّ تمّا للحَكي.. وللوشوشه !..

وشنتانها ان ما كان لمصَمِّم شَهير

ان لبستو؟.. بتحس حالا مبقلشه !..

بتنام وبترتاح عا التخت الوسير

محَمّمه بعطر الورد.. ومرشرشه

الفرشه مُريحه.. مْخَدّتا اللي عالسرير

كبيره.. وبريش نعام قَلبا منحشي

والغطا من الاطلس الغالي كتير

قماشتو بأحلى الرسوم مزركشه

ومَرت الفقير ال طهرها فايح عبير

فساتين من سوق الخليع مْلَبّشه !..

بتعجن بنص الليل شي طلع الخمير

وقَبل الصبح بالخَبز تبقى مْبَلّشه

اطفالها بعزّ البرد لبسُن قَصير !..

ومْرَقّعه ستراتهُن.. ومْنَتوشه

اكلُن سليق وبيض زيتون وخَضير

وبتْضَل تا يسَرِّب البي مشَوّشه

تصَلّي وتدعي يحرسو الرب القدير

وبتخاف لولا بينعقص من برغشه

وبتضَل تحمد ربّها الحمد الوفير

وتطلب الستره راضيه بالدروشه

خلص النهار.. وفَكّ من شغلو الآجير

الشمس غابت والطبيعه.. دَغوَشه

ترافقو النسمه العا ضفاف الغدير

وتآنسـو بـلـفـحَـه عليله مُـنعـشه

مسَرَّب عا بيتو ينام مرتح الضمير

مسَرَّب متل ما راح عا شِغلو مَشي

**

بدّو صَبي

جارنا " مسعود " زهقان الحياة

ومرتو الفقيره من طباعو مْعَصّبه

من جديد حِبله.. وعندهُن اربع بنات

وزوجا مْنَكَّد عَيشها.. بدّو صَبي

وكل جاره عندها وَصفِة نبات

وبتقلّها: اغلي يا ليلى واشربي

ومسعود طَبعو حَدّ منزوع الصفات

بينقّ ما بيحكي ولا كلمه مْهَذَّبه

يا رب انت بإيدَك حبال النجاة

بْعَتلُن صَبي بِ جاه عيسى والنبي

بكرا بيشيل جْرَين بَيّو من الممات

وبلكي بيبطِّل بَهدلِة مرتو.. الغَبي

**

يوم الارض 

الارض النا.. رغم كل ال صار

من احتلال.. وغطرسه.. ودْمار

عَ ترابها بيستشهدو الابطال !..

بسلاح جيش الغَدر.. والكفّار !..

الجندي الجبان بيعتدي ع طفال

والجيش خايف.. والطفل ؟ جبّار

قطَعتو الدوا قطعتو الخبز والمال

لا الموت ضَعَّف عزمنا ولا حصار

اطفالنا بوجّ العدو رجال

بيواجهو سلاح القتل بحجار

الارض النا.. والزمن لو طال

الحق معنا .. الموت للغدّار

**

دين ووفا

شو قصّتك يا جارنا " مَعروف "

الدمعه بعينَك شو السبب قِلّي ؟

كنت عـنوان الفـَرح مَـعـروف

محسود ع البسمـه وع الـطَـلّـه

قَلّي الوضع يا صاحبي مَحروف

امـراض مَـرتي جـابت الـعـلّـه!..

المَدخول قَل.. وزايد المصروف

طْبابـه ودوا.. عِـمله ما بـيخَـلّـي

ما بزور حتى ما يجيني ضيوف

التقصير عندي.. اكـبَـر مذَلـّه!..

وابني اللي يبقى بالكَرَم مَوصوف

حـوالات مـنّـو كـان يـوصَـلّـي

مدّه إلي مكتوب مش عم شوف

ومش عارف الاسباب والـعـلّـه

انشالله ظروفو تكون احلى ظروف

ولا يكون صابو شَر!.. يا دِلّي

يا صاحبي سْترني انا مَكسوف

بسـتعـذِر مـن الـكـل يـا خِـلّـي

تا تـرجع الاحوال لـلمـأ لـوف

لـرَب الفرج والخَـير عم صَلّي

- يا جارنا يا صاحب المعروف

الـبـلكَـرَم والاخـلاق مـتْـجَـلّـي..

هَيدا القَمَر مرّات عندو خسوف

بيغيب نـورو.. بـتـرجَـع الهَـلّـه

حَدَّك انـا.. ولنجدتَـك مَـلـهـوف

مـنـتـقـاسَـم اللقمه.. مـع الـغَـلّـه

فَـضلك عـلـيي بـالـزمان الـوف

إيـدَيـك لـلـنَـجـدِه تـمـدلّـي !..

كنت ان دَبَحت لعيلتك خـاروف

من نَخب لَحمو حصّتي تشـلّي

شَرع الدني دَين ووفا يـا جـار

وكـلَّـك وَفـا لـو انـت بـمْـحَلّـي

**

عمرنا

متل الشجر نحنا بعالمنا

بيزرعونا وع العمر منروح

منزهر.. بتحْمَل مواسمنا

وعطرنا بعمر الصّبا بيفوح

والزَّمَن بيغَيِّر معالمنا !..

ولمّا منعْتَق والنهايه تلوح ؟

من عَيشنا قِدرَه بتحرمنا

وبتنتهي اجسادنا بلا روح

بابْشَع ما جينا ع الدني منروح

**

ديك 

واقف ع راس المزبله يا ديك

ومْـكَـنْـفـش وعايش بـأحلامك

مـعَـرّم ومـا في حـدا يـهَـدّيـك

ولا بـيـعـلا كلام.. ع كـلامَـك

بدي نصيحه بلا ثَـمَن اهـديـك

بَلكي النصح بيـشد ع لـْجـامك

ديـك انـت.. وفـي حَـدا آنـيـك

وتـاركـك تـزهـى بـأ وهـامـك

شعير وقمح كل يوم بيطعميك

بيقلق إذا مـا بـتكسر صيامَـك

متل الغَنَم تـا تنـصَح مـرَبّـيـك

وبيعـدّ ع الصابـيع ايـّامَـك !..

ومهما الدني عزّ ومجد تعطيك

الـنَـتـف بَـعـد الدبـح قـدّامـك !..

بلا ذَنب صادر حكم مبرم فيك

وحضرة القاضي الكان خدّامـك

ويـدلّـلَـك كـل يـوم.. ويـغَـذّيـك

صـادر ع إيـدو حـكـم اعدامـك

وناوي على مَنقَل جَمْر يشويـك

ويـعمل عزيمه تْليـق بـمْـقـامـك

وِن طلع قاسي لحمَـك.. بيغليك

وشوربـا بـيعـمل على عضامك

لا تـعـَـرِّم ولا تـكَـنفش بـوَصّيك

ع الارض خـلّـي مَوقع قْـدامـَك

**

مال الحرام

دشَّـرت الله وعـابـد العمـلِـه

ونسيت يا طاووس بَيَّك كان

طـفـران لا شَغله ولا عَـمْله

وبيت اهلك ملك للرهبان؟

وع بيتكُن لو مرقت النمله !..

بتطلع بسرعه بطنها جوعان

ما في ولا كسرة خبز للحَمله

ولا اللحم شامم ريحتو الدبّان

واليوم مين قَدَّك يا تسلملي!.

بمال الحرام معَرَّم الجزدان

وبيوت.. بالمفروش مكتمله

وصاير رصيدك بالبنك حرزان

لا ع الضمير ولا الشرف سئلان

وعـامِـل كبير.. الكبر للفدان

**

هوا محرور

مارق هَوا محرور.. من حَدّي

قلبي ارتعَش منّو وعِرِق خَدّي

بيكون لهتك بالهوا منقول !..

دخل عينك يا هوا ع طول

كل ما مْرَقت ولمَستني هَـدّي

**

يا روحي

عيشي بحضن الآه يا روحي

ما الآه صوت الآخ بجروحي

الجِرح ع بُعد الحلو عالسَّكت

هَـدّ عمري.. وحَطَّم طْموحي

**

حلم خدّاع 

باوّل شبابي؟ كنت اتمنّى

اعشَـق مَرا وبالحب اتهنّا

وكبرت بالعمر وصرت ختيار

وبعدني لليوم مستنّى !..

كتار النسا البتشوفهُن ازهار

الورد لون خدودهُن حَنّى

ومتل الملاك بيظهرو.. طهّار

وعَ قَد ما تحرص وتتأنّى

وتفتكر حالك ذَكي بالكار

بس تدعس اجرها بالدّار

ويمرق عليها فيه كم نهار

نظرتك فيها بتتـدَنّى !..

ما كان قلبك هيك يتمنّى

**

حكاية حب

في هَمدَرَه من الصبح عَ القرميد

الهيئه في قصة حب بـادي جديد

طَير اليمام بجارتو موَلَّع!

يهدلّها ويفتح جناحو.. تْحيد

طَبْع النّسا عَ طول تتدَلَّع!.

ولو قلبها زيادة عشق بيريد

اسلوب حبّا تضَلّ تتمَنَّع

و يلاحقا ونفس الحكايه يعيد

تا تقنَع .. ومعقول ما تقْنَع؟

بالحَركَشه.. لَهَّت عليها نبيد

استَمتعِت بالحُب.. واستمتَع

وقرميد جاري مَسرَح مواعيد

وكَم يَوم.. شفتا قشاش عم تجمَع

وما تطوِّل بمشوارها.. ترجَع

تحمل قشاش.. وتاخدُن لبعيد

والكون يعمَـر.. واليمام يزيد

**

جلجلة لبنان

دَخلَك صليبي كبير

وحافي انا عَ درب

كلّها مسامير !..

دقت مُر الحرب

القتل والتدمير

والخوف والتهجير

والجوع والتعتير

وجلّاد قاسي القلب

وظالم وشرّير 

حاكم بموتي صلب

وتركتني يا رب

وحدي ع نص الدرب

**

جهلة السبعين

جهلان قالو.. وحالتي تعتيـر

وبلبس عَ آخر طَرز هندامي

ولَطَّشو: دَقّ الخَرف بـَكّـيـر

ويراقبـو الهفوات بـكـلامـي

وحَلَّك بقى تهدا..سمعتا كتير

جِهلَك جنون ومَصدَر مْلامه

يعني انا بالعمر صرت كبير

وما عاد غير الموت قـدّامـي

وقالوا مكانك تندفن بسْرير

وقالوا تا حتى سمّك حرامي

وما اعتني باللبس والـتعطير

وما يكون شِعري للهوى علامه

يعني الغَزَل ممنوع بالتصوير

وممنوع يبقى الحب الهامي

بعمري البيفَكِّر بالمرا شرّير

للحُب عـنـدُن عـمر إلـزامي

واللي بيتخَطّى العمر بيصير

خاطي ما أهوَن جرم لحرامي

قلت:تركوني ع هوايي طير

كل ما نادتني لْجَوّها حْمامـه

بَعدا دبـوقي بتلقط عصافـيـر

وبعدو بمذاقي طَيَّب الشامـي

وبَعدي بلهفة طفل بعدو زغير

جوعان.. وقبالو الصّدر نامي

حلوة الدني عَ دربها رح سير

وسمّي الجمال بأروع أْسامي

ولا يهمّني حسّاد.. ونواطـيـر

باقي هوى الحلوين أحـلامـي

والحُب.. ريتو يقبر عضامي

**

اشتري ورده

الى عجوز نحيلة تبيع وردا لتؤمن لقمة عيشها 

اشتري ورده بحقا بسد جوعي

 جوعي العم بياكل من ضلوعي 

ورودي معطّره بريحة نهيدي 

 ورودي مفرفحه برشّة دموعي 

يا دوبو الدم ماشي بِ وريدي 

الفقر والهم مسكنهن ربوعي 

بيتي الدرب وورودي رصيدي 

وع آخر خيطها صارت شموعي 

يا ريت لخالقي بيقرب رجوعي

**

للنحات توفيق مراد

شو الفرق بين الـمتحف وبين مشغلـو

الفيه الخشب للعين اغلى من الدهب؟

بَـيـن التّـحَـف كيف ما العيون تـنقَّـلـو

ما فيك غير ما تقول: سبـحـان الـوهـب

فوق الـبشـر.. لـمّـا الـمـواهـب يـنـزلـو

ع زْمـيـل ما بيحكي البلاغه بـتنسكب

و بـيـضَـل ع جسم الخشب تَ يحوّلـو

آيـة حلى.. واجمل قصيـده يـنـكَـتـب

تــوفيق زيّن مشـــغلو.. مـا أجمــلو

بتـشوف الله.. بكل مَـنحـوتـة خَـشـب

**

صلّيلنا

الى روح البطريرك صفير

وقـت اللي تعبو الكل.. انت بقـيت

حملت الصليب بمفردك.. ومشيت

بوقت الغتالو ناس.. خفيو نـاس !!

ووقت اللي نفيو ناس..سجنو ناس

والوطن نـار ودم !! وتـوابـيـت !!

كتار هربـو من الخطر.. وبـقـيت

بـقيت وحدك.. ما تركت الكـاس..

وقلت اللي قلتو.. كـم كلمه حكـيت

والـناس ؟ تـنطر وعـظِـة الـقـدّاس

وقـبل ما رتاح الـوطن.. ما هـديت

ما تـركت حاجز ما تركت متراس

غير ما رجع كل الوطن ما غـفيت

عينيك خَـلّـي.. من السـمـا حـرّاس

وصلِّـيـلـنـا.. بـحـضرة اله الـكـون

بوقت المحن يللي الوطن ما نسيت

بـوجـدانّـا بـتـضَل.. مـهـما قـفـيـت

**

امي 

غيبها القدر في العام 1984

من زْمان امّي لَفّها تراب الردى

الما كان عندا بكل اياما عِدا

جبلة حنان.. العاطفه !. رسمالها

تبكي ان عرفت حلِّت مصيبه لحدا

الكانت عا قد الحال تكسي حالها

ياما من فساتينها تياب انهَدى

ومن معجَن اللي دَوب كافي عيالها

كَسرِة الخبز العايزينا تْشَحِّدا

ومن طبخة الما يكون عنّا بدالها

كلما مَرَق معتاز تسكبلو غدا

حملت معا كنوز السما نيّالها 

خصالك ما فيي بالقصايد عدّدا

صلّيلنا يمّي بحضور الآلهه

صَلّيلنا.. ما حَبّنا متلك حدا

**

عودة التمثال

لمناسبة عودة تمثال بطل لبنان يوسف بك كرم الى ساحة الكتلة في اهدن بعد ترميمه: 

رجع البطَل عا ساحتو.. فِرْح العرين 

نور القداسه.. بساحة الكتله هَطَل 

اهدن عرين المجد.. عا مَرَ السنين 

كل ما فيا بتولد مَرا.. بيولد بَطَل

**

كانون 

الريح العنيده تمنتع الشباك

وتشد بشلوح السرو

وبالفضا غيمات سود سماك

حرمو النجوم ينوّرو

وبابنا يقاوم هبوب الريح

اللي عم يجرِّب يدفرو

وكل ما يجن الرعد!!

امي تصيح: لاتفزعو .. 

صَلّو لالله وكَتّرو

وجدّي بعبايه قبال موقد نار

يفلفش مرايا دفاترو

ويحكي عن الماضي.. خبار.. خبار

حلوين مهما يكترو

يا ريت لو بقيو الولاد زغار

بالعيد كانو يشعرو

وعمر الطفوله طَوَّل المشوار

ولا صار منّا كل خَي بدار

ولا البلابل طَيَّرو

**

ذكرى

انتي وانا بشي ليل سكرانين

والحب.. عازمنا على سهره

المازه عسل وتنين جوعانين

وليل العَسَل بيطَيِّب الخمره..

و تنين مطفيين.. مشتاقين

تغمريني وتطوَل الغمره

وتستر العتمه العشقانين

ولبعد بُكرا ما يجي بُكرا

ونرقص ونرقص متل لمجانين

تطلَع الصرخه وتهمد العكره ! 

طَيِّب البطيخ ع السكين..

يقطر عَسَل من شفتو الحمره

"من زمان عايش بالحلم.. مسكين !..

ع غَيبتِك.. عم عيش.. ع الذّكرى"

**

تغيَّر الانسان

ليش هيك تغيَّر الانسان؟

الجيران يبقو بالمضى اخوان

لا بغض لا غيره لا شوفة حال

لا حقد لا شماته ولا طغيان

عيال تربى بحب.. احلا عيال

الجيران قَلبُن كان ع الجيران

ولا بينهُن في مْحَلّ للشيطان

ما كان عنّا كروم وبساتين..

لكن ما فينا ولا بطن جوعان

الجيران كانو كلُّن محبّين !..

منهم سلال الخوخ والرمان

والآكدينيا.. والعنب.. والتين 

وانواع خضره بيتنا مليان

ولا يوم جبناها من الدكان

واليوم يا خساره بوطنا الجار

صفّى لجارو يشتهي الحرمان

عيون الشماته والحسد من نار

ورجال عم تمشي ورا النسوان

وصارت الجاره من جارتها تغار

وبتحسدا ع العَقد.. ع الجزدان..

ع شعرها..عالاكل..عالمشوار

ع ولادها اللي أكتَرُن صبيان..

وبتطَلِّع عليها.. خبار.. خبار

وبتشلح عليها التهم الوان..

ومتل الولد رجّالها بيندار

ان ما اندار يا ستار.. يا رحمان

بتشبّعو نكد.. وحقد.. ونقار

وبتقلب النونه.. وع شهر زمان

بتحرمو من الطيِّب الغرار!..

تذكرت حكمه سمعتها من زمان

بهونيك جمله قالها ختيار:

" الفقر جامع والغنى فتّان "

فقرك غنى اخلاق يا لبنان

**

عيد الجيش 

 ما دام صامد زندك الاسمر 

ما منفزَع عْلى بلادنا 

بدم الشهاده الطاهر الاحمر 

فادي ارض أجدادنا 

زندك قوي غرور العدا دَمَّر 

وعاطي الامل لولادنا 

يحميك الله.. وعزّتَك تكبِر 

ويرجع ع إيديك الوطن يعمر

**

ايام

ايام !.. كنا نلتقي

وابقى شَقي..

ما اعمل حسابات

لعيون.. ولسانات..

وكنتي ؟ الغيارى تحَندقي..

وتحندقي الوردات

مطرَح الكنتي تمرَقي؟

ببرم على الطرقات

فَتِّش عليها شو بقي 

من طيفك خيالات

و من حبّنا حكايات

متل الحلم.. لبعيد

طارت ليالي العيد

باقي الذكر حَرقَه 

واشعار ع الورقه

يا هاك لمواعيد

لبتمرَقي مَرقه..

وبتمرَقي سرقه !..

الكاس بدّو نبيد..

ما اصعب الفرقه

**

الجوع ما بينام

مستوحاة من صورة طفلة فقيرة، حجبت وجهها بيدها وكأنها تقول: لا تصور:

لا تصوِّر !.. خايفه الدمعه

ال جمدت بعيني تزعج الظلاّم

لا تصوِّر !.. خايفه السمعه

تشوِّه بلاد النفط.. والاسلام

لا تصوِّر !.. لا العدل يوعى

ويوعى الضمير بفرشة الحكّام

الفقر ليل.. وما معي شمعه

والجوع ؟.. ليل نهار ما بينام !..

للطير أكلو.. وللغَنَم مَرعى

ونحنا انتركنا..لا غِزا ولا حرام

نشحد اللقمه بعتمة الايّـام

**

 تشرين

تشرين قَلّي : بواقعك إقنَع !..

خفِّف الجَّهله.. وعيش بالباقي

لا تنوح عَ عمر المضى وودَّع

صْفَرِّت وهَرِّت متلك وراقي

ووراق لبتصْفَرّ.. وبتوقَع ؟

بيحملا الريح.. بتاخدا سواقي

ولو بقيت على الغصن ما بتنفع

وجودا معي اتعس من فراقي 

وسنينك البتروح ما بترجَع !..

نساها.. بدل ما تضل تتوجَّع

وصَلّي وتوب.. بعمرك الباقي

رح قلِّد العقّال يا رفاقي

**

عيونها الخضرا

من عيونها الخضرا

ونفسها الخضره

يا مريم العدرا !..

سهام فيها تصيد

بتترك الشوق يزيد

ما عاد لي قدره

وعنها ما دامي بعيد ؟

بيبقى الحلم بالإيد

"طفل خلق جديد

جوعان.. عَ صدرا"

**

سنتين

الى صديق الكل وحبيبهم المحسن الكبير المرحوم ايلي حديد بمناسبة مرور عامين على وفاته

سنتين صارو.. بالجسد فلَّيت !..

لكن.. ما قدر الموت ياخد روح

بقيِت محل العشت.. او حلَّيت

بضيعتك.. بالمنطقه.. بالبيت

بقلب اللي لقمه بتمهُن حطَّيت

باقي عطر بخوّر.. ما بيروح

الذكر الحلو متل العطر بيفوح

سراج العطا ما بينضب من الزيت

**

قطعنا الامل 

الشمس لو شرقت ما كنا بعاد

عمر صرلو.. العمر ناطرها

بلاد التركتو صار غير بلاد

الكان الفجر.. باسم ينَوّرها

وشَمسا على الفلاح والصيّاد

وع سهول بركه وخير بيدرها

ع شطوط كانو اهلها روّاد

وحدود جَيشا كان..عسكَرها

هجَرنا.. وجَر سواد بعدو سواد

ليل من دون بدر.. غامرها !.

والعمر؟ صار بآخر الميعاد

وبَعدا بلادي بقبضة الجلاّد

ويوضاس قابض عملة الاسياد

والجلجلة !.. ما بان آخرها

**

 مختار 

إلى المرحوم عمي حليم عويس مختار بلدة رشعين الأسبق

وكتار.. بعد بيذكرو المختار

الما زَعَّل بعمرو حدا

وبيتو الوضيع مضاف للزوّار

ومفتوح بابو عالمدى

ولولا الغدا بيضه وزرّ خيار

يعزم العالم ع الغدا

وع سفرتو الكاسات يبقو كتار

حد القناني توجدا

وركوة القهوه تضَلّها ع النار

ومين عم يستفقدا

الناس عن صدقك بيروو خبار

وسيرتك بترددا

الناس المتل قلبك يا عمي كبار

عم يتركو اجمل صدى

**

وين اختفيتي؟

وين اختفيتي؟ ما بقي انسان

سألتو وعطاني جْواب وين صرتي

لا المغربي.. ولا اللي قري الفنجان

عطيو اشاره.. لوين سافرتي

وتساءلو عن لهفتي الجيران

وتمسخرو عليي وع آخرتي

يا تاركي قلبي بلا عنوان

القلب انتعب والبال حيرتي

وتَ ترجعي من غيبتك سهران

اكتب شعر والدمع محبرتي

**

لام العيون الخضر

قالت: اكتبلي شعر غنّيي

تخلّي البشر يتغزَّلو فيي

بمطلَبِك ما اصعب المشوار

ان قلبي سبَق بالوصف عينيي

قلبي ان حِكي؟ بيطلع كلامي نار

بتعاتبي.. وبتغضبي عليي !..

وبفزع الغنوه يرددوها كتار !..

واسمع دلَع روحي.. بدينيي

و بغار من وصف الحلا وبغار

غيري.. يشاركني الخصوصيي

عيونك الخضر ورمشُن البتّار

حَرمو عيوني النوم ليليي !..

وشفافك البينافسو الخمّار !..

بيحندقو شفافي السكريي !..

وصدرك المتل المارد الجبار

ونهود فوقا نجوم خمريي

وخصرك؟؟.. ما رح وَطّي عن الزنّار !..

لا لا .. ما فيي بتعجز الاشعار

تصَوِّر النار الوالعه فيي

**

نساني

قالت : نساني.. قلت : يا دِلّي

كيف بدّي احمل العلّه؟

اللي معوّدي روحو عَ عطر الزهر

كيف بدّو يعيش بالقلّه؟

واللي بيحسّ نهار بُعدِك دَهر

وبينطرك عَ جَمر تَ تطلّي

قدَّيش بدّو يطيق بعدك قَهر

وقدَّيش بدّو يصوم ويصَلّي؟

لا توسّعي بينك وبيني النهر

جسرالوصل بيناتنا خَلّي !..

فراقك بيشوّفني نجوم الضهر

لا تكفري بايامنا الحلوين

ضَلّي من عيون الوفا مَلّي

" كل عقده وفي لها حَلّه "

**

شربل وعصام

للشاعرين شربل بعيني وعصام ملكي

البدّو بعين الشمس يتطلّع     

رح ينئزي.. عيون الشّمس من نار

القادر ع عرش الشعر يتربّع      

بيصير إسمو "زينة الشّعار"

شربل.. برق قصدانك بيلمع     

ومشيت قبل الكل بالمشوار

ومن طلعتك متل النسر تطلع     

وع درب عمرك تفرش الأشعار

وأيّا الأحلى.. بينُن منحتار

وملكي الشاعر صاحب السمعه      

بسبك القوافي ما عليه غبار

بقصايدو بتشرقط اللمعه      

والوزن قلّو: ريّس المضمار

أسهم حروفو كتير مرتفعه     

عنو حكو أهل الشعر الكبار

شعر الحلو من عتبة النبعه    

والنبع منّو بتهدر الأنهار

من طلعتو ع قمّة الطلعه      

وختيار.. ما بينقال للختيار

وشاعر وفي للحقد ما بيسعى    

مش متل غيرو من القوي بيغار

كتابك يا ملكي للوفا شمعه

لشربل ندرتا وشعت الأنوار

كتابك ورود الكون مجتمعه

بباقه.. ع شكلا ما جمع نوّار

تسلم يا ملكي .. جامع الأزهار

وعمرك يطول يطول يا ختيار

**

ترحيب وشكر

بحفل توقيع ديوان "وين الخطيه؟" في سيدني

يسعد مساكن يا فرح العيون   

رفاق شعري.. وعزّ أصحابي

أهل الوفا.. تشريفكن ممنون

يا مية أهلا.. نوّرو عتابي

الكون غابه.. بالحقد مسكون

وإنتو طيور الحب بالغابه

إنتو القصيده الـ بيتها موزون

حباب الشعر في بينن قرابه

يا مية هلا بتشريفكن من دون

ذكر الأسامي.. الكل أحبابي

بكروم شعري زهّر الزيتون

ودقدقو القصدان ع بوابي

والروح نقزّها الوحي بجنون

ويكبر رصيد الشعر بحسابي

ينضج الخمري.. غربل المخزون

وصيّر وراق دفاتري خوابي

ولمّا المواسم تنتهي بتكون

حملت الدايه طفل أتعابي

الجايي الليله عمّدو بميرون

وتباركولي بمولد كتابي

**

الورهاني وبطرس

التمثال النصفي لعميد الصحافة المهجرية الزميل المرحوم بطرس عنداري، من اعمال صديقي النحات العظيم فؤاد الورهاني عرض مع مجموعة من اعماله التي كانت مميزة في معرض الكتاب في قاعة جمعية كفرحلدا.

شفتك يا بطرس جيت تا حييك

حسَّيت تمثالك الـ مسّاني

بهاك المسا !.. بروحك كنت هونيك

يمكن عليي تردّ.. لو احكيك

وتحب تسمع شعر وجداني

التمثال.. رد الروح كلا فيك

فؤاد .. كل ملامحك عاطيك

الله يزيدك عمر ويقوّيك

وتضل تتحفنا يا ورهاني

**

أنا مرعوب

تعيني برفق يا سنيني الجايه

انا مرعوب من درب النهايه

بدل ما تحاكميني بسيف ماضي

وبدل ما ترفعي بوجّي العصايه

وعلى كل الـ عملتو بعمر ماضي

ما بدي الالم والعلّه جزايي

ما دامي لعند رب الكون ماضي

بكرا عندما بيبعت ورايي

دخيلو.. بعدل حكمو بكون راضي

وبحبّو وكبر عاطفتو رجايي

**

للمفكرين حالن شعرا

الشعر فَن وموهبه واقمار

تلمع صُوَر إلهام من ألله

الاوزان ما بتكفي ومَنها عيار

ضروري بنَفَس ابداع تتحلا

الشعر خَلْق وفلسفة افكار

مَنّو شَقع ابيات حايللا ..

الشعر خمره والقصيد جرار

واللي الخوابي بالخمر مَلّا

ومش قدّها، يترك لغيرو الكار

ويترك خوابي الخمر بمحلّا

جَودة الخمر بتكشف الخمّار

يا أرفع شهادة بيوصَلّا!..

يا الشارب بيعطيه لقب حمار

و عا الخمر لا بَقّى ولا خَلّى

وكتار سَمّو حالهن شعّار

وطبعو دواوين وكَتَّرو اسمالله

والمدّعي؟ ما بيستحي بيغار

من الشعرا.. لشعرْهُن صَلّا

وبيسأل شو رأيك فيه؟ وبتحتار

بين الصراحه .. وزور متْجَلّى

ان كنت صادق؟ جَنّ يا ستّار..

وان كذَّبت حالك تا تتسلّى

وترضيه؟ بتلاقي الافندي صار

يمدح بشعرو.. ينتقد لكبار

وابداعُن.. وقصدانهُن كلّا

مصيبه.. لنْصابو بالغرور كتار

القصدانهُن مش صالحه إلّا

للرمي متل الحَطَب بالنّار..

لهيكي نفوس مْعَتَّره بقلّا:

زغار انتو.. ورح تْضَلّو زغار

انتو هواة.. وبعدكن قصّار..

الشاعر الموهوب؟ يا شطّار

مشروع شاعر.. من صنع الله

**

خجل الورد

لمّا جمالك طل.. والشـاعـِر حِـكي

والشعر لَمّ الورد تَ يجبلك سـلال

خجل الورد.. قدّام عَرش المَملكي

ساعة ما بَدرك هَلّ يتحدّى الكمال

ملكة جمال؟.. المملكي خلقت لِكي

و لبقتلك التيجان والسحر الحلال

لا تعاتبي عيون العليكي بتتكي !..

الله خـلَـق العيون.. بتحب الجمـال

**

مبروك

لطوني بك فرنجيه بمناسبة زواجه 

لبنان مش ناسي الرئيس الكان

لشعبو وفي.. ومواقفو صوّان

لبنان مستفقد لهيك رجال

لا يبَدّلو ولا يغيرو الالوان

بعمرُن ما نهبو من الخزينه مال

ولا الغرب طوَّعهُن ولا الجيران

ولا تآمرو وباعو الاستقلال

واللي انسمى وحدو بطل لوزان

بعدُن كلامو سيرة الاجيال

"الحق طول العمر مع لبنان"

تعيش يا طوني سنين طوال

وتحمل مزايا جدك سليمان

والسيدة طلت مقابيلك

بالهنا والخير تدعيلك

وغمرت الفرحه بعرسك محبيك

اللي قلوبهن حضرت تغنيلك

والرئيس البركتو عاطيك

من عند الله عم يصليلك

وبيك المارد شاف حالو فيك

كل المحبه من القلب هاديك

وامك رضاها وحبها بيغنيك

مبارك يا طوني بيك اكليلك

**

الى اللقاء يا حنا

الى روح ابن عمتي وصديقي الذي كان يزورني بشكل يومي تقريبا يلوّن الجلسة بنكاته المرحة ويفسر لنا مناماتنا، رحمة الله عليك عزيزي حنا ، كنت تحب اشعاري ويعز علي ان اكتب بمناسبة رحيلك، زرتك يوم امس وانت تصارع الموت في مستشفى ويستميد قبل ساعات من غيابك الابدي

زرتك مبارح ما قدرت احكيك

مغمَّض عيونك من عدا ما تنام

وإيد المنيّه عم تمرجح فيك !..

وقلب الضعيف يغصّ بالالام

جَرِّب نيران الغم اطفيها

ما اعتدنا نلتقي بلا كلام

ودمعتي.. بالقلب اخفيها

وارسم ع وجّي بسمة الايتام

خيفان لا تفتح عينيك تشوف

حزني.. وتكتر فوقك الاوهام

والموت سالل ع العليل سيوف

وعمرك بقي ساعات مش ايّام

دشَّرت غرفة آخره.. ومشيت

بحق البحبّو؟ صَدرت الاحكام

من حرق قلبي ع الفراق بكيت

وقت اللي شفت الموت حولك حام

وسلَّمت روحك بعدها وغفيت

روحك يا "حنا " بالسما ما دام

قلبك نقي.. بعمرك حدا ما ئزيت

ولا كنت تغضَب غير ع الظلاّم

الصيت الحلو.. ما بتاخدو توابيت

الله معك.. يَل كنت طير حمام

" منستفقدك يا مْفَسِّر الاحلام "

**

النيران

النيران عم تحرق حلا لبنان!.

يمكن غضب الله على الانسان

الما عاد عم يعرف درب الله

وفاتح دروب دروب للشيطان

من هيك تا الله بيتخلّى

تركنا الصلا والصوم والإيمان

منعربد وما خرجنا إلاّ

نلعن ابو النواب والجيران

والنايب الع الشعب متولّى

تولّى تا يبقى عالوطن سهران

مش فارقه عندو الدني كلاّ

الناس خلفو ماشيه قطعان

وهيك حاله رح منوصَلاّ

ما دامنا من إيدنا عميان

توبو تا ننجى من غضَب الله

يمكن تا نوعى ولعت النيران

**

فستانها الاسود

الى صاحبة الفستان الاسود ذو السحّاب الامامي من القبّة الى اخر الفستان

وسحّاب وقفت بكلتو ع الشَّط

تتأمَّل طرافي فروخ البط !..

والبط ؟ عالق نقر بالسوتيان

بخطفة نظَر بتحس ريقك شَط

ما اكفرك يا مصمم الفستان !..

كل الدني الحلوه ع ذات الخط

بتزرع نوايا الشر بالانسان !..

وحلم الخطيّه.. بالفكر بتحط

بيروح فكرو ع اللعب والنط

خطيت.. الله يلعن الشيطان !

**

دمعة الوجدان

جاء الأمر الى جندي كي يفض تظاهرة لبنانية تطالب بتغيير النظام الى الافضل، نفذ الأمر وهو يبكي. 

تركني!.. انا متلك قلب غضبان

من ناس نهبونا.. وبلا وجدان !

تركني !.. وخَلّي دمعتي تسـرَح

تصرخ معك: ثوره على الطغيان

جنود نحنا.. لغَير ها المطرَح !..

درّبونا نقاتل العدوان !..

ومع اهلنا بيوم الفرح نفرَح

ونشاركُن.. بالدَّمع.. والاحزان

شَعبي اللي مَطلَب حَق عم يطرَح

أهلي الـ صراخُن حَق بالميدان

ما بريد خاطر حلمهُن إجرَح !..

ولا بقاتل.. الـ رافع علم لبنان

**

شعر لبناني 

قالو: كتبلك شعرعن لبنان

تا نحسّ انَّك شخص لبناني

تارك الساحه ولاحق النسوان

وشعر الغزل ع لسانك غناني

جاوبت: صوت الناس عن ايمان

عم يطلقو شعارات رنّانه

هيدا كلامي القايلو من زمان

وصيحاتهُن صيحات قصداني

المانّو ذاكرها يراجع الديوان

هايْ كلّها باشعار ديواني!..

يا رافعين الصوت بالميدان

وصرخاتكن للجو عليانه

بعض المطالب مصدرا الوجدان

عم تطلقوها اليوم بلساني

صرخة شعب ثاير على الطغيان

وعَلّي نَهَب خزّان اوطاني

ثوره على الزُّعْما.. ملوك الجان

الما عندهُن دمّه ولا ديانه

دينُن السلطه ودينُن الجزدان

ودينُن تضَلّو نعاج سكرانه

انشالله تضل موَحَّده الاديان

وما تفرقو ديانه عن ديانه

رب واحد خالق الاكوان

ومتلك انا.. بالرَّب ايماني

الأوطان النا.. الدين للديّان

الكل اهلي.. الكل اخواني

ومن مَيل تاني ع الوطن قلقان

من دياب.. بين الناس فلتاني

لبسو تياب وعفِّة الحملان

ومدَرَّسين بمعهَد خيانه

ما هَمُّن اللقمه.. ولا الاوطان

ولا الحدود تكون منصانه

هَمُّن زعيمُن بس ما ينهان

وينهان كل شي بالوطن تاني

**

إيد بإيد

هيكي ضروري نْضَل إيد بإيد

ونتمَسَّك بخيط الامل.. لبعيد !.

تا الليل يقفا.. والظلم يغفا !..

ويشرق على لبنان فَجر جديد

تْرَكنا الوطَن !.. صار الهَجر منفى !..

لمّا الهجر قسري.. بكي وتنهيد !..

لمّا جروح الشوق ما بتشفى

ولمّا حنينك للوطن.. بيزيـد

وجانحَك بـردان.. ما بيدفـا

الاّ بوطن كان الفرح والعيد

يـا رب.. ايّـام العياد تـعـيـد

**

من قصص الحب

صدفه التقيتا ع غدا من جمعتين

ودار الحكي.. وتنينّا نسينا الغدا

ما عاد عنا جوع للاكل.. التنين

لما الحكي ع مشاكل الحب ابتدا

كل البيطلع من حبيبو عليه دين

قلبها المجروح.. يحكي ع الهدا

قصه طويله.. والحكايه؟ كلمتين

فل الحبيب وبالقلب باقي صدى

ترجف شفافا بالحكي.. والعينتين

هَدّو الدمع.. وبيعرفو بُعد المدى

قلبا طفل جاهز.. لأوّل خطوتين

بدّو شجاعه.. ويمسكو بإيدو حدا

وحجالها عم يندهو: الصياد وين

وحمرة شفافا ورد مشتاق الندى

**

مشغول

مشغول؟!.. وتركت الفكر مشغول..

والعين ساكنها الدمع ع طول

والقلب كلو جروح.. مشتقلك

والرّوح تترجّاك.. تـنـدَهـلـك

لا تروح.. يا رْفيق القلب والرّوح!..

لا تروح.. وتسيب القلب مجروح!..

مشغول؟؟ عذرك.. غَـدر مش معقول!..

من بعدما عوَّدت عمري عليك

ووعَّيت جسمي ع لمس ايديك

شوف الفرح كلّو.. بضحكاتك

ودوب.. بكْلامَك.. بهمساتك

عوّدتني اسمع حكي معسول

مشغول؟!.. يا ريتك ما كنت تقول!..

دمَّرت عمري.. والامل مقتول

وتركت قلبي بالالم.. مـجـبـول

وتركت بالي ع البعد مشـغـول

**

بيلبقلك الأسمر

لوَّنتني الشمس.. مش اكتَـر

قالت: ما فيي الشمس اتأبّـا

ردَّيت: لكن لونك الاسـمَـر

زادك انوثه وطَـلّـتو بـحـبّا

فيكي حلو للعَين.. لبيظْهَر

بردِّك تركتي الفكر يـتنبّـا

زرارك سمِر؟ او لونهُن اشقَر؟

كيف ما بيكونو!.. طَعْمُن مربّا

طَعْم الشهد.. أشهى من السكَّر

واطيَب وأشهى الطفل لمْخَبّا

ال عَ دَلَع آدم.. والغلا تربّى

**

من ين جيتي؟

كنت بحكايا الحب ما بالي

قلت الف تفوه ع الشيطان

العيش فاضي البال احلالي

ويا رب سامحني.. كنت غلطان

شفتك.. ورجع الحب ع بالي

شو ما لبستي.. بْدّلِّع الفستان

وبشتهـيه يكون بيلالي !..

وكل اللي تحتو.. مَلعَب خْيالي

بعواطفي.. رِجع الهوى سلطان

**

بلوزة الـزَّرقـا

شـفتهـا.. ببلوزة الـزَّرقـا

لزايد حلاها من حلا قَدّا

قَعدِت وتومي بعينها سِرقه

بدّا تا قَرِّب كرستي لحَدّا

وكان مَـعنـا تنينّا رفقه !

وكن بـدّي.. متل ما بـدّا

لكن عيون الناس مشتلقه

قلبي خفق ما عاد يتهدّى

يا ريت كان لوحدنا الملقى

بقعَـد بقربا.. بلمسا بـيَـدّا

وتقرب لحَدّي بدون ما اشقا

وشم عطر الفل والحبقه

وعطر صدرا وعنقها وخَدّا

**

 آخر المشوار

من وين جيتي بآخر المشوار؟

نَعْوَس سراجي.. وافْتَقَر زَيْتي

صَرلك شهر بتحركشي بالنّار

دَخْلِك قوليلي بَس شو لقَيتي؟

طالب السّترَه وقاشع المهوار

غالِق درَف قلبي ودِرَف بيتي

صارت حياتي واقفه عْ شوار

عيونك ع قلبي ليش دلَّيتي ؟!

ما عاد يصلَح للهوى الختيار

يا ريتك ! من زْمان حـنَّـيـتـي

لا يكون صدَّقتي حكي الاشعار

تا الكاتب الاشعار.. حـبَّـيـتي؟

**

لبنان الملك

يا وطني ما بريد

غير شوفَـك مَلَك

والـعـزّ فيك يزيد

وجبينك.. بالفـلَـك

يا اكبَر مَلَك

يا وطني الشهـيـد

رادولك دَمـار

بالنار و بـالحديد

وجيوش الكتار

وطلعت من النار

والغازي هَلَك

وبقيت الملَك

اليوم فصل جديـد

من فصول الحداد

مش بالبواريـد

بالنهب وبـالفسـاد

تا تجوع العباد

ويعَتِّم مَدخَـلَـك

وتبكي يا ملك

يا شعبي العـنـيـد

يا ثاير عن إيمان

ضَلَّك إيـد بـإيـد

ثاير ع الطغيان

لا تخاف العبيد

الاندال.. ولبنان

سـاحـاتـو إلَـك

يا شعب المَلَك

**

 دمعة عيون 

الشعر وعّى بقلبها جرحا الغميق

دمعة عيونا.. دَوَّبِت قلبي الرقيق

حبَّيت واسيها واقعد حَدّها

وقَبِّل عيونا الدامعه.. قبلة صديق

بعاطفه إيدي تداعب يَدّها

يمكن اللمسه.. خَلِّتا اكتر تفيق !!

عَ حُب ما بيترك كيانـا.. هَـدّهـا

تارك بعينا دَمع.. وبـقـلبـا حريق

من هَيك بوس عيونها ما بدّها

و كيف بدّي واسيا الموقف دقيق

بدّها بوسه بريئه تعدّها !..

وبوسة الخد بتحسبا بوسة رفيق

من هيك طَلبِت بوسها بِ خَدّها

بستا ومشينا كل واحد بِ طريق

يا رب ما تترك حدا واقع بضيق

**

 اخر قبلة

آخر قُبَل خِدها على إيدك

ودمعة عيوني وصرخة بحبَّك

صارت حلم ضايع مواعيدك !

يا الكان حبّي عايش بقلبك..

آخ.. حَدّي تضَل شو بريدك

وآخ.. بَعد الموت شو بحبَّك

**

ابن الشهيد

اتركني قبل ما تغيب يا بيي

شَـبِّـع من التابوت عـيـنيـي

تا تنحفر بالبال والوجدان !!

صوره توَعّي الذاكره فيي

صورة شهيد الحق والانسان

نادى ما بدّو الأرض محميّه

للفـاسـدين.. وبحر للحيتـان

لحكّام.. معظَمهُم حراميّه

بدّو الوطن يرجع متل ما كان

عرس السلم والحب والايمان

عايش بـ حبوحه وحـريّـه

**

ذكريات

بتذكرك كل ما رجع نيسان

وفاقو زهور الورد

وضحك الشجر بالجرد

وتزَيّنو الوديان

بالدفل والزنبق

وصار الفضا اروَق

وغَنّو السواقي وزَهَّر الرمان

بتذكرك كل ما بيرجع آب

والشمس يقوى حَرّها اللهّاب

وانتي ع شط البحر

ع الرمل لمسة سحر

ويلوِّن المرجان

جبينك مع زنودك

ويوَرِّد خدودك

ويحلم مع نهودك طفل دفيان

بتذكرك كل ما يجي ايلول

والورد متضايق و مخجول

وانتي قمر زعلان

قَرّب شهر تشرين

ودروس وقوانين

وشو يقهر الفستان

واللبس لمعَرَّق

مريولك الازرق

وشنطة كتب تثأر من الجزدان

واليوم صار العمر بكوانين

انتي وانا طوينا سنين سنين

ولَفّنا بدفاترو النسيان

قطَفنا مواسمنا

وصرنا بعالمنا

بمأتم عمر هربان

دمعه على الماضي

وفَزعه من القاضي

" كبرنا وغمرت عمرنا الاحزان

الله ع هاك العمر يا لبنان "

**

مطانيوس موره

كان مطانيوس موره مسلّم رحمه الله الحلاق الوحيد في قريتي انذاك يتجول في ازقة القرية وبين منازلها حاملا شنطة العدة مفتشا عن رزقته من قص شعر الاولاد مثلنا اذ ان الكبار كانوا يقصدون المدينة وكانت تسعيرة القصة عند مطانيوس ربع ليرة فقط ما يشجع الاهل على تفضيله عن سواه

بشنطة العدّه.. بودره ومْقَص

وموس ومشط افرَم وفرشايه

الاجره ربع ليره فقط للقَص

قَصّه على ذوقو.. بلا مرايه

ونركض عالمرايه الـ جوّا الدار

تا نشوف طلعت كيف قَصّتـنـا

متل اللي طالع من سجن اشرار

وتشبه طريق الجرد رَقبتنا !..

ومطانيوس موره ضعيف الكار

لكن ما في غيرو بِ ضيعتنا

ومن مَيل تاني مْرَخَّص الاسعار

تا وَكَّـلـوه بشَـعر نـقـرتـنـا

وكنا انا وخيي ولاد زغـار

مَلها تَـمـن بالبيت كـلمـتـنـا

ما كان ينفعنا بكي ولا نقار

تنزيلة الاسعار.. هَـزْمـتـنـا

يا مصيبة السودا البلا دبّـار

مبَردعه القصَّه يا جرصتنـا

ولمين بدنا نشتكي.. نـحتــار

وبنفس المصيبه ولاد حارتنا

لبعضنا.. نشكي مصيـبـتـنـا

**

شفافك ندى

نكهة نفاسك مسك وشفافك ندى

وعيونك الحلوين ساكنهُن قَمَر

بعلّق شرط ما بيقشع عيونك حدا

الا ما متلي بلحظ عينيكي انسحر

**

 بوسه خفيفه

بوسة شفافا القلب بـتْحَـلّي

والريق؟ سعر الشهد بيغلّي

بوسه زغيره وَلّعِت هالقَـد

من بَوسة الغَير شكل يا دلّي

لَهتا حَرَقني قد مانّو حَـد !..

من كترة الحرمان والقلّه !..

وشو بينفع المحروم بوسة خَد

" متل البيعَبّي المَي بالسَّلّه "

**

ضَلّي اضحَكي

مين زَعَّلِك مين سَمَّعِك مُر الحكي

عيونك يا روحي ما بيلبَقلا البكي

وبسمة شفافك متل بسمات الورود

ما بريد شوفا مكهربه وعم تشتكي

وعمرنا.. رحله قصيره بهالوجود

لا تضيّعيها بالزعَل.. ضَلّي اضحكي

**

بياع السليق

في صار الفه بينك وبين الطريق

قضَّيت عمرك تدفش وبعدك فقير

داير بِ ها الحارات بتبيّع سليق

ختْيَرت ماشي!.. والوطن غافي الضمير

لبنان كنت مشَرّع بوابك

ويقصدوك الناس من باني وبني

يتباركو من نعمة ترابك

مناخك دوا واحلا طبيعه بالدني

والمجد كلو بصفحة كتابك

جاع شعبك والحَكَم شعبك غني

سرقو الخزينه ونضّفو جيابك

وتقاتلو ع قسمة تيابك!..

انشالله بترجع ضاحك وعيشك هني

وبيرجعولك كل غيابك

والضمير النايم بيرجع يفيق

وتريّح الختيار من بيع السليق

**

 خياط القلوب

وين عنوانك يا خيّاط القلوب

وحَسنِه حَدا يدلك على دربـي

ع مصيبتي ما لو صبر ايّـوب

وصايره متل الشمع عم دوب

وجْـروح ما بـتـنعَد بِ قـلـبـي

**

اوهام

حكيِت معي كيف قلبها بحبو احتَرَق

وكل كلمه مـبَـلَّـله حـروفـا الـدمـوع

قلتلها: صَعـبـه يـعـود اللي انـسَــرَق

داوي الجروح لساكنه جوّا الضلوع

وامسَحي من البال ماضيكي المَـرَق

هَـبِّـة الريح بتنطفي بوجّا الشـمـوع

وحب البيطير بـريح أصلو من وَرَق

وروحـتـو افضل كتير من الـرجـوع

وجتة اللي بـيـنـشـلـوها من الـغَــرَق

بـيـدفـنوها.. "العاقِل بـيـبـقى قَـنـوع "

**

بوسطجي رشعين

"نعمة الله نجيم - ابو وجيه"

تمسَّك بشنطه من عمر جدّي ومشي

قبل ما تميل الشمس عَ غيابها

وبين الهوا و الغصن دارت وشوشي

يعني النسمه مبوردين تيابها

الامّات ناطرتو.. عَ طول مشَـوَّشي

وحلوات موعوده بجواب حبابها

وماشي "نعمة الله" بخطوِه مروّجي

قاصِد بيوت ال ضاحكتلو عتابها

وتصير امّي بِ دعاها تـرتـجـي

انشالله معو مكتوب من غـيابـهـا

وضحكتو رطلين تبقا البوسطجي

لما الرساله مسوكره من صحابها

مسوكره شوفة الخاطر رح تجي

معمول من ضمن الحواله حسابها

من غربتي بتذكرك يا "بو وجيه"

وبـلعَـن الغربه القاسيه واسبابها

بطـلَـتـك وبـمنطـقـك تـبـقا وجيه

نـيّـال ارض لضمّـتَـك لـتـرابها

**

عشق القلوب

لما نوار الحب بتْضَوّي

لا الحلى ولا عمارنا بتنقاس

عشق القلوب بيردم الهُوّه

سبحان رامي الحب بين الناس

**

طبيب الاسنان

"المقصود هنا المرحوم الخوري واكيم نجيم"

عيادتو عَ كعب لـ بهاره

شي الف ضرس بظلّها مقبوع

بتقصدو بلا موعد زياره

لما بتمَّك في ضرس موجوع

و"كلبه" بحَنَك مكعوف قهّاره

شي شوفها ارجف وهرّ دموع

وبيي آخدني جَرّ عَ الحاره

وحتى يروِّق خاطري المفجوع

يقلي: الخوري صاحب شطاره

بيريّحَك من ضرسك المنزوع

وبكرا الك طابه وسيّاره

وكاسة "يأسما" وكعك لما تجوع

وشرَّف الخوري.. طهَّر "الكلبه"

وبيي وقِف فَوقي مقابيلو

بإيدو فتَح حَنكي ويا دَوبي

اصرخ.. بسرعه "بكلبتو" يشيلو

..ومخمض بمي وملح يا قلبي

وبيي بطول العمر يدعيلو

**

وين غايبه؟

وين غايبه مدّه ما بِيَّنتي؟

الليل متلي بنَغمتِك موعود

الليل ما بيحلا بلا انتي

ومرّه بدونك دَمعة العنقود

**

يا دفتري

يا دفتري شو حامل مواعيد

ما ضَل سطر بْياض بوراقي

مَرّ العمر حب وسهر ونبيد

ولا القلب عم يهدا ولا اشواقي

**

أبو اسبر

 للمرحوم وديع شديد "ابو اسبر" لكان شاطر بتفسير الاحلام

من كم يوم الصبح شفت بنام

وعيت من نومي مسَودَنّي

يا " وديع " مْفسِّر الاحلام

مشغول بالي كتير.. طَمّني

قلّي مَعا شو حامله الايّام؟

ولو طالعي بالحلم متْجَنّي

معلَيش خَبّرني لا تخفي كْلام

الهمّ رح يوصَل غصب عَنّي

مش رح بتسأل دنية الاوهام!..

وقت اللي بدّا حسابها مـِنّي

وسألت قالولي: "بو اسبر" مات

من زمان.. ورموز الحلم غابو

وبعدو حدا ما يفسِّر بنامات..

ندَفنو معو.. التبصير وكتابو!.

ياما لعندو هَرولو امّات!..

بناماتُـن جبال الوهم جابو

ولادُن بغربه وبينن مسافات

والقلب متلهَّف ع غِيّابو!..

حلام الصبايا؟.. طيور وفراشات

بمليون حجّه.. يطرقو بابو

تَ يشوف كَنّا صادقه النيات

وتَ القلب يتطَمّن عَ احبابو

شو كان يَعرِف.. يرحَم ترابو

**

موسم الكركه

بتشرين "مرعي" رَكَّب الكركه

المسطار جاهز صار بالكوخ القديم

سنين عمرا.. وبَعدها الشركه

ما بين "مرعي البايع" وعَمّي "حليم"

كان العنب متل الدهب متكي

و اليانسون معبَّق بعطرو النسيم

ابتديت السهره وقويت الحركه

وقبل غيرو طل عالسهره نسيم

تسولف حَكي.. وبالباصره عركه

وتزريك للمغلوب والرّابح زعيم

مرعي" خبارو عالهدا يحكي

خبار طازه.. خبار تاريخا قديم

سهرات حلوه.. يطرح البركه

بعَرق جيّد.. والعنب يطلع كريم

**

العين غشاشه

قلتي على عَـيـنِـك إجِـت رَفّـه

وفكرتها علامِه؟

طَيِّب عَ راسي.. ما بقى كَـفّـي

وبسحب كْلامي

رَفِّة رموش؟ و ليش تَ الشفِّه

تشتاق قدّامي؟

وليش تَ حرارة جسمِك تدَفّي

من بعيد؟.. والشّامي

لوَّن خدودِك؟ ليش هالرَّجْـفِـه

بِ جسْمِك الحامي؟

مْغَلَّط انا!.. في بليس متخَفّي 

خَلف اوهامي

**

وين غبت؟

رسالة الى الامام المغَيَّب موسى الصدر

وين غبت؟ بعدو ناطرك لبنان

وارزتو رجوعك مشتهيّه

و ع الجمر ناطر شعبك ويئسان

حلم العداله.. وحلم حريّه

وين رحت؟ بَعدَك شَرَّعو الحرمان

وعَ ذوقهُن فلتو الحراميّه

وضَل اليتيم مشَرَّد وحفيان

وزادو الارامل.. والعبوديّه

عم الجهل.. والظلم.. والطغيان

واديان شحنوها انانيّه

الدين صاير.. ملعب الشيطان

حَرَّفو الكتب السماويه

راحو اللي كانو يْدَعّمو البنيان

باخلاص ومحبّه وصدق نيّه

لكن رغم بُعدَك لصَرلو زْمان

طلَّيت من صفحات مطويّه

ورجع صَوتَك نَبَّه الميدان

ع الحُب.. ع نَبذ الكراهيّه

مبارحه.. نَهجَك رجع عنوان

بساحاتنا.. صيحات مدْوِيّه

الدين المحبه.. كلنا لبنان

سلامات لعيونك.. من الوجدان

والقلب.. والبركه الالهيّه

**

حجاب وصليب

بين الصليب وقيمة حجابك

شايف وطن.. شايف عَلَم مرفوع

معَنوَن سلام الدين.. بكتابك

بقلبك الصافي بصوتك المسموع

اللي فيه نادوا.. محمَّد ويسوع

**

رباعيات

ـ1ـ

بفستانك الشفّاف ومعَـرَّق

والتين اوّل موسمو مْوَرَّق

بَعدِك ببالي مْصَوَّره لليوم

كلما مَرَقتي بنتشي وبعرَق

ـ2ـ

بتخايلك.. وبتحرميني النوم

وبيصير هاك الطفل يتْحَرَّق

يشتهي ببَحرِك الدافي العَوم

لا تفْزَعي السبّاح ما بيغرق

ـ3ـ

قالت شي انّـا خالصه حمّام

يا رَيت فيي ازرع عْـيوني

بحمَّامها.. ولنّو تـلات ايام

كون منشفه وليفه وصابونه

ـ4ـ

لا تكب شو مْفَضَّل اكل.. هاتو

ولادي العا حضني بلا عشا باتو

ببلاد حـامـيـهـا .. حـرامـيـهـا

وأهـل الكـرامـه والكـرم مـاتـو

**

منقوشه

طلبت منه ابنته مبلغ الف ليرة لشراء منقوشة تسد جوعها وعندما عجز عن ذلك وضع حدا لحياته شنقا

مأساة ناجي الفليطي.

الف ليره!.. ما مَـعـي

ومْسَكَّره بواب السعي

وضايق بوجّي المدى

والجوع بنتي مْهَدَّدا!..

وليره يا بنتي ما معي

من وين بدِّك تشبعي؟

لمّا بموتي بتسمعي!!..

لا تزعَلي ولا تدمَعي

بنْهي حياتي ع الهدا!..

أسْـتَـر إلي تْـراب الـردى

لِمْ الف ليره ما معي!..

لمنقوشتك.. تَ تشبعي

بكرا حدا.. بعد النعي!..

بيطفي الحريق بأضلعي

بكرا.. بيتْبَرّع حـدا

يوم العزا.. بوجبة غَـدا

من لقمة الرحمه شْبَعي

الف ليره؟ ما مَـعـي!..

ولمّا بلايي بترجَعي

ع البيت لا تتوَجَّعي

دور اليتامى عْـوايـدا

تلاقي اليتامى وتاخدا

بدار اليتامى بتشبعي

منقوشتك نَقشِت مَعي

**

 البشر خرده

ان بعت كلوه!.. بعد عندي العَين

وبَعدُن ع شقفة كبد رَح نادي

والسعر؟؟ مونة خبز.. ع شَهرَيـن

مْـقَسَّـطه.. تَ اطعَـم ولادي

الفقـر عـامل عَـرض.. يا مـرْضى

وحَق القطع مش طالب زياده

الانسـان صار بـموطني.. خرضه

وَضعِك بِيبَكّي القلب يا بلادي

**

رسالة الى يسوع

دخلك لا ترجع تخلق من جديـد

بأيَّ وطن بالشرق رح تُولَد ؟؟

بأيَّ مغاره.. تا يجو من بـعـيـد

مَعهُن هَـدايـا الافـضَـل وأجـوَد

تا يْـقَـدّمـوهـا والسّـجـود يـزيـد

لـطفـل خـلـق جـديـد بِ مَـزوَد

لا الناس مَعها تـحـتفِـل بالعـيـد

والجَـوّ ظـلمه.. والأمَـل اسـوَد

والشعب ماشي عَكس ما بتريد

والقدس!.. فيها كل شي تـهَـوَّد

لا حْمام ضَل ولا بقي زيتون!!

وزاد حكم الرّمْـح.. والسـكّـيـن

والعرب؟؟ كل العرب نَـيـرون

عَ بَعْضهُن.. ما هَمُّن فلسطيـن

للغَرب كلُّن عنقهُن مَـرهـون!.

ومال النَّفط عَ السكر والحلوين

وبالغَرب؟ هَيك بيفهمو الميلاد

سكر وفحش للصبح بالاعـيـاد

وشجرة ميلاد مْـزَيّـنِـه بأنـوار

تا يـجَـمّعـو تحتا لِـعَـب لـولاد

وحـدّهـا بـيـتـصَـوَّرو تـذكـار

وذكـرى عليهُن بالفرح تنعاد

الميلاد صار مناسبه لـزغـار

بينطرو يجيهُن هـدايـا جـداد

لا صلى ولامعرفه ولا خْبار

عن طفل خلق بمزود و ببلاد

صَلبوه فيها.. وبَعْدُن الاشرار

حكّامها.. وما غَيَّرو المضمار

وعالارض مش باقي ولا عدرا

ولا حدا بيشبه يوسـف الـنّـجـار

لا تـجـي اليوم.. ولا تجي بُكـرا

"خَـلّـيـك بـالـجَـنّـه مَع الأبـرار"

**

عطشان

عم تشربي قهوه؟.. انا عطشان!.

يا ريت!..فيّي أُوصَل لْشَفِّه

وتعرب شفافي.. داير الفنجان

بيحِس قلبي بمطرح الشِفِّه

كنا سوى.. وكان الزمن نيسان

عا ذوقنا كاس الهوى نْصَفّي

الله.. كيف تْغَيَّرو الازمان!..

مين قال عا الاشواق منصَفّي

شو كنت حبِّك من عدا فستان

ومن كل شي بيساير العفِّه!..

وجسمك الابيض حَسّبو بردان

اغمرو بجسمي.. تا تتدَفّي

وكنت شم الورد.. والريحان

وبنفسج العا طول متْخَفّي

وتغريدتك؟ من اجمل الالحان

تْوَلِّع الجَو.. وترجَع تْطَفّي

بُعدِك جَريمه قصاصها الحرمان

وحَظّي النحس مكتوب عا كَفّي

ومانّو بإيدي الصبر والسلوان

ولا قادر بلاكي العمر كَفّي

ولا الحلم دَين الشَوق بيوَفّي

**

كلمات نار

بيجوز دينيي.. ع كتر الوَشوَشي

كلمات نار.. بدينتي يرمو الحباب

مرّه دَلَع.. مرّه غرام ودردشي

مره بكي.. مرّه عشق.. مرّه عتاب

هاك الحكي اللي كنت حبّو وانتشي

تخمين وَرَّتلي بادني التهاب !..

" كل نشوه قبالها بتدفَع حساب "

**

إلى ارواح ملائكة الجالية الصغار

لا لَوَّح التفاح بَعد ولا استوى

الكانو الهَنا ببيوتُن وكل الغوى

الكانو فَرَح لعيون ووجودن أمان

والاهل عقدو ع نجاحاتُن لِوى

الله ما بيجَرِّب حدا.. الشيطان

لمّا على الاجرام من كَيدو نوى

ترصّد ورود طفال عالدكان

والحادث المشؤوم بالعالي دَوى

وحط الجريمه برقبة السكران

اربع طفال عليهُن القلب اكتوى

ما اظلَمَك يا قَدَر عا الانسان

غصون النَدِيّه شَلَّعا جنون الهوا

سدني بكِت كلّا.. وبكي لبنان

يا رب قَوّيهُن يا وهّاب القوى

لعيال لَفّت بيتها الاحزان

غمرْهُن بعَطفَك كون لجروحُن دوا

الهمهُن كبير الصبر والسلوان

وبَرِّد قلوب احترقِت وحلما هوى

رحتو سوى عا جنّة الرحمان

يا طفال  تا تتسوقو رحتو سوى

يا ملايكه.. صرتو مع الديّان

للاهل صَلّو تخفّ لوعات النوى

**

مشتاق

شو صاير؟.. بتلفن ما بترِدّي

الشوق لطعة جَمرتو حَدِّه!..

مشتقلك وما شفتك من زْمان

بحِسّا سنه ولو قصرت المدّه

مشتاق اسمَع صَوتك الرنّان

لضحكاتِك البيخففو الشدّه..

لعيون متلا لفتة الغزلان..

لرموش من دون كحل مسوَدّه

لشفاف دَخلا.. لونها مرجان

ساحره.. بالشّهد بتْنَدّي..

للعاج لمْخَبّا.. لخصر فتّان

رِدّي عليي.. بعزّة الرحمان

صَوتِك علاج الشَّوق والحرمان

وكلمة "الو" عا البعد بتقَدّي

**

بحبَّك

تلفنتلي.. وقالت: بحبَّك

قْلَقت الدني؟ شو صايبك؟ جنَّيت؟؟

دغري عليي بينشغل قلبك

قَدِّر ظروفي ان ما قدرت ردَّيت

ممكن كنت بزيارة الجيران

ومرّات في عنّا حدا بالبيت

ومرّات بَرّا حضرتك سهران

ميتين مَرَّه بغيبتك دقَّيت!..

- يا ريت لولا طالع بإيدي

عيش بهداوة بال وتمنَّيت

ما النار تحرقني ع البعيده

الكرمال عينا بالشعر صلَّيت

من لهفتي يمكن الف شمعه

بظرف جمعه ناقصه ضوَّيت

بعمر النوى ما اطول الجمعه

يمكن سنه ايّامها حسَّيت !..

يا رجوتي.. يا نور عينيي

بكلمة بحبَّك.. منِّك تْهنَّيت

لولا قلقِت لا تعتبي عليي

متل حبِّك حُب.. ما حبَّيت

**

بتحبّني او لأ 

"المارغاريتا" قَبل ما تدبَل

حملتها.. وبلَّشت وَرِّقـهـا

يا ترى؟ بترفُض او بتقبَل

فيي حبيب؟ كتير بعشَقها

ومع كل ورقه كان قلبي يدق

وترجُف صابيعي واطلُب وصَلّي

يا رب تنصفني.. وقلبا يْرِق

ان خلصو الوراق بلأ.. يا دِلّي!..

ببُعْدِك طوال.. طوال.. ايامي

بصير الدقايق عَ صابيعي عِد

بقُربِك؟ الوقت بيمرق حرامي

ما حْسَبت بدّي اعْشَقِك هـَالقد

**

سكران

لا تسوق سياره اذا سـكـران

بتاخد جزا..عا قيمة السكره

بتقتل حَدا.. بتفوت بالحيطان

بتسرَع؟ بتاكل ضبط عالنمره

لكن انا؟ سكران مش شـربان

نقطه..ولا داقت شفّتي خمره

من شفاف لونا بيشبه المرجان

معطَّره.. متل الورد حـمـره

لا تسأليني ليش كنت حيران

ممكن تطَوِّل سكرتي لبكرا

سكرتي؟ من لحظك الفـتّـان

وشَردتي؟ عم بحلَم بـغَـمـره

ومجبور سوق برجعتي وخيفان

شرب الخمر ارحم من السمره

**

فلاح

بكّير حضَّرت " الصند والنير"

سْبَقـت الفجر ع الحقل يا فلّاح

بَـعـدُن بعزّ النَّوم لـعـصـا فـيـر

لا غَرَّدو بَعد.. ولا رَفّـو جـناح

يا فلاّح.. يا فلاّح

غادي تا تفلح سَهل.. يا حْواكير

يا كروم.. يا ع جْـنايـن الـتفّـاح

تـا تـنجَـح مْواسِم الـخَير كتـيـر

وتـزيـد بَركه.. وتكبَر الاربـاح

يا فلاح.. يا فلاح

لـولاك خـربـو جنايـن اللـيمـون

والخـوخ يَبَّس.. والجَـنـارك ناح

ولولا شـقـاك مْـواسِـم الزيـتـون

ما بيطْلَعو الزيتات كانـو مْـلاح

يا فلاّح.. يا فلاح

رب السما طول العمر يعطـيك

ع جْيبنَك خطوط الكرامه وشْاح

قـنـعـان.. هَـيدا كَـنز.. وبيكفيك

تـغـفى وضَميرَك رايـق ومرتاح

يا فلّاح.. يا فلاّح

يا مْـرَوِّض الـفـدّان بـالمـسّـاس

وصَوتَك العالي ع البهيمه سْلاح

هِـزّ مسّـاسَـك في بَعـض الـنـاس

دربن غلط.. عن درب الله زاح

" قَلّي: البشر جلدُن جلد تمساح "

أخ .. يا فلاّح.. يا فلاّح

**

راهب كفيفان

يا راقد وغفيان

بس مش غفلان

بحضن السما وعيان

تا تساعد الانسان

يا راهب كفيفان

عيدك صلا وبخّور

ببركة القدّاس

تْقَبَّل صلا وندور

اشفي مراض الناس

صبِّر الحزنان

يا راهب كفيفان

الشعب بيناديك

بإيمان وعباده

بعيدك مندعيك

لا تترك بلادي

بلادي املها فيك

انشلها من الطوفان

يا راهب كفيفان

**

الدني دولاب

من جديد سكَّرتي بوجّي الباب

وقلبك ؟ ولا حاسس ولا داري

شو رميتي عا الحبيب عْذاب !

يـا عـايشـه بقلبي.. وافـكـاري

ما كـنت افهَـم طبعِـك الـقـلاّب

تا كنت حالي من الهوى داري

وما يغشّ عقلي رمشِك الجذاب

ولا اتـركِـك تـتـلذذي بـنـاري

ولا انْـوعِـد بالشّـهـد والعـنّاب

ولا بِ هواكي تجـن اشعاري

لا تفرحي كتير.. الدني دولاب

بكرا حـدا مـتـلِـك بـتـخـتـاري

بـيـدَوّقِـك مُـر ووَجَع لـغـيـاب

و لـمّـا متل فـكري بـتـحـتاري

وقلبك بيدفَع متل قلبي حسـاب

بـتـتـذَكّـري بـالـحـب اخباري

**

يا ريت

 يا ريت بقدر متل غيري نـام

وشـوفـك بـقـربـي كل ايـامـي

وعيش عرس الحب بالاحلام

شمشم الورد واقطف الشامـي

بلا دبغ شامي ولا جرح دامي

**

شعر الغزل

سبحان الله كيف كنا ننتشي

بْحَكي الهوى وهمس الهوى والدَردَشي

وما عاد يرقص قلبنا لشعر الغزل

الحكي باهِت.. والقصايد أروَشي

**

طلة قمر

طَلِّة قَمَر طَلِّت من الشباك

عيونا حَكولي بدون ما تقلّي

لا تطوِّل غيبتَك يا ملاك

علَّمتني بَعد الكفر صَلّي

**

بوسني

بـوسني.. ولا تـخـاف يـا ولـفي

ولا من لَمِس إيدي وغَمِر كتفي

قال المتل: ضَرب الحبيب زبيب

بَـوس الحبيب من البلى بيشفي

**

وسواس

قالو تا عنِّك ابعد الانفاس

ولا العطر شِمو ولا الورد ينباس

كتير أهوَن حد منِّك موت

ولا عيش بالحرمان والوسواس

**

تغيَّرت يا اسمر

يبَّست قلبي العاشق الاخضر

وصايرأمَل مقطوع بٍ بالي

لا عدت عا مجالسي تحضر

وشو صاير بحالي ما بتبالي

غـبـت مـدّه.. راجِـع مْغـيَّـر

يا الكنت مالي وكل رسمالي

نسيت الشعر بالحب يا أسمَر

وشو كان حبَّك عالقلب غالي؟

صاير عليي كتير متكَبَّر!..

عا مَهل.. لا توقَع من العالي

**

أزمه وبتمرق

وميِت بإيدا ضَل عنّي بعيد

لا تبوسني ولا تقَرِّب عليي

مرَشّحه لا تنعِـدي ما بريد

يصيبَك اذى من لَمْس ايديي

لولا انعدَيت النَدَم ما بيفيد

يخرب ديارو هالمرض لجديد

توقّى ورَوِّق بالك شويـّه

تا تنتهي الازمه الصحيّه

 - رح ضَل صابر قدّ ما فيي

**

معجوق

عاجقني وفيي معجوق

لا مروّقني ولا بتروق

قلّي شو نوعو هالحب

معَيّشني شم ولا تدوق

**

حبر البكي

يمي تا اكتب شعر بِ حِبـر البكي

طافت عيوني بس ما طلع الحَكي

ما في كلام لوالده بْـيـوفي ديـون

ولا في قصيده بتختصر حُبّي لكي

**

ابو شيبان

ابو شيبان اي امين شيبان عبود اطال الله بعمره، من كرام بلدتي اللذين اكن لهم كل محبة، كان مزارعا متواضعا في بستانه القريب من البلدة والذي كان و بدعوة منه ملتقى شلة من ابناء القرية ومن بينهم انا نقصده عصرية كل نهار لنشرب القهوة في ربوع عرزاله الرحب ويكون ابو شيبان قد برَّد ما عنده من خضار كالبندورة والخيار وما يحوي بستانه من فواكه كالتفاح المغازلة والخوخ والعنب والرمان ليقدمها الى ضيوفه المياومين، تحياتي لك ابو شيبان ارجو ان تكون بالف خير.

الله على ايّـام " بو شيبـان "

ما اطيبو وما أكرمو انسان

عا جنينتو يحلالنا المشوار

لقهوة العصر.. ويعمر الديوان

وميِّة هلا من القلب للزوّار

يقولها وتطلَع من الوجدان

جلسات حلوه..  دَردشه وخبار

والكل يبقو بمجلسو اخوان

غنطوس لَولَبها خبارو كتار

بيبَهِّر المضمون والعنوان!

يطعّـم الجـلسـه بنكات كبار

جعبتو فيها شْكال لـوان!..

وقَبل قَعدِة رَكوتو عالنار؟

ضيافة فواكه جاطها حرزان

ينقّي لضيوفو كان اطرى خيار

وخَوخ وعنب ومغازله ورمّان

جلسات حلوه.. متلها ما صار

ما اروعا جلسة هاك البستان

الله.. لَـو يـرجَع زمـاني نهار

لاجمل عمر بشمالـنا الـفتّـان

مهمـا ابن لـبـنان حـار ودار

ما في هَـنـا الا بارض لبنان

ولا الفواكه طيّبه ولا الجـار

ولا في حدا بيشبه ابو شيبان

**

لابن ابو شيبان

بعد نشر قصيدتي لابن بلدتي العزيز ابو شيبان ارسل لي ابنه ايليا ردا شعريا يدعو فيه المغترب للعودة الى وطنه واهله ويسأل ان كنا نتذكر بعد ضيعتنا وما فيها من جمالات ورأيت من واجبي ان ارد على رد الحبيب ايليا بهذه القصيدة.

شتقنا يا خيي نرجع شتقنا

ونسـمات ارزتـنا تعانـقـنا

للاهل للاصحاب مشتاقين

ال طيفهُن لحظه ما فارقنا

لا تقول نسّانا البعد تخمين

وقِدر الغَرب بالمال يسرقنا

وحياة الله والسما ورشـعين

المُرّ الأسى عا فراقها دقنا

منضل نحلم عالوطن جايين

وبتضلّها الاشواق تقـلـقـنا

ونَغْمات لبلابل والحساسين

وصوت الحجل ياما يحندقنا

وطيرالتويني بكرم عزالدين

عالتين قبل الـفَجـر يسـبـقـنا

والصيد بكروم العنب والتين

وبيوت حضنتنا وفِـيا خلِقنا

والنبع.. والوادي، والبساتين

ولَـوزات بغصونا تعمشقـنا

ما بينتسو ايامنا الحلوين !..

لاخِـر رمَـق وحياة خالـقـنا

بلاد الحلا حكامها شـياطين

منهُن هربنا من سنين سنين

" الله يجازي لهيك فَرَّقنا "

**

كابوس

ما كان صارعمري بعدعشرين

اشتاق بوس واغمر الحلوين !..

واليوم ؟ لو بالحلم بست شـفاف

بوعى مسرسب.. من منامي بخاف

وبرجف على ساعة وقت تخمين

ويـا رب لا تجـرِّب حدا.. آمـيـن

والناس من فيروس كورونا عين

**

ضمني

الى صديقتي الغالية الاديبة والاعلامية الراقية نادين صموئيل شلهوب مع اعطر التحايا.

ضمّني.. ولو طَق ضلعي وناح

اوجاع ضلعي.. ولا وجَع قلبي

ان كبر الوَجَع؟ من غَمرتَك برتاح

دوَّبـتـني من الشـوق يـا حـبّـي

دَوب الشّمـوع بسـاعة الزيّـاح

دموعا صلا.. وصوت الوجَع طَلبه

وبالعمر تمرق كم لَحظَه ملاح

ولا حَرقِة الشَوق اللي متْخَـبّي

وآخ !.. من هالشوق يا رَبّي

**

كورونا 

بعطرِك؟ الف نيالها تـيابي

مْكَيّفه.. عطرك مِنا بيفوح

بخزانتي.. كلما فتحت بابي

من ريحتا.. طيف القمر بيلوح

بيندَهو فيي.. القلب والروح

يا "هالكورونا" مصدر عْذابي

يا مْكَتَّر بقلب الحباب جروح

يا مخترع وَهمي وسرسابـي

خلَّيتْها متلي عا بعدي تـنوح

قْعَدت وَحدي راجع حسابـي

اللي مْجَمَّع.. اللي مْقَسَّم ومطروح !..

لقَيت الدني.. اوهام.. كـذّابـي

المجد باطل.. والبَطَل شرشوح

نيّال لعصافير بالغابه..

كل الفضا قدّامها مَفتوح

مش متلنا مساجين يا حبابي

لا الغمر.. حتى ولا اللقا مسموح

نيال لعصافـيـر.. يا صحـابـي

مَطرَح البدّا بها الدني بتروح

**

سهرة عيد

شو فِيا؟ لو بَوستَين زغار

بغفلة ولطف حَطُّن على خَدّي

صدفه بْهاك السهره قَعَـد حَدّي

وزعلت.. وتظاهرت.. ما بدّي

وكان بدّي.. وكان بِ ودّي

يكونو شوي كبار

يكونو شوي كتار

مش بوستين زغار

ومن يوم هاك اليوم يا خالي

ما راح.. هاك اليوم من بالي

بشرد بعيد.. وحالتي حاله

حلمي اخدني وطار

وبحس خدي نار

من بوستين زغار

عزمنا يا خالي بعد.. من دون عيد

العيد يا خالي بعيد.. بعيد

عيد هالسهرات كرمالي

وعيد ذات الجَو والزوّار

وتبقا محلاّ جلستي بالدار

والخَد يهنا.. ببوستين زعار

هوّي وانا نتشارك المقعد

يلز صوبي.. وقَصد ما ابعَد

وتتشاوَف الصدفه على الموعد

ويبدا السهر بكير

وتطْوَل السهره كتير

والليل يسعَد.. والقلب يسعَد

وتلمع عيون الجار

ويبَلِّش المشوار

بِ بوستَين زغار

**

البوسطجي

رحم الله نعمة الله نجيم " ابو وجيه " كان البوسطجي اي ساعي البريد الوحيد في بلدتي " رشعين " اوائل الستينات و كنا وكأكثر البيوت وخاصة في القرى اذ ان ضيق الحال وقلة الفرص تدفع كثيرين الى الهجرة من الوطن بحثا عن لقمة العيش الكريمة لنا في الغربة فردا من العائلة وكان اخي سمير رحمه الله قبل ان اصبح معظمنا في المغتربات مهاجر في الولايات المتحدة.

خيي هجَرنا من الحالة المُزعـجِـه

وعا غيبتو امّي عا طول ملَهوجي!.

وهاك الزَّمَن شو تحس لمغَرَّب بعيد

لا النّت إسّـا.. ولا الهـواتِـف دارجه

وبالبحر وَقتا توصَل طرود البريـد

شهرين.. لصحابا الرسايـل تا تجي

"وبو وجيه" بضيعتي ساعي وحيد

بعد العصر يحمل الشنطه المبهجه

يا رب امي يحالفا الحظ السـعيد

تا تنطرو ترجع عا بيتا مْرَوّجه

وبنطرتا تصلّي.. ودعواتا أكيـد

يكون جايبلا رساله الـبوسطجـي

يا بـلادنـا.. بعنقِـك دَمع امّـاتـنـا

يا مفَـرّقـه بـكل الدني اخـواتـنـا

وقت الما عادت تنفَع لالله كريم

ومهما عِـلـو ما ينـفَـعو شهاداتنا

بدَّك وظيفه؟؟ بوِّس جْرَين الزعيم

وبيصير ملكو.. صَوتـنـا وكلماتنا

وكـيـف ما بـيـميل راعينا.. الفَهيم

لازم عا نَـهجـو ومَسلكـو خطواتنا

ان خالفت؟ بتخون الوفا.. جرمك عظيم!..

بيشبّعو مسبات زلمو للحريـم

وبـتوصَل مسبـّاتُـن لامـواتـنـا

هيدا اذا ما حللو دماتنا

**

 طاحونة الرهبان 

الطاحونة الوحيدة الباقية وتدار حجارتها بواسطة اندفاع المياه من عدة طواحين مماثلة كانت في بلدتي رشعين لا بل هي الوحيدة المتبقية في لبنان، كان يديرها المرحوم يوسف النشمي ولا اعلم ان كان والده من قبله لانها سميت بطاحونة النشمي ويوسف رحمه الله كان مشهورا بفلتان لسانه ولكنه كان ظريفا جدا والان وبعد وفاته تدير ابنته سعاد المطحنة بفرح ونشاط اطال الله بعمرها واعطاها الصحة والقوة.

تعبت الشمس وختيرو عليكي السنين

وبعدك صبيه بالقمح بترحّبي

وبعدو بفضلك مكتفي "لَكن" العجين

وكم جيل وجيل من خيرك رِبي

الخبز نعمه من السما للجايعين

ومن برغلك لمْجدَّره لمحبَّبه

ولذّة التبوله وقراص مْشَقّرين

وكـبّة الـنَّيه وكـبّة اللي مـكَبْـكَبه

يوسف النشمي كان عاحجارك امين

وطحّانك المهضوم رغم السبسبه

شواربو وقلبو متل لون الطحين

وبتنكرزو بتسمع جنازه مْرَتَّبه !..

يرحم ترابو وروح كل الميّتين

سيرتـو لليوم بـعـدا طـيّـبه

وتا بوابها بَعدو يضَلّو مشرّعين

وما يغمر مفاتيحها عتم الخبي

فتحت سعاد بوابها للوافدين

وبفضلها بعدا الحجار مشبشبه

**

توفيق زيدان

قصائد ذكريات من بلدتي رشعين نالت اعجاب العديد من متتبعي صفحتي لذلك احاول ان اعطي المزيد منها مع انني اجدها خاصة لان اشخاصها معروفين من ابناء البلدة فقط ، قصيدة اليوم اتناول فيها المرحوم عمي توفيق زيدان او توفيق عويس لان عائلتيْ عويس وزيدان هما في الاصل عائلة واحدة .

كنت في العاشرة عندما عاد عمي توفيق من الغربة وتبعته فيما بعد زوجته بدرا بعد خمسين عاما عاشها مغتربا في كوبا قبل ان ينتقل واولاده باموالهم الى فلوريدا قبيل نجاح ثورة فيديل كاسترو الذي امم كل ممتلكات المواطنين واموالهم . وكانت لتوفيق ارض واسعة جدا ورثها وعمل على استصلاحها وتشجيرها زيتون وكروم عنب وانواع اخرى وبعد وفاته قصد احد اولاده لبنان وباع الارض وافل عائدا.

كانو الفينيقيين بِ مركب زغير

يركبو مواج البحـور ويـرحَـلـو

للتجاره.. يحملو تـواب الحرير

وإشيا وإشيا.. من الغربه ينقـلـو

وهيك النحل بيغادر بواب القفير

من غيبتو بيعود ومحَمَّل حـلـو

تخمين بيي كان بَـعـدو بالسرير

لما ومعو "بَدرا"عا كوبا وَصَّلو

غاب لا يودي رسـاله ولا خبير

رجع من صَوبو تا عّـنّو نسألـو

توفَّق بكوبا صار اغنى من امير

مزارع كبيره تبحبحو وترَسملـو

ولما بكوبا دَقِّت الثوره النفير!..

شَمَّع الخيط وهَـرَب حَظّو حلـو

وعاد عا الضيعه مع المال الوفير

هاوي الارض بالارض مالو شَغّلو

ارض اللي عندو واسعه لكن عَفير

انهدّو حفافيها وسهولا تـبَهـدلـو !.

رَد الحفافي ونَضَّف سهول الهشير

ضَلّو سنه ونص الفعالة يشَـحّلـو

زَيتون شَجَّرها وزَرع إشيا كتير

ولمّا اشترى مهره بارضـو تْجَوّلو

كهل صار محردب وقـدّو قصير

بدّو حدا تا يطَلّعـو.. وتا يـنَـزّلـو

ومن بَعد عمر أمانتو رَدّا القدير

ولادو البلغربـه شَـقـيـقُن وَكّـلـو

واللي تْوَكَّل طلع ما عندو ضمير

وسماسره عالرزق نادو ودللو !..

ويوما نباع التبر بِ سعر الشعير

واللي أجا من البيع كان كلو إلو

صخور الشواطي.. ما بيزعجها الهدير

وهوّي ما همو لو الاخوة بيزعلو

زغار نحنا.. بس خالقنا كبير

عالرزق عا موال الدني لا تسألو

لمال الدني لا تكون عبد ولا اسير

يـامـا اسـامي عالـرزاق تْـبـدَّلـو

وبالاخره تحت التراب بينزلو

**

ابو لياس 

صديقي الاعز جورج حنا "ابو لياس" الذي نجاه الله من الذبحة القلبية التي تعرض لها وبسبب الحجر بنى في حديقة منزله مذبحا للعذراء مريم ليمارس وعائلته واجباته الدينية قدر المستطاع وانا من حجري المنزلي اصلي لتنتهي هذه الايام العصيبة وترتاح شعوب الارض من القاتل الخفي المرعب.

بكل الدني.. مين قال يا بو لياس

العالم ما فيهُن يحضرو القدّاس

قَلَّقِت هالكون جرثومه

متسَتّره بالمجهر بتنقاس

بتدخل الجسم وللفنا بتومي

وبإيد خَرسا بتقطع الانفاس

والناس منها كتير موهومه

ممنوع لا تلمس ولا تنباس

بكل الدني ما خَلِّت حكومه

ولا اماره راسها ما انداس

ما في بشر عالارض مدعومه

وطِّت لحد الارض اكبر راس

انضَلِّت بحصد الناس مغرومه

عا الارض يمكن ما تخَلّي ناس

وكل الدني بالحل مهمومه!..

تا يـقـتلـوها جرّبو اجـناس

و بعدُن ما وجدو حَل يا بو لياس

**

جميل الذاعوق

وحيدا كان ووحيدا عاش ومات رحمه الله، ليس له اخوة اواخوات ومن هم من آل الذاعوق في بلدتي كان يدَّعي انه ليس منهم. ورث جميل من والدته من آل زيدان منزلا وبستانين لكن جميل كان يحب السكن في كوخ بناه في بستانه القريب من مقابر البلدة ليبقى قريبا من بقرته "غزالة" وبعيدا عن الناس اذ كان له طبع خاص فإن جلس مجلسا فرأيه هو السديد وإلا يغادر غاضبا متهما كل من عارضه بالغباء. وفي البستان كان يطبخ وينفخ ويغسل ثيابه في الساقية وفيه يزرع مونته من التبغ اضافة الى الخضار الموسمية.

بالكوخ حد غزالتو مصيَّف جميل

عيشي ما طنّي بيحسدو عليها حدا

تيابو المنشوره على حبل الغسيل

ان مَرّ الحرامي حدّها.. ما بياخدا

علبتو من زمان " بندق بو فتيل "

دخانهـا مَرشوش بِ عطر الندى

والطنجره عا وصفـهـا الله وَكيـل

مطَعوَجي وراعي دوايرها الصدا

ان مَرّ واوي جايع وخصرو نِحيل

ما بيشتهي من طبخها وَجْـبِة غَـدا

عاش راضي بعيشتو حر السـبيـل

لكن ما مرّه عا حدا بعمرو اعتدى

وجار المقابر عا القبر شَد الرحيل

عـاف الدني وانلفّ بتراب الـردى

**

فراشه

صَوتِـك فراشه لَفِّـت الاربع فصول

العصفـور لَحَّـن والورد فَـتَّح خَجـول

همس الشتي وشوش شبابيكك حَكي

شو وشوَشو الشباك عم يرفض يقول

**

متل السنونو

لمّا غمزت الشمس ضحكتلي

والعاصفه جَنِّت.. وجَـوّي راق

هَلّأ عـرفت.. العاشـق المتلي

متل السـنونـو للفضا مشـتـاق

**

امين الدرجاني

من الجلسات الطريفة تلك التي كانت في العام 1976 اي في "حرب السنتين" عندما قصدت الوطن حاملا مساعدة مادية من ابناء بلدتي في استراليا الى ابناء رشعين في الوطن، وعدا المساعدة الجماعية حملت ما يزيد على ال40 الف دولارمن المغتربين الى ذويهم في قرى الشمال ومن بينها كانت رسالة الى ابن بلدتي نجيب المبيض رحمه الله الذي ابى الا ان يستضيفني الى عشاء في منزله دعا اليه صديقه الحميم امين الدرجاني الذي امضى معه وقتا ممتعا عندما كان مهاجرا في كوبا التي عاد منها كما غادر اي نظيف الجيب واليدين، وبعد كاسين من العرق البلدي بدأ الحوار الشيِّق وفُتِح دفتر ذكرياتهما في كوبا عن الاوقات الجميلة والسهرات الصاخبة مع جميلات كوبا في النوادي الليلية ، اما نجيب الذي لم تطل غربته اخبر بما يلي: قال موجها كلامه لامين عندما عدت وانت خير العارفين لم اكن اوفِّر الكثير هناك ، توافد اهل القرية للسلام والتهنئة بسلامة العودة وكنت اتعمد اطالة بقاء بعض الاصدقاء كي يغلب النعاس اعين والدتي التي كان بادٍ عليها الامتعاض لان في جعبتها الاسئلة التي لا ارغب بالاجابة عنها ولكنها بقيت ساهرة حتى ذهاب آخر الزائرين وسألت: كيف احوالك يا نجيب؟ فاجبتها لله الحمد صحتي جيدة وها قد عدت سالما لله الحمد ولكنها كررت السؤال موضحة عدت سالما احمد الله انما اسألك عن احوالك المادية اي ماذا تحمل معك من غربتك عندها قمت وفتحت شنتتي واخرجت منها صورا لي في البارات مع الحسناوات فاسرعت الى فرشتها متمتمه كلمات لم افهم اي منها، فضحكنا لتلك النادرة وجاء دور امين الذي بقي في كوبا الى ما بعد انتصار ثورة فيديل كاسترو وتاميم ممتلكات المواطنين لصالح الدولة، وككثيرين لم يبق مع امين ثمن تذكرة العودة فعاد على نفقة شقيقه المرحوم مرشد وسكن في منزل شقيقته امينة، اما قصته فرواها لنا كالاتي: لم يبعص كاسترو الا انا، اتذكر يا نجيب كرسي الحلاقة تلك التي كانت منذ ان كنت انت في كوبا؟ لم اغيرها وعندما اتوا للتاميم لم يجدوا سواها اما ملابسي لصغرها لا يستفيد منها سواي " كان امين رحمه الله قصير القامة ونحيل الجسم"، وكنت تعرفت الى امين سابقا وكنت اراه يوميا تقريبا بطقم وربطة عنق وكما اذكر كان يحب اجواء الفرح اللبنانية فكان يقصد حفلات الاعياد وسهرات الافراح مشاركا بالدبكة على قرع الطبل وصوت المزمار وكان " المطربي " الطبال يقصده كما الزمّار ظنا منهما انه مغترب سيبحبح لهما النقد اما هو فكان يتجاهلهما متظاهرا بانسجامه بالدبكة.

من بعد سفره طالت عليها السـنين

راجع بشنته وقصر قَـدّو وشَـيبتـو

ولولا ما مرشد يطلَع الخي المعين

ويرَجّعـو من المغتَرَب عا نَـفـقـتو

كان مات بالغربه وما عرفنا أمين

ولا بطَلّتو رجعِـت تهَنِّت ضَيعـتو

بشنتة تيابـو.. كم طَقم زغَـيّـريـن

وقمصان مَعها كم عقده لـرَقـبْـتـو

وكان يمشي غَندَره شمال ويميـن

مهفهف نضيف ومتل طقمو جيبتو

وتخمين للدبكات كان عندو حنين

الاعـياد كلاّ.. تْزيَّـنِت بِ دَبـكـتـو

الطبّال يركض ليه بين الحاضرين

لكن امين؟.. بقطن حاشي دَـينـتـو

يرجَع الطـبّال من عـنـدو حَـزيـن

وتطلَع الـزمّـار مـتـلو خَـيـبـتـو!..

سألت.. قالو: بغربتو كان الفطيـن

عيّيش عا الحلوين يصرف غَـلّـتـو

تعَلَّق بسَـمره كان اسما جـوزفـيـن

كانت كإنّأ حرمتو ومش حـرمـتـو

رَقَّصا من دون حًيا ولا وراق تين

تا حَـرمتو النعمه ومالـو حَـرمـتـو

ووَدَّع امين.. وعـاد للبيت الاميـن

بلا هم عاش.. وعا مزاجو عيشتو

الـروح مَـرجعهـا لـرَب العالـميـن

يـغـفـرلنا ويشمـل امين بـنـعـمـتـو

نـيّـالُن الـعـاشو بـحـيـاتُن قا نعيـن

واللي مْكَـبّـش بالـدني يا حَسـرتـو

يا ضيعتي.. اهلك بَرايـا طـيّـبـيـن

ورجال بِ وجّ الـعِـدا ما بـيخـبـتو

الله يـديمـك مَـرتـع اسـود العـريـن

وللوطن تبقي تـاج مَجـدو وهَـيبتـو

**

 دين ووفا 

طلَبت منها بَس بَوسِـه دَيـن

ردِّت: حبيبي بأمْـرَك تـلاته

من زربة البالبيت اسبوعين

مَحروق.. كيف برد ديناتي

يا عايشه بقلبي على الحالين

يا ريت لو طالع بديّاتي !..

بردُّن مع فوايد يا نور العين

وبرتاح من دَيني.. وآهاتي

شفتك مَعي بالحلم من يومين

جسمك عْرَبتو وزدت بَوساتي

وطرت بعد البَوس مدري لوين

وطفَّيت جَـمراتك.. وجَـمراتي

يا ريت صَح الحلم بين تنين

وكنتي على شرع الدني مراتي

يا ريت لولا كان من عَقدين

بيِّك حمايي.. وامِّـك حْماتي

**

عم يسأل التمثال

وين البشر مانهُن حواليي؟

انحبسو الاوادم والحراميه

وين اختفت حريّة الانسان

والفاخرو بتمثال حـريـه؟؟

الانسان صار بيحسد الغربان

وكـل طَـيـر.. بـكـل بَـريّـه

انسجنو الملوك تْبَهدلو التيجان

وزعما الدُوَل بالغرف مزويه

وينن كبار الارض والحيتان

صارو بهـالايّـام واويّـه

وين اللي كانو يرعبو البلدان

بـقـوّة قـنابلهُـن المدويّه؟؟

شيطان مخفي بالدني فلتان!..

عم يحصد الالاف يوميي

ازغَـر ما إنّـو يقشعـو عَـيّان

واخطر من قنابل الزريّه!..

تخميـن لازم نشكُـر الشيطان

الخَلّا العالـم بالـدني سويي

ها القد نمله زغَيّره.. وسجّان

ساطي.. ابو إيـديـن مخـفيّه

ما في حدا اقوى من الـديّـان

ما في قِوى من الشَّر محميّه

كل القوى بالكون وهـميّه

الـمَجـد.. للقـدره الالـهـيّـه

وتمثال.. مش اكتر الحريّه

**

سلام

في ناس.. روحك يطلبو لا تردّها

ورتت وفاها والشَّرَف عَن جدّها

وفي ناس لو صافحتها بقصد السلام

صابـيع إيـدَك الف مَـرّه عـدّهـا

**

فرشة ريش

يا رب.. حاجِتها بقى تطنيش

ناس نومتها عا فَـرشة ريش

وبتكب فضلات الاكل عالدرب

وناس عم تهلك تا فيها تعيش

**

شعرك

ما اجملو الشَّعـر الحلو الوهّاج

مْصَوَّر على كتافِك مواج مواج

بتاج الحلا بيتوّجـو ملكة جمال

وشَعرِك الاشقر كل شَعره بتاج

**

روزنامة

لولا الروزنامه وشَطِب لقلام

ما منعرف التاريخ والايام

شَبَح ما بينشاف تاركنا

عا القَلَق نصحا بحَبسنا ونّام

**

تشرين

قالو:على عمرك هَجَم تشرين

حاج تسرق وَرد من نيسان!..

وتـوزّعـو اشـعـار لـلـحلـوين

وقصايدك تحمل الف شـيطان

عا خاطرك.. بتْفَصِّل فساتين

وبتْفصِّل وبـتْلَـوِّن السـوتـيـان

وإيدَيك؟ ما بيحَرّمـو بسـاتين

بيتطاولو عالتوت.. والرمّان

و بتدوب وبتنْشَل يا مسكين

كل ما قْـبالَـك مَـرَق فسـتـان

اهل الشعر ما بيشبعو تخمين

بيضَل قَلبُن للعشق جوعـان؟

جاوبت:من ها الناحيه محقّين

ما بيشبه الشاعر ولا انسـان!

صـرت من سنتين بالسبـعيـن

وبَعدُن عيوني ملعَب الغزلان

بتردّني غَمزه لابـن عشريـن

وبسكر بلا خمره وبلا فنجان

بدَينتي هَـمس المَرا تلاحيـن

بيرد تشرين العمر.. نـيسـان

**

دعوة عشا

في بداية لقاءاتنا كنا نخشى ان تنكشف علاقتنا للاخرين ، دعتني يوما الى عشاء بحضور صديقة لها تدعى " باسمه " فكتبت لها بعد اللقاء:

عني شو قالت باسمه؟.. وهيي؟

قَولك اشتَلقِت على الخبريه؟

والله عملت جهدي انا.. وصفَّيت

اتجاهلك.. خمسين بالميّه

لكن الدغري؟ ما قدرت هدَّيت

خفقات قلبي.. وشَرد عينيّي

لساني تِقِل وَقتا بشو ما حْكَيت

وتقلِت معو حَرْكات إيدَيّي

اكتر ما فيي لَيلتا تعشَّيت

تا تبيِّن الدعوه طبيعيّه..

لكن بقلبي قلِّك.. وصلَّيت

كل لقمه كلتيا هنيّه

ممكن اشتلقت باسمه.. يا ريت!..

بعيونها ما تطلَّعِت فيي

بس.. لوما تطلَّعِت.. حسَّيت

انّا زكيّه.. اشتلقت عليي

اشتَلقِت بقلبي في عندك بَيت

وقريت نبأ حبّك.. بعينيي

**

حلم 

شـفـتِـك طلوع الفّـجـر ببنامي

حلم.. رَجَّع عِزّ ايّامي

غمَّضت عينيي وتا ارجع نام

متل الطفل غلَّيت بحرامي

تمنَّيت اغفى وترجع الاحلام

ويرجَع حبيب العمر قدّامي

بَعدِك متل مانِّك باحلى قْوام

بذات الجمال.. وبَعدها الشامه

مْحَلّها.. وسمعت احلى كلام

من تِمّ.. ريتو يقبر عضامي

النوم طار.. الحلم؟ طَير حْمام

بَيعَد.. ودَشَّرني بِ أوهامي

راجِع بحَسره غابر الايام!..

وقَطف الورد والزنبق النامي

شو رَجَّعِـك ليي بعـد اعـوام

ترشرشي ملح بجرح دامي؟

" الماضي بذاكرة البشر افلام

والعمر راكض متل لحرامي"

**

وبَعدِك وَجَع قلبي

كنتي.. فَرَح قلبي ووَجَع قَـلبي

وكنتي حرير وشَوك عا دربي

تْهَنّي عيوني.. تْطَوّفيها دموع

وبَعدك حياتي ورجوتي وحُبي

اعـبَـدِك انـتـي.. بَـعـد يسوع!..

اسمَحلي فٍيا.. معليش يا ربّـي

وصرتي مَعي!.. وما تْغَيَّر الموضوع

بشتاق ليكي.. وعايشه بقربي

لولا لمَحِت فستانِـك المَنشور

بـوقَـف وبـتخـايـلو عْـلَـيـكـي

ولو مرقِت من حد مرج زهور

حـب نَـتّـرهُـن.. حَـوالَـيـكـي

كل انسا بتدْهَن عا جسما عطور

وبيلبسو جْواهِـر.. متل دَيـكـي

لا عطر طاب ولا دهَب مشكور

حتى الكحل احلى عا عينيكي

5

من لحظة الشفتك انا؟ مَسحور

ولـحِـدّ هلّأ.. بَـعـدنـي هَـيْـكـي

جرَّبت ابعَد خَلف سبع بحور!..

اكـتَر حَـنـيـني شَـدّنـي لَـيـكـي

**

تمثال كورونا

" كورونا " كما تَصَورها صديقي النحات الشهير توفيق مراد ونفذها ببراعته وازميله الرائع، ستزول كورونا عاجلا ام آجلا باذن الله، وكلنا الى زوال من هذه الدنيا ولكن منحوتة corona 2020 ستبقى تذكِّر الاجيال القادمة عن كارثة مؤرخة حلت بالبشرية ووباء اجتاح الكرة الارضية وحصد ارواح الاف البشر.

ها "الكورونا" العامله زلزال

بتزول.. لو مهما زمانا طال

والكَـون باقي.. ما بـيـتهالَـك

وكلّنا لـلمَـوت.. ما في مْجال

يا تـوفـيـق.. بفضل اعـمالَـك

وزْميل بيخَلّي الخشب اشكال

بـيـضَل للـتاريـخ تـمثـالَـك..

عن "كورونا" يْخَبِّر الاجيال

واسمك بيضَل مرافق التمثال

**

 بيتها

بتذكر يا"دوري" بيت عالمفرَق

حيطان بَـيـضا ومَدخلو ازرَق؟

انت تتنَقَّل على القرميد..

وقلبي انا الـمَغروم.. يـتحَـرَّق؟

تكرج عا سَطحُن متل ما بتريد

وعشقان.. متل اللص يـتْسَـرَّق

عيونو على شبّاكها ما تحيد

ويْـجِـن قـلبـو كل ما تـمـرَق

ومن كتر شَوقو.. يبرد ويعرَق؟

من بَـعـد طول غْـياب خَـبّـرها

بَـعدني بالـبال ناطـرها!..

عشق الصبا؟ ما بينمحي من البال

مهما سنين الـبُعد صارو طوال

هْجَرت وما كان القلب يهجرها

دَخلَـك لا تنسى.. هَيك خَـبَـرها

**

من الذاكرة

في قريتي كانت تعيش سيدة {اتحفظ عن ذكر اسمها} لا اعرف اصولها ولا من اين اتت ولم يكن لها لا عائلة ولا اقرباء، تعيش في بيت صغير اقرب الى قبو منه الى منزل للسكن، وكانت رحمها الله سليطة اللسان بالشتائم والدعوات المؤلمة ونبش قبور من تعتقده اساء اليها بتصرف او زلة لسان وما زلت اذكرها كالتالي.

ببيت عا شكل "القبو" عنوانها

رجّال ما عندا ولا عندا صديق

ورَغـم هَيدا.. "عَنتره" بميدانها

عا خصوما لسانها قاطع طريق

الله يْـنَجّـي مـن سـهام لسـانها!..

للشتيمه ودَعـيهـا الجارح طليق

دعـوات.. تبقى مشَكّله الـوانـها

كل امراض الدني ومَوْت الحريق

بـتـشـمـل الـعَـيله كـلـها بـعـدوانها

الـمَـوتى من مسباتها بترجَع تفيق

كل الـغَـلِـط معها.. البكلـمه هانها

ممنوع يمرَق عا درب بيتا العتيق

يا ما عا صَوتا نَيَّـمِـت جـيـرانهـا

ويما عا صوتا كل حارتها تـفـيـق

**

تقلا

كانت المرحومه تقلا زوجة المرحوم بدوي رومانوس البايع تعمل الى جانب زوجها في زراعة الخضار وتهتم ببيع بعضها من كوخ صغير كان دكانها، اما الميزان فكان من قفتين موصولتين بحبال رفيعة الى خشبة تتوسطها ربطة وجانبا بعض الحجارة الملساء تستعملها كأوزان ، وكنا نقصدها لشراء الخضار الموسمية كاللوبيا والبندورة والباذنجان الى اخره، وكانت تقلا قصيرة القامة محنيّة الظهر حديثها شيِّق لا يخلو من النكات المهضومة.

كنت في السادسة من عمري عندما ارسلتني والدتي يوما لا بتاع لها باذنجان واوصتني القول لتقلا بان يكونوا قياسا وسطا فنقلت لها كلام والدتي فاعطتني طلبي وقالت: قل الى والدتك هذا باذنجان " شَي القاضي" وبعودتي قلت لامي ما قالته لي تقلا فاحمر وجه امّي غضبا واوشكت ان تضربني فقلت لها ماذا فعلت هذا طلبك وهذا ما قالته لي تقلا فضحكت ودعتني للانصراف . علمت فيما بعد ان تقلا كانت تقصد " بشَي القاضي " عضوه الذكوري، رحم الله والدتي وتقلا وكل الذين سبقونا في الرحيل.

بظلال زعروره على جنب الغدير

كوخ " تقلا البايع " ودكّانها

وتكوِّم الخضره على شقفة حصير

نْقَطفِت طَريّه اليوم من بستانها

وميزانها اللي صَرَّف مواسم كتير

رفيق الصِّبا من عمرها ميزانها

وحدّو حجاره.. من زغيرا للكبير

وحدا اللي كانت حافظه اوزانها

يرحَم ترابا.. بذكرا بقَـدّا القَصير

وضَهرا المحني من الشقا بزْمانها

ورَغم التعب كان وجّها ابيض منير

وتضل نكتتها عا راس لسانها

والكل كانـو يعشَقـو ديـوانـهـا

**

 ناطور الرهبان

كان المرحوم ديب سيسوق مزارعا نشيطا وناطورا صارما لاملاك الرهبنة اللبنانية ، وكانت معظم بساتين بلدتي رشعين حينها تابعة للرهبنة وكان معظمها بساتين مشجرة بالتوت لاطعام دودة الحرير فالرهبنة تؤمّن بيض الشرانق والشركاء يهتمون بها الى حين موعد القطاف لتباع وتأخذ الرهبنة نسبة مئوية من الارباح ، وكان للرهبنة عندنا بساتين اخرى مشَجَّرة حمضيات وغيرها من الاشجار المثمرة تعود ارباح محاصيلها بالكامل للرهبنة وكان ديب الناطور الوحيد لكل تلك الاملاك وكان على خصومة دائمة معنا نحن الصبيان المتراوحة اعمارنا ما بين ثماني الى خمسة عشر عاما لان الرمان المتدلّي وخاصة من الاشجار القريبة من السياج كان يغوينا فتمتد ايادينا الى الرزق الحرام. وديب الذي كان يعتبرها تحدِّ له يغضب ويعلن الحرب مهددا باشد العقوبات وكنا نهابه ونتحاشى المرور حيث يكون لئلا نعلق بين يديه.

بتشبه خبار الكان.. يما كان

خبار الطفولة العشتها بلبنان

بالبال ذكرا وبالقلب محفور

واللي انحفَر.. اقوى النسيان

ديب يبقى بالحـزم مَـشـهـور

ما بذكر ولا نهار سـنّـو بـان

تخمين هيكي عَبسة الناطـور

تا يضَل فيها راعب الصبيان

قََـبـل ما يـلَـوِّح الفـَجر بـنور

يسْبَـق الفلاّحين.. والرعـيان

يبَكِّر تا يعمِل برمتو الناطور

ارزاق الله.. عندُن الـرهـبان

يزِل عَقلو.. لَو لَمَح مَعـبـور

مفتوح بسياجات شي بسـتان

ولاّ شي شجرة شَكلها مَنبور

عليها تعـدّالو صَبي جـهـلان

وصيّاد ابقى لاحق العصفور

لا عا سياج ولا رزق سئلان

لحمة العصفور اشهى فطور

بموت وما بنسى طعمة التيان

ياما اشتكى لبيي وحَكَمني زور

وما يشفَع النكران والحـلفـان

وتا ديب يرجَع خاطرو مَجبور

قـدّام عَـينـو.. آكِـل العـدّان!..

واوقات مع صبيان جيلي دور

الرمّان يغري ويلعَب الشيطان

دبوغ العا دَيْنا تفضَح المستور

ويبفى جزا السرقه بَدَن حرزان

صابيع دَينا مْدَبّغه عْـمـرمـور

عمَرمورها من قشرة الرمّـان

تهمه؟ ما بـدّا شهادة المأمـور

ويدبغ قفانا.. بلدعة الـقضبان

لمْحَضَّره من شجرة الرمان

يلعَن ابو دبوغَك.. يا هالرمان

**

ابو جميلة

بداية اود ان انوه بانني بكتابة ذكريات طفولتي لا اقصد الاساءة الى اي من اهلي في بلدتي فانا احبهم جميعا واكتب عنهم بدافع المحبة والذكرى وليس النقد السلبي ، اكتب عن ابناء بلدتي لان طفولتي ومطلع شبابي كانا بينهم انا الذي تركت لبنان تقريبا من المدرسة الى استراليا منذ ما يزيد على 51 عاما ويلاحظ القارئ ان معظم الذين اكتب عنهم قد سبقونا الى دنيا الخلود رحم الله جميعهم لان هجرتي قديمة.

اكتب اليوم عن "ابو جميلة" المرحوم زوج عمتي مرعي البايع، وكنت قد كتبت عن المرحومين، عمي المختار حليم عويس والناطور ديب سيسوق والمرحومة تقلا البايع وسواهم وسوف اكتب المزيد من ذكرياتي التي سيتضمنها ديواني القادم ان شاء الله.

مرعي البايع رحمه الله اخذ عن والدته الروح الحلوة المرحة واسلوبه في طرح النكات ومعالجة القضايا باسلوب مَرِح ، كان في وسط بستانه شجرة ليمون يوسفي اي "ماندارين"

لاحظ انها تّنهَب بشكل يومي حتى قبل ان تنضج ، وبما ان الليمون موسما شتويا عمد الى مراقبة خطى المعتدي فتبين له ان القادم من جهة منزل شقيقه بطرس الذي يقع في البستان القريب من بستانه فأخذ مقاس الدعسة المطبوعة في الوحول بقصبة وعاد الى باحة منزله.

نادى احد ابناء شقيقه بطرس طالبا منه احضار جميع اخوته لان الاعياد قريبة "الميلاد ورأس السنة" وهو سيقصد طرابلس وقرر ان يبتاع لكل منهم حذاء كهدية للاعياد فهرع ونادى الاشقاء ناقلا لهم الخبر السار وخضع الجميع لعملية اخذ مقاس الارجل ليجلب لهم احذية على المقاس الصحيح وكان في كل مرة يقارن بين المقاس الجديد والمقاس الذي اخذه من البستان الى ان وصل الى المعتدي على شجرة "الماندارين" وحاكمه على طريقته.

مرعي شاف انْمَدِّت أيد

عا طعم " الافنديّه"

والسارق عادا من جديد

من دعساتو الطريّه

من ولاد خيّو بالتأكيد

الجريمه مش مخفيّه

نادى الكل بلا تحديد

وتظاهر بالحنيّه

وقلُّن بكرا جايي العيد

و هالمَرّه ندر عليي

لَبّسكُن عا حسابي جديد

من سوق الكندرجيّه

لكن قَبل البيع بريد

قياس جرَيكُن.. ما فيي

هَيدا ينقَص هيدا يزيد

بدّي الشَّده العيديّه

الحلوة ومودالا فَريد

تظبط ميّه بالميّه

وجاب الخَيط وصار يقيس

وبسمه بوجّو مهضومه

لغنطوس وحنا وسركيس

وباقي العيله الموهومه

حتى الحرامي التعيس

علق بإيد الحكومه !..

الله يلعن بَي بليس

من هالخطّه المرسومه

وتا يكون لغَيرو تدريس

متيله كبيره ومعلومه

وتا حكم القاضي ما يخيس

إكل القتله.. مَفهومه

بقشاطو والتاسومه

وقلو: يا ابن خَيي

ان كان السرقه بتعيد

وبتزور " الافنديّه"

الك في عندي مواعيد

باكبر من هيك هديّه

تلبق للحراميه

**

بو محمود

من اعالي الضنيّه شمال لبنان جاء ابو محمود وسكن منزلا في بلدتي ملك اغوات الضنيه ومعه زوجته وابنته فاطمة وولده محمود الذي كان من عمري تقريبا، وابو محمود الذي احضره أحمد آغا ليكون ناطورا على املاكه المشجرة بالزيتون كان رجلا طيبا هنيا محبا لذلك ربح محبة جيرانه ومن ثم كل ابناء البلدة، اما نحن اولاد الست سبع اعوام فسرعان ما ارتبطنا مع محمود بعلاقة صداقة يشاركنا اللعب و يشاركنا فرحة الاعياد المسيحبة كما نشاركه نحن افراح اعيادهم كل سنة الى ان شب محمود وتعلم مهنة الخياطة وباشر العمل في محل له في سوق الخياطين في مدينة طرابلس وكنا نحن رفاقه نقصده ليخيط لنا بذلاتنا والبناطل الى ان هاجرت الى استراليا، اما ابو محمود الذي عمل ناطورا كثيرا ما كان يشاهدنا في الزيتون نملئ علبة سردين بحب الزيتون لنحملها الى دكان " ابو حنا " ونبدلها بتلات او اربع حبات من "الكراميل" اي المعلل وكان يغض النظر ولا يعتبرها سرقة لان املاك الآغا واسعة جدا وعلبة السردين لن تؤثر على المحاصيل الوفيرة، اسناء غيابي مات ابو محمود رحمه الله وتزوج محمود وسكن في منطقة - ابي سمرا - التابعة لمدينة طرابلس وبقيت ازوره كلما زرت لبنان الى ان وجدت يوما سواه في المحل واخبرني ان محمود فارق على اثر انفجار في الرأس منذ ثلاثة اشهر فحزنت لوفاته، رحم الله محمود وابو محمود واطال باعماركم.

كنا ولاد السّـت سَـبع سـنـيـن

وساحة الضيعه كلّها حجران

نلعب سوى العاب مَعـروفين

الكلّه، الغمَّيضه وسبَق ميدان

رايح وجايي.. نعمل مياديـن

ما نتعب وتبقا القصبه حصان

وعا اسامي فِـرَق مَشهوريـن

نلعب الطابه.. نقسم الصبيان

بالصيف يغرينا العنب والتين

العالسطوح.. وتينة الجـيـران

ومرّات نغزي كَرم عـزالدين

واحمد يشَولِف خلفنا الشقفان

نتفَرّق.. وبـهـروبـنا شياطين

تا نلَبّكو.. وما يعرف العنوان

وبموسم الزيتون.. بكوانـيـن

تا يسرقـو.. يستقربو العجّان

وعدّة السرقه علبة السرديـن

الفارغه.. ورسمالها المليان؟

اربع خمس حبّات معدوديـن

مْعَلّل.. تا نتحلّى من الـدكّان

وناطور الله يرحمو مسكـيـن!.

يقَدِّر ظروف الطفل والحرمان

ان شافنا شي نهار ملهـيـيـن..

باللَّم تا يصير الـتَـنَـك طفحان؟

يغض النَّظَر ما يقول انتو مين

سرقة ولّـد..ما بتفقر السلطان

الآغا في عندو رزاق حرزانين

وعا هيك سرقة ما حدا سئلان

خَلّي ولاد الحَي فـرحـانـيـن..

وما بتحرز الزعله مع الجيران

يـرحَم ترابك يا "ابـو محمود"

ناطور طَيِّب.. كنت تـفـهَـمـنا

كَيل الحرامي المتلنا.. محدود

من أكل لـمْعَلَّـل ما تـحـرمـنـا

كنت.. من كل البشر مَـحمـود

دروس الوفا.. مـنَّـك تـعـلَّمـنـا

**

شمعه

الموت.. عا شَكل الهوا مخفي

ما منقشعو ولو جَنِّت السرعه

متل الحـرامي عـمارنا بيطفي

ان هَبِّت الريح بتنطفي الشَمعه

**

تمثال

صرتي متل تمثال من جفصين

من كتر ما رسَمتي ولوَّنتي

بَعد الرسم والدَّهن والتلوين

اللي خَلَّفِك ما بيَعرفِـك انتي

**

تجميل

والله صرنا بـهـا الايّـام

من التجميل ومَسخِرتو

اللي مَرتو بتعمل حمّام

وتطلَع ما بيعرِف مَرتو

**

مشتاق

علوّاه.. عا بـاقِـة "قرصعنّي"

وسليـق "كرّات وحرتنمَنّي"

فراريج مشويّه.. ولحم خاروف

أضعاف.. بعطيكم بَدَل مِنّي

ايام كان الفقر احلى ظروف

حلوه الدني ومع فقرنا نْغَنّي

الكشك ترويقه الغدا ملفوف

ورشتا العشا نعمه من الجنّه

وشغل إمّي بس كنزة صوف

بفصل الشتي تـرِد البرد عَنّي

الما لحَّقِت ردلّها الـمَـعـروف

العطيِت حَـنانا من عَـدا مـنّـه

يا عيشة الضيعه إلك مَلهوف

بهاك البساطه.. عيش متهَنّي

زاد التطور والهنا مَخطـوف

البيفَكِّر بها الكَـون مـتأنّـي!..

كلّنا.. عا هالبسـيطه ضيـوف

نـيّال هـلّي بعيشتـو قـنـعـان

وغير للسما.. نفسو ما بيدَنّي

**

لطفها

عَـلَّـق احَـد اصدقـائـي على ما كَـتـبـت عن صرعـات الـعَـصر والافـراط

في التبرُّج عند بعض الـنساء قائلا: زدتها فارحمهن كي لا يحقـدن عـليـك

وانت المعروف بشاعر الغزل الاول له اقول: انا لست ضد الكحلة واحمر

الشفاه والخدود وتصفيف الشعر ابدا انما لست مع التقليد وتغـيير الملامح

عـند بعضهن الى حد التشابه الـتام!.

قَـلّي رفـيـقي: لَطّـفـهـا

نازل بالحلـويـن سْـهـام

احترم الحلوه ولاطـفـها

تـا عا شعرك ما تـنـلام

بكلمه الحـلـوه وصِفْـهـا

جاوبـتو: وصلـنـا لايّـام

نَـفخ خدود ونَـفـخ تْـمام

وحشوه من خَلف وقدّام

وذات الـهـيـئه والهـندام

صرنـا مـننتظـر المـدام

تـا تحكـيـلا جَـوز كْلام

تـا من صَوتـا نَـعـرفـهـا

**

من ذكريات الطفولة

من ذكريات الطفولة اذكر اليوم المرحوم طنوس سعد هدلا الذي كان طويل القامة نحيلها ومن القلائل في بلدتي يلبس الافرنجي اي" بنطلون " اذ ان الشروال العربي كان لباس معظم رجال قريتي وكان يعتمر طربوشا احمر اللون وكان اكثر الرجال تغطي رؤوسهم اللبادة او الطاقية ولا اعلم اذا كان الطربوش لابناء العائلات الميسورة ام لتمييز طبقي، اما مهنة "ابو سعد" فكانت السكافة اي صنع الاحذية وكان مشهورا بصناعة البوط المتين وكانوا يسمونه "لستيك" لا اعلم من اين اتت تلك التسمية واللستيك او البوط نسميه اليوم "رنجر" ولمتانة شغله كان معظم زبائنه من قرى الجبل حيث طبيعة الارض الوعرة و الطرقات ليست معبدة و طبيعة اعمالهم القاسيه تتطلب احذية متينة ولا ابالغ ان قلت بان لستيك ابو سعد كان يزن ما يزيد على الكيلوغرام الواحد، وكانت بلدتي من بين القرى التي لم تعرف طرقاتها الاسفلت بعد، اما مشغل ابو سعد فكان مجهزا بماكينة لدرز الجلد بعد ان يفصّله على المقاس خلافا لغيره من اصحاب نفس المهنة عندنا الذين كانوا يقصدون مدينة طرابلس لدرز جلود الاحزية اما والدي رحمه الله كان يرغبنا بحذاء شغل ابو سعد لانه متين وضيان وجميل ، والضيان كان بالنسبة لوالدي اهم ما في الموضوع وغالبا ما كان لدى ابو سعد فضلات من الجلد بالامكان وصلها لصناعة حذائي ويوفر على والدي بكلفة الحذاء وتكون تلك الفضلات من البني و الاسود فيكون الحذاء بلونين ويقول لي رحمه الله ساصنع لك لستيك بلونين وكنت افرح لذلك وكان لشدة فرحتي به يبات الى جانب فراشي قبل الاستعمال، والحقيقة تقال ان ذلك الحذاء بالرغم من وعورة الطرقات ورفس الحجارة والحصى كان يضيق على ارجلنا قبل ان ينتهي عمره رحم الله ابو سعد ورحم والدي وتلك الايام الجميلة.

عا العيد مَعروفه.. إلي شَدّه

وبَدله من السّوق وفَرد فَلّين

ونص ليره نكل من جدّي!..

وتياب خَرج العيد منجابين

للبَي؟ ما في قََـول: ما بـدّي

الطاعه صِفَه لولاد مرضيين

وبيي اللي بدّو عملتو تْقَدّي

الليرات للاعـيـاد مَعدودين

خَيي وانا.. للعـيـد من مـدّه

بتيابنا والعاب مَـوعـوديـن

والحلو الطَيِّب ناطره المعده

وامّي واختي بـدُّن فسـاتين

والفقر وَقـتا عالبشَـر شِـدّه

واللي في عندو عيال الله يعين

وجوه الاهل عالعَوز مسوَدّه

ورغم الفقر والعوز قنعانين

بمشغل بو سَعد مْجَهّز العدّه

عالعيد حَشرة شغل منتظرين

لشَدّه جديده ان كنت جَدّي؟

بدَّك توَصّي باول تـشاريـن

وخيي وانا عا ذات لمْخَدّه

ليلة العـيـد نـبات قلقانين!..

وبكّير نـوعى وكلّنا موَدّه

لاهلنا.. ولتيابنا الحلويـن

البس وامشي ما حدا قَدّي

تياب العليي جداد مكويين

ومتل الشباب مزَيَّن بفَردي

مين فيه يـدق فـيي.. مين؟

ورنجر ما فيها تشقّفو مهَدّه

يمكن شي كيلو وقتها بيزين

بدَّك جهد.. تا تشقل الفَرده

ولو ما جرَينا بيكبرو تخمين

البوط اللي كنّا نلبسـو مـدّه

كـان طـول العـمـر بـيهَـدّي

**

زلمة حنا

كان حنا بطرس البايع ابن عمتي منتهى الذي توفاه الله في غربته في استراليا اواخر العام 2019 يكبرني قرابة العشر سنوات وكان رحمه الله مقربا مني منذ نعومة اظافري حتى مماته وبفضله كانت هجرتي الى استراليا بعد عام على وجوده فيها، اما حنا فكان فتى شقيا مشاغبا وكما يقال عنتر زمانه في البلدة اما انا فكنت ارى فيه بطلا لا يقهر وكنت تقريبا في السادسة من عمري عندما اختارني لان اكون زلمته الخاص، وكان في ذلك الزمن يزورنا زعماء ومشايخ واغوات ولكل منهم ازلامه وكان اهالي القرى يعاملون زلمة الشيخ باحترام وهيبة وخشية في آن.

فراقت لي الفكرة وقبلت العرض دون مراجعة احد فقصد حنا مدينة طرابلس وابتاع لي خيزرانة لها دبوس اسود من رأسها وشراريب ملونة من الجهة الاخرى وقلنوسة من الصوف تعلوها ما يشبه الطابة من الصوف وكانت باللونين الابيض والازرق وسلّمني العدة قائلا: من الان وصاعدا انت زلمتي فانا الى جانبك على الدوام فلبست القبعة وحملت السلاح والى جانب الشيخ حنا تنقلت على طرقات الضيعة معتزا شامخا وكان شهر ايار اي الشهر المريمي حيث تقام صلاة مسائية في كنيسة البلدة طوال الشهر الفضيل وكان الاهالي عادة يتجمعون قبل موعد الصلاة في باحة الكنيسة، الرجال الى جهة والصبايا الى جهة اخرى وقد تكون احداهن قد رفضت طلبا ما لحنا فأشار اليها قائلا: اذهب واضربها بالخيزرانة على مؤخرتها واهرب ففعلت دون اي تردد ولم اكن لاعلم ان ضرب الخيزرانة موجعا الى ان ذقته لاحقا من والدي جزاء لفعلتي الشنيعة ، صرخت الصبية باعلى صوتها وحصلت ضجة كبرى بسبب العمل المشين فتواريت فارا من وجه العدالة حتى المساء وفي البيت كان والدي بانتظاري وبوشر التحقيق بالجريمة، من دفعني لفعل ذلك؟ من اين جئت بالخيزرانة؟ واين هي الان وبنتيجة الاستجواب حصل المحقق العدلي على ملابسات الجريمة كاملة وصادر سلاحي الذي لقنني به درسا لن انساه ووعدني بحساب اكبر وبنفس الخيزرانة ان فعلت اية خطيئة ما بعد اليوم محذرا من السير على خطى حنا، بعد سنوات قليلة سافر حنا مع مجموعة من شباب البلدة الى الكويت لكن حنا المعتاد على المشاكل فقضى في المخافر اياما اكتر من خارجها الى ان عاد الى لبنان كما ذهب، وبقي الى اواخر ستينات القرن الماضي و هاجر الى استراليا وتخلى عن سلوكه السابقة وبقي مقربا مني يزورني يوميا ونسترجع الماضي الجميل الى ان غيبه القدر اثر التهاب رئوي لم يمهله اسابيع، رحمات الله عليك نسيبي وصديقي الغالي.

آه يا هالعمر.. لو فيني!!

رَجِّع لعمر الولدنه سنيني

العب وامرَح مع ولاد الجار

وغير اللعب ما كان يلهيني

بنقَيفة المغَّيط كنا زغار

نتصَيَّد عصافير بالتينه

وعصفور واحد.. لو اصطدنا نهار

نعَلّقو عا خصرنا زينه

ونشكل النّقَيفه على الزنار

متل الكإنا سلاح مرتيني

وللنبع يبقى ابعد المشوار

قبل السفر إمّي توَصّيني:

لا تقرب من النهر والمهوار

وتسأل القديسين تحميني

وبنص شهر المريمي بأيّار

حب "حـنا " شغل يعطيني:

ولا تخاف مهما زادت الاخطار

حدَّك انا الواجب يبدعيني

لا تخاف انت الفارس المغوار

بكرا المسا يا رفيق لاقيني

وقبل الصلا وكنو الصبايا كتار

وناطر عا نار الشيخ يهديني

سلاحي واتزلم متل لكبار

وشو ما عملت شيخي بيغَطّيني

وبخيزرانه لَطعتا من نار

صار عا حلوه يدَلّيني!

وقلّي قصدها وعا قفاها نقار

ومتل الغزال هروب عالهينه

البنت صَرخِت.. ول ضربها طار

عا الهَرَب ياجْرَين عينيني

والبلبله زادِت وصار الفار

يرجف قَصَب من خَلف تصوينه

ضَرب الصبيّه عا قفاها عار

عَمله شنيعه.. المشكله تخينه

شو هالمصيبه الما لها دبّار

ما في حدا من الجرم يعفيني

باول العتمه رجعت عالدار

غير بيتي ما بيئويني

وبيي بهاك الخيزرانه صار

عا قفايي بنار يكويني

وحَذَّر اذا بمشي مع الاشرار

بهالخَيزرانه رَح يرَبّيني

**

صياد

لشدة ولعي بالصيد في طفولتي كنت اقصد بستان مرشد لحود عبود لاستمتع برؤية صيادي العصافير هناك اذ كان بالقرب من منزله شجرة توت شامي يسمى سلطاني يستوي قبل كل انواع التوت ولم يكن هناك سواها في المنطقة لذلك تتوافد اليها العصافير الجائعة والعديد ممن لهم هواية الصيد المرغوب بهم من "ابو الخوري" اي مرشد الى ان تعلمت التصويب الى الهدف ورحت ارجو كل صياد ان يسمَـح لي بطلقة على عصفـور وكنت في اكثر المـرّات انجَـح في اصابة الهدف فلاحظ المرحوم مرشد ذلك فاصبح كل يوم يعطيني بندقيته بعد ان علمني كيف احشوها ومقادير الخردق والبارود وحجم الورقة للفصل بين البارود والخردق وفوق الخردق كي لا يسقط من فوهة البندقية وصرت كل صباح قبل الذهاب الى المدرسة امر ببيت مرشد اصطاد له بضعة عصافير الى ان علم والدي وخوفا عليّ اشـترى لي بندقية ضَغط وكنا نسميها "ام حبّة" فتمرنت على التصويب بها جيدا الى درجة اصبح فيها{ كل ضرب بعصفور} وكان مرشد يحرِّم على سواي من الاولاد الصيد في الشامية لانه اولا كان يأخذ حصته من الطرائد وثانيا لان سلاحي لا يضر لا في ثمار التوت التي كان يبيعها في سوق الخضار ولا في الغصون ولان همّي الوحيد هو الصيد كنت احرص ان لا التهي بأكل التوت ككثيرين، اما مرشد فكان رجلا طويل القامة بدينها حسن الطلعة يزين وجهه شاربين يزيدان من هيبته، وكان ايام الاحاد وفي المناسبات اوعندما يقصد المدينة يلبس طَربوشه الاحمر و جاكيتا بقبة مخملية وشروالا جديدا فيبدو كأنه شيخا لا بل اشبه بالامراء الذين كنا نرى صورهم في كتب التاريخ.

اما هوايته فكانت المراهنة على الاحصنة يشاركه بذلك صديقه الحميم سليم موسى البايع الذي كان يمتلك شاحنة لنقل المحاصيل الزراعية من بلدتي الى سوق الخضار في طرابلس ويحمل معه من المدينة اسبوعيا جريدة صغيرة الحجم فيها اسماء الخيول المتبارية واسماء الخيالة " الجوكي" وكل المعلومات المتعلقة بهذا الموضوع ،وفي ذلك الوقت في القرى اللبنانية كان الناس يعتبرون المراهنة من المحرمات ولكن عندما وصلت استراليا وجدتها من صميم تراث هذه البلاد ومن العادات الطبيعية المحترمة وفي يوم كأس ملبورن لسباق الخيول المميزة تتوقف الاعمال في جميع المكاتب والمصانع ليتسنى للجميع متابعة مباراة السباق وفي لبنان يجري السباق يوما واحدا في الاسبوع اما هنا في استراليا فكل يوم وفي كل ولاية ومكاتب المراهنة منتشرة في كل القرى وامكنة عدة من شوارع المدينة وعلاوة على سباق الخيول هناك ايضا سباق الكلاب ونسبة المراهنة مرتفعة جدا بين سكان استراليا.

بالعودة الى المرحومين سليم البايع ومرشد لحود اللذين كانا يدخنان "الاركيلة" بالتنباك العجمي الاصلي في ظل تلك الصنوبرة امام منزل مرشد يتصفحان باهتمام زائد جريدة السباق ويختارون منها من بظنهما سيكون الرابح في كل شوط من بين الخيول وكان المرحوم الخوري انطون يرقبهما بامتعاض . ومن مرشد وسليم انتقلت عدوى هواية المراهنة في قريتي الى ابو اسبر وكامل وبطرس وكليم رحم الله جميعهم .

عا نفَس" اركيله" بفَي صنوبره

مجتمع مرشـد مع رفيقـو سليم

وداير حديث الوشوشه والهمدره

لكن الخوري مشتلق مانو غشيم

معهُـم جَـريـدة بالـقياس زْغَـيّـره

فيها اسامي "باشق وجنح النسيم

وسبع الفلا ونجمة الصبح وعَـنتره

وشهبا وريم البادية وسلوى وتميم"

وبعد البحث بين بعضهم والمشورة

انكتبت اسامي بْخَط واضح مستقيم

حطّها مرشـد بـقـلب الـتـذكره

وضبّها بجياب شروالو القديم

وما دام تعـلـيـمة السبت مْسَـوكره

حصان ابجر راكبو جوكي عظيم

رح بـيـنـقـلّـو عَـنا كَـم مَـسْـطَـره

لبو اسبر لكامل لبطرس ول كَليم

ما اجملا هاك السنـيـن الـغابـرة!..

لبنان جَنّه.. وجَـنّـة الغربـه جحيم

خلص العمر عا قلوب بَعدا ناطره

وبَعدنا منعيش.. عا الله كريم

**

عينتين تنين

الى صديقي الغالي ابن بلدتي الاستاذ انطوان عبود الذي فقد ابنه الثاني بحادث سير في بانكوك:

كان عـنـدو عَـينـتَـيـن تنَين

فـيهُـن يشوف الـدنـي بَيَّـك

بمصرع وليد!!.. خسرت اوّل عَين

صار عَيني نورها ضَيَّـك

وتسَلَّط عليي غراب البين

امَّك قبالي تْعَذَّبِت يا حَين

وماتت بقهرا ع الوليد الزَّين

وضَل الغراب يحوم ومدَيَّك

وما كفاني بعيد عن حَيّـك!!

بحادث رحت يا بني متل خَيَّك

وحرمتني اتظَلَّل بفَيَّك

الله يصَبِّر بَعدكُن بَيَّك

**

سليم هَدلا

لن يتذكرصهرنا المرحوم سليم هدلا سوى ابناء جيلي او من يزيدني سنا ، فسليم عرفته قبل ان اعرف النطق ، يأتي منذ الصباح لشرب القهوة الصباحية و لالهائي خارجا لتتمكن والدتي من القيام باعمال المنزل ومنها تحضير الغداء وهو الاهم بالنسبة لسليم الفقير الحال الذي لم يكن له لا عائلة ولا مال ولا رسمال وعندما كبرت علمت بان سليم كسولا لا يحب العمل الذي كان متوفرا في البلدة خاصةً في مواسم الفلاحة والزراعة وجمع المحاصيل لكنه كان يكتفي ببعض اعمال السخرة مقابل وجبة غداء او عشاء.

عائلة هَدلا من اوائل العائلات التي سكنت رشعين ولكن من تزوج منها لم يرزق بصبية لذلك انقرضت من القرية اما سليم الذي اتذكره اليوم كان يعيش في سوق كان اصلا للماشية يقع على اطراف حارة "الدار" التي كانت تعود ملكية بيوتها للرهبنة اللبنانية ويقال بان سليم كان يساعد عبدالله عويس جده لوالدي الذي على ما يبدو كان مزارعا متمولا بدليل الاملاك التي ورثها اولاده وكان سليم يساعده في اطعام الابقار التي يمتلكها مقابل اطعام معدته فوقعت بحبه الصبية ساسيليا ابنة جدنا عبدالله والتي كانت تصغره بسنوات وراحت معه خطيفة وكان في ذلك الوقت من العار ان تعود الى بيت اهلها من تروح خطيفة بل تتزوج من خاطفها وهكذا كان، اما العروس التي حلمت بحلاوة العسل وجدته مرا منذ الليلة الاولى، فرشة العريس بضع اكياس من الخيش ومنزله يشبه اسواق البقر عند والدها فندمت حيث لم يعد ينفع فلم يجد والدها حلا افضل من تسفيرها الى الولايات المتحدة فرحلت على متن احدى البواخر وبقيت هناك ولم تعد الى لبنان الا بعد وفاة سليم باعوام وبالرغم من بلوغها الستين من العمر كانت تبدو سيدة جميلة انيقة ويقال انها في العام الاول لهجرتها كانت ترسل الى سليم بين الفترة والاخرى رسالة مسوكرة طيها شيكا بقيمة عشرة دولار وبما ان سليم كان اميّاً كان ككثيرين من ابناء البلدة يستعين بالمرحوم مجيد عبود لكتابة الاجوبة وكان مجيد يكتب مقدمة الرسالة ثم يقرأهها ويسأل ماذا تريدون ان اضيف لكم من اخبار فقل له سليم اضف 11 - 12- 13 - 14 واكمل العد الى العشرين قائلا اكتب لها هل لا تعرف العد سوى للعشرة؟ ويقصد بذلك قيمة الحوالة التي ترسلها له فكتب مجيد ما طلب منه سليم و كانت آخر الرسائل بينه وبين حبيبته ساسيليا.

عاشت عمتي ساسيليا بعد عودتها في منزل شقيقها المرحوم سعيد حتى مماتها اما سليم الذي توفي قبل عودتها بسنوات كان يسمى "جحا" زمانه لطرافة اسلوبه ونكاته وسرعة بديهيته وكان اهل القرية يتعازمونه الى العشاء والسهرات ليضفي على اجوائها المرح وخفة الدم، اخباره وطرائفه والاخبار عنه عديدة ومسلية لا يتسع لها المجال الان، اجدد الدعاء بان يرحم الله روح سليم ولكم الصحة وطول البقاء.

بشـروال لمْرَقّع بْخَمس لـوان

ومن عمر جدّو او قَبل لبّادتو

يزور البيوت يلعِّب الـعـجّـان

ويضَل لَـ وَقت الغدا ومن عادتو

ان لاقى الاكله طيّبه يبقى كمان

للعشا ياخد معو زوادتو

وبخربة الرهبان بَيت الـبَهلوان

والعِـدل كانو فَرشتو وسجّادتو

وبالـنـوادر كان "جحا " يشبه سليم

خبارو طَريفه وبنِكَت حلوه اشتهَر

والكل عارف واقعو وظرفو الاليم

عالعشا الدعـوات من كل الـبَشَـر

وشو عشاكُن؟ يسأل الضيف الكريم

ووين العشا عا خاطرو يكون السهَر

الفقر جَبرو يكون عن مَرتو بعيد

بالفقر ضَل.. وراحت بسَفره

ومن الغربه تحن عالزوج الوحيد

القابع بخربه وعايش بطَّـفْـره

وتبقى البواخر تنقل طرود البريد

وياما مكاتيب الناس منتظره

وينطر سليم رسالة غزالو الشريد

اللي يذكرو بالخير عالحشره

بعشره دولار الشّيك منو يستفـيد

ياكل.. يجخّ.. ويفـقَع السكره

ولجـواب رسالـتو.. يكَلِّف مَجـيد

ويكتب مجيد مقَدَّم النشره

ويسأل شو بدّك بعد قلّي شو تريد

قلّو اكتبلا شيكها تبقى تزيد

بمكتوب تاني تدَوبِل العشره

وانقطعت مكاتيبها وصيتا الحميد

وتا مات.. تا رجعت من السَفره

**

ملحم ناصيف

ملحم ناصيف وكنا نعرفه "بملحم الزمر" لانه كان يستعمل زمرا لدعوة الاولاد الى بسطته لشراء الأرمش الذي كان يصنعه بقوالب مختلفة عصافير، ديوك، احصنة، وسوها ويدور بها على طرقات البلدة او يتوقف في ساحاتها وامكنة تجمع الاولاد مطلقا العنان لزمره وينادي باعلى صوته "عصفورَك طَيَّر يا زغَيَّر" .

كان رحمه الله كاريكاتوري المنظر بلبادة رثّة وشروال من عهد نوح وشعر طويل الى كتفيه لم يعرفه المشط ابدا ويتدلى من عنقه سلسالا غليظا يحمل بضع مفاتيح وكل هذا لم يكن مهما بالنسبة لنا كنا نتسابق لنشتري ومن يصل اولا يختار ارمشته بالشكل الذي يحبه قبل ان ينتقيها سواه وكان ثمنها خمسة قروش اي فرنك وكان قليل الحظ من لا يتوفر مع والدته ثمن ارمشة يبتاعها.

صدق من قال " البطن بستان يعطي اشكال والوان" فشقيق ملحم لا اعرف اسمه قد يكون ابو جميل ان كان جميل هو الابن البكر فكنت اشاهده امام منزله الحديث البناء رجلا نظيفا لباسه جيد عكس اخيه الذي يقطن في منزل اشبه بخربة حيطانه سوداء من دخان النار التي كان يشعلها داخل المنزل للتدفئة والطبخ و لصناعة الارمش.

جمَّع ملحم ثروة من عمله ومن محاصيل بستانه الواقع على ضفاف نهر رشعين وكان بخيلا حتى على نفسه وخوفا على ثروته المادية وضع كل امواله وما عنده من ذهب في تنكة دفنها في بستانه ولم يعلم بها احد الى ان كان الطوفان الكبير اظن في العام 56 فجرفت معها السيول كل شيء ومنها ثروة ملحم الذي اسرع الى بستانه يبحث عن خزنته ، وتهدَّم الجسر الروماني الذي يصل رشعين ببيادر رشعين .

وتسببت الطوفة باضرار كبيرة في اسواق ومنازل مدينة طرابلس الواقعة على ضفاف نهر ابو علي ومات بعض الناس غرقا ، ولو علم انذاك صديقي الشاعر الكبير المرحوم اسعد السبعلي لاضاف فاجعة ملحم الزمرالى قصيدته التي لحنها وغناها المطرب الراحل وديع الصافي للمناسبة والتي تقول: يمّي انهد البيت خيي مات - واخدت الطوفه اواعينا - واختي الزغيره بَلعتا الموجات - بلا روح رَدّا البحر عالمينا. رحم الله ملحم ناصيف وايام " الفرنك" وايام القناعة بأرمش ملحم الزمر.

رزق الله عا هاك العمر

نشكر خالقنا عا رغيف

ونركض لمّا نسمع زَمر

وغناني ملحم ناصيف

وملحم شَكلو عمرو دَهر

لا فَرشو ولا شكلو نضيف

الصابون ووجّو عدوان

تيابو عليه تنعشر شَهر

للنَوم.. وللضَهره كْمان

وشغل المصنع بعد الضهر

يساوي من الأرمش الوان

احمر داكن.. احمر زَهر

للصَبغَه عيار واوزان

وقوالب عصفور ومهر

وديك وتعلب وسعدان

وغَلّه مْجَمَّعها بالقهر!..

يمكن مبلغها حـرزان

سوّالا ببستانو قَـبـر

من السرقه عليا خيفان

وبستانو عا ضفاف النهر

وطاف النهر

وراح القبر

وثروة ملحم بالطوفان

**

صياد الحجال

تذكرني اخبار ابو يوسف رحمه الله عن الصيد باخبار المطرب الراحل نصري شمس الدين واخباره في فيلم بياع الخواتم للاخوين رحباني عندما كان يبالغ باخبار الصيد الى ما لا يُصَدَّق وكانت ابنة اخته المطربة فيروز تنبهه بان لا يزيدها كتير لئلا يفتضح امره بالمبالغة، ولكنها اي المبالغة عند الصياد عادية ومن اساس المهنة فتدخل لنفسه الشعور بالعظمة والتفوق لذلك نرى معظم الصيادين يتباهون ويسترسلون في المبالغة عندما يتكلمون عن بطولاتهم في رحلات الصيد.

كان ابن بلدتي المرحوم ابو يوسف صيادا ماهرا ولكنه كان يزيدها في المبالغة ان لجهة تفوقه على سواه من الصيادين ام بالكلام عن بندقيته " الروباست "كما كان يسميها والمجالات البعيدة التي كان يرمي بها الطرائد حتى تخال ان من تمتلك بندقيته من الدول بامكانها ربح الحرب العالمية.

ومن اخباره المشوقة والتي تفوق التصور ان كان باعداد الطرائد التي كان يصطادها في كل رحلة صيد ام المجالات البعيدة التي كانت عصية على سواه مثلا اصطياده انثى حجل وفراخها الاثنتي عشر بطلقة واحدة وكان ذلك بجرود الضنية ، وذلك الرف من الزرازير والذي كان بالمئات وحط في شجرة الحور على ضفاف النهر فتسلل الى تحتها واطلق عليه النار من اسفل الى فوق فتساقط الزرزور بالمئات جمع منها ما يقارب الثلاث مئة واخذ النهر قسما منها اما السمامن فكان باغلب الاحيان يصطادها ببارودة " الدَّك " ويعود محملا بالعشرات منها بينما رفاقه و بسلاح الجفت كان البطل بينهم لا يصطاد اكثر من خمسة سمامن ومن اخباره انه كان قاصدا " الهُوّة " وهي منطقة جبلية في بلدتي لاصطياد الحجال وكان يرافقه ابو سليمان عندما شاهدا نسرا يحلّق على بعد مئات الامتار فصوب اليه بندقيته فقال له ابو سليمان ان المجال بعيد ولن يصله خردق بندقية فشارط انه سيرديه لانه واثق من سلاحه فما كان منه الا ان صوب الى رأسه فاصيب باعينه وسقط وهو يصرخ فاقدا بصره وعندما دنا منه اطلق عليه رصاصة الرحمة وربح الشرط من ابو سليمان.

الجلسة كانت ممتعة مع ابو يوسف شرط ان لا تقاطعه وتحرص ان لا يبدو على وجهك الاستغراب وتوهمه انك مصدق كل ما يقوله.

يرحم بو يوسف كان صياد الحجال

ويرمي الطريدة قد ما بِـعـد المجـال

بارودتو " الروبيست " ما في متلها

وبالصّيد متلو ما بقى يخلَـق رجـال

مرَّه سرب زرزور عالحوره مَرَق

وغَـط فيها والطيور تْجَـمَّعـو

ما عـاد بَـيَّـن لا غـصون ولا وَرَق

نويت قَلّي ضرب واحد افقعو

وخردقـي من تَـحـت للعـالي خَـرَق

زرازير بالميّات صارو يوقعو

تلاتميّه جْـمَعـت رغم اللي انسَـرَق

لمّا النهر لـبعيد حَمَّلهُـن مَـعـو

ومرّه حامل جفت الكسر

ودرب الهوّه بتلتينو

وفوق الهوّه مْحَلَّـق نسـر

ومسافه بيني وبَـينو

لحط الشرط قبالـي خِسـر

عا الحارك وَفّى دَينو

عا بعـد تـلات ميّة مـتـر

قوَّصت النسر بعَينو

ما تستعجب بالعاده

هيك خبار الصياده

صيّاده بتزيدا شوي

ومنهم بيزيدا زياده

**

كوفيد

شو فَيَّقِك تا تبعتيلي قلوب

وإيدَين حَضنو قلب عم بيدوب

كان بِ قلبي الأمَل غـافي

من عِـز نَومو فَيَّقـو المكتوب

قلبي شْتاق لحضنِك الدّافي

لعيون صَيّاده لقلب طَيّوب

وقَـد قلبي مْشَوَّقه شفافي

تمرق عا عنق وشفّة المحبوب

برسالتِك كان الهَمِس كافي

يعَيِّش الجَمرَه الرَمَّدِت فيي

لا دقت من بَعدِك عسل صافي

وبَعدِك ما غَرّ الورد عينيي

ضَربة حَجَر او قَلّ لمسافه

وزيارة المحبوب مش بالإيد

بُعدِك جبال الكون عا كتافي

يخرب ديارو شو عمل كوفيد

**

لا تغرك

ياما شياطين ببدلة الرهبان

قلوبُن مشرَّه المال مَعبدها

وياما العليهُن ينشرو القرآن

بتطلَع الفتنه من مساجدها

لا يغـرَّك مَنظَـر الانسان

في ناس فايض مال خزنتها

ونَفسُن دَنيّه وواحدُن كلبان

بيحسد النَمله عا رزقتها

في ناس قَـلبا بالغـنى مليان

ما بتشبِع العصفـور عَـجنتها

ومن كل قَلبا بتشكر الرحمان

والكون ارخَص من كرامتها

نسوان حلوه.. شَكلها فـتّان

الـتلج ادفى من حَـرارتها!!

وسمومها اخطر من الثعبان

اللمس الحراير متل لمستها

الله ما جَمَّل بالحلى نسوان

ولا اهـتَم بِ تَلوين بشرتها

قلوبهُن أَودَع من الحملان

وأَطـيَب من الشهد نكهتها

عمرو ما كان الشغل وصمة عار

مِيِّة شغل قاسي ولا شحاده

العار عا رجالات دولِه زغار

وحكّامها اوطى من العاده

لمّا سكرِت من طيب انفاسِك

وكتير عالصافي شربِت كاسِك

بين الوعي واللا وعي صفَّيت

ادرز قُـبَل من كَعـبِك لراسِك

**

أجمل الأوطان

يا اجمل الاوطان يا غالي

يا حلم ما بيروح من بالي

يا جرح عم يوسَع بـ هالغربه

تا يهد كل صروح آمالي

كنت احلم عـود عا روابيك

وكمِّل شو باقي من حياتي فيك

صرت يا لبنان عم ابكيك

وابكي على أهلي وعلى حالي

كتير من حَـقّـو شعـب غضبان

يرفَع الصَرخه ويلعن الحرمان

لكن عا جَيشو يوجِّه الحجران

هَيدي خيانه وجرم ونْداله

جيش الوطن سهران تا يحميك

متلك ما عندو أكل.. تا يطَعميك

بيت الزَّعيم البالرخص شاريك

بدّو رَمي بحجار وزباله

يا رب لا تسامح ولا انسان

دَق مسمار بنعـش لبنان

وكل اللي زَرعو بموطني الاحزان

وكل اللي وَصَّلنا لهالحاله

**

يا امي

بحرفه صابيعو لامسو كِمّي

حسَّيت متل النار بِ دَمّي

ان لَمسو صابيعو رَقبتي.. شو صار؟

وكيف فيي طيق جمر النار

لولا شفافو وَصَّلو لتمّي

بيوقاف قَلبي.. بجِن يا امّي!

وتصَوَّري رحنا سوى مشوار

وشو فِيا؟ مشوار يا عَمّي !!!

وصار.. من طَير الحمام يغار

ويحن زر الورد للشَمّه

ومنّو لحالو يوقَع الزنّار

لا تسمعي.. ان صرَّخت يا امّي

مشوار عَلَّمني دَرس نوّار

وروعة الحُب ولذّة الضَمّه

ونشوة السَكره !..وخبرة الخمّار

الفلفش بعَتم دفاتري الاسرار

ومن يومها.. صار الهوى همّي

وشفت الدني غير شكل يا امّي

**

انا مش كافر

انا مش كافر!..

انا مش كافر

حكامي كفّـار

ما عندي مطرَح سافر

عندي ولاد زغار

رح بيموتو جوع

والقلب الموجوع

ما بيسد الجوع

ومن املي المقطوع

عا حالي طْلَقت النار

سامحني يا غافر

يا ربي يا جبّار

انا؟ لا.. مش كافر

حكامي كـفـّار!..

**

شعب غفيان

شو باك نايم؟ فيق يا لبنان

وفيِّق بدربك شعبك المسكين

الليوم بَعدو بيعبد الاوثان

وبَعدو مْرَبَّط بِ حبال الدين

اللاحق الزعما مَشية العميان

البالطائفيه تاجرو من سنين

لبفضلهن صار الوطن عريان

وبَعدُن تماثيل من جفصين

فَتِّح عيونك يا شعب غفيان

وين الشهمه؟ وين فَخر الدين

ويوسف كرم قاهر بني عثمان

يطلَع بقى شي مطانيوس شاهين

يقود الشعب ويثور عالطغيان

ويرد نير الظلم عن لبنان

**

شعرك

وتلهت فكارك بالحكي الدافي

دفقات حب.. بروح شفّافه

وِشَعرك اللي بيلفت الاتظار

بياخد العين بطَلتو.. بتحتار

من هالحلى ايا حلى بتختار

الشَّعر الحلو؟ او مَطرَح الغافي

**

حلم

لما هجرتك غَصب يا بلادي!..

وعَدت أهلي بغيب خمس سنين

وبرجع باموالي ومعي ولادي

تا الحرب بديِت والوطن مسكين

تدَمَّر وصفى بلا سياده

وعينا وعا عنقك شفرة السكين

كبرنا ويكبَر خَوفنا زياده

لعندك اجو من الظلم هربانين

وقفنا مَعُن ظلاّمُن نعادي

ما عاد عرفو الدرب عا فلسطين

طلعو بلا كرامه وبلا مبادي

وصار السلاح بإيد لمجانين

يحَوِّل المرج الاخضر.. رمادي

والحرب صارت بين دين ودين

القتل باسم "هادي" واسم "فادي"

هابيل يقتَل غدر من قايين

ولبنان يدفَع دَم وشهاده

وعربان كنا نعدُّن محبّين

ما حدا منهُن ضَل عا حيادي

وجيران عالميلين ربحانين

ما بيرحمونا.. السَمَّرو الفادي

راح العمر هجران.. موعودين

نرجَع.. وبَعدو الامل زوّاده

وبعدُن حلم بعيونّا.. صنين

والارز.. والتلاّت.. والوادي

**

لا تبكي 

قالو لا تبكي.. قلت ما فيي

احبس الدمعه بعينيي

واهلي ضحايا.. بِ وطَن مسلوب

وعالجلجله مصلوب يوميي

عايش بغربه.. والعمر عا غروب

وطار اجمَل حلم من دَيي

ضلَّيت عا تلال الوعد مَصلوب

وصوِّر بلادي نجوم مضويي

بعدو النجوم!.. وصار حلمي يدوب

والامَل يتساقط حواليي

كنت انطر يوصَل المكتوب

ضمّو عا صدري بكل حنيي

وشم عالصفحه عطر طيّوب

مطرَح ما مرقو دَيك يا بيي

راح بيي وعا نفس لدروب

الخيّات راحو وودَّعت خيي

واهلي ضحايا!.. بِ وَطَن مسلوب

وكيف بحبس الدمعه بعينيي

**

 لبنان غالي كتير 

بساحة بلادي؟.. واقف السمسار

يدَلِّل بْحَركات صابيعو

وقسمين صارو.. الشعب.. والتجّار

للغَرب او للشَرق بيبيعو؟

لبنان مش للبيع يا كفّار

لبنان ملك الرب.. لا تضيعو

لبنان مهما ارتفعت الاسعار

بتضل ارخَص من ينابيعو

و بيضَل عنا بالوطن احرار

يتْدَبَّرو شؤنو ومواضيعو

لا الموت بيخافو.. ولا من النار

عناد غَير الله ما بيطيعو

**

ارزاتنا

لما على بلادي تهب الريح

بتنقل جناحا ريحة الحبقه

وارزاتنا بتهتز.. ما بتزيح

معمشقه بالارض.. وبتبقى

**

جاع الوطن

وقفت.. وفاضي قبالها لَكن العجين

الصَرلو سنة تخمين ما شاف الطحين

وبالفقر ما بيفهمو ولادا الزغار

ولا بجرم اهل السياسه الظالمين

ولا بقلِّة المدخول وجنون الدولار

ولا بطمَع تجّار الطحين الفاحشين

ولا بالسياسه واهلها عندُن خبار

ولا بعهر تجار الحروب المجرمين

وام اللي باعت صَوتها هاك النهار

لنايب وَعَدها يكون للامه أمين

ما عاد بيَّن صَوبها.. سرّاق صار

الوَعَد جايي يقص إيد الفاسدين

والاشطَر بيوصال لضروب الكبار

بينسى النزاهه وكل حلفان اليمين

والزلم حَولو عاليمين وع اليسار

وم بيلتفت لا لليسار ولا اليمين

حتى ما يسمع صَوت باكي وصَوت جار

ولا ينزعج من شَوفة الشعب الحزين

آخ يا بلادي العمر غدّار.. طار

خمسين صاير بالهجر عمر السنين

ولبنانّا المسلوب صابو الانهيار

وبَعدنا متل اليتامى نطرين

**

الى الشاعر الصديق مروان كساب

ردا على تعليقه الشعري على قصيدة " جاع الوطن "

شعرك سنابل قَمح عالبيدر

والبيدر باشعارك بيكبر

وغربال انت بتعرب الزيوان

قبل القمح ما يفوت عالمتجر

انت فخر الشعر يا مروان

وبحر القوافي بيشهد المنبر

الله يديمك.. للشعر عنوان

وتبقى البطَل وتضَلَّك مسيطَر

ابقى انا.. خيّاط للنسوان!..

وبشهادتُن.. خياطُن الاشهر

لكن تركت المصلحة من زْمان

ما عاد لبق الكار للعجزان

يعبِّر بخيطو فَتحة الميبر

**

تذكر

مكَبَّش بمال الارض شو بدَّك؟؟

تاخد معَك ثَروه وقت ما تموت؟

تذَكَّر شو اخدو بَيَّك وجدَّك

عالقبر غير الكَفَن والتابوت

الله خَلقنا بهالدني نعْشَق

يا الحلا يا المال يا العفّه

لازم بكِمّ العشق نتْعَمشَق

تا عالامَل اعمارنا نْكَفّي

**

سهران 

بعدو حبيبي مقَلَّق وسهران

شو السَهَّرو هالقَد.. يقبرني

نامو اهالي الحَي والجيران

دَخلو انا.. لا يقوم ناطرني

متلك انا بماضي الهوى سكران

ناطر حدا من الحلم ينهَرني

والليل قاسي وقَسوة الهجران

وما في حدا بالعطف يغمرني

ببَوِّس صُوَر وبراجع مكاتيب

ودَمعي وجرِح قلبي مسَهَّرني

لا الدَّمع شافي.. ولا الجرح بيطيب

" الله على الفرقه يصَبّرني "

بالعشق ما اصعب الحرمان

انكَنّو حدا داقو يخَبّرني!..

قالو البُعد بيخلَق النسيان

شو غَلَّط بحَقّي اللي بَشَّرني

عنها بعدت كتير.. صَرلي زمان

وبَعدو لهيب الشوق طامرني

وبَعدو حبيبي مْقَلَّق وسهران

ومتلو انا.. شَوقي مْسَهَّرني

**

 ردا على رَد 

نشر شاعر المنبر المعروف الدكتور مروان كساب ردا على قصيدتي له وها انا بدوري ارد من جديد على قصيدة صديقي العزيز الدكتور مروان مع المحبة والتقدير.

مش خايف تشارين يا مروان

ولا من وراق العمر مدريي!.

صفرا.. وبيمرجحها الهوا الغضبان

عا دروب بالاوحال مطليي

هَيك الدني وفصولها فهمان

ونهاية الجوله.. بديهيي!..

جدَّك وجدّي رَحَّلو من زْمان

وراحو وراهُن بيَّك وبَيي

لولا الدني بتدوم للانسان

دامت لغَيري.. لهَيك ما فيي

اعترض عا رغبة الديان

والختيره.. قصّه طبيعيي

كنت خيِّط للنسا الفستان

وفَصِّل عا ذَوقي الزَّي يوميي

واغلق الباب بغفلة الجيران

تا رَكّزو بعواطفي.. ودَيّي

اليوم لولا بيمرقو النسوان

من حد منّي بيرجفو جريي

وحتى ما يحرقني هوا الحرمان

ويجرَح فؤادي.. بقلِّد العميان

وبستغفرو.. و برِد عينيي

**

جرح لبنان

وكيف بدّي دَمعتي خَبّي؟

ما الدَمع نَزْف الجرح لبقـلبي

عا مَوطني البمصايبو غرقان

والفقر.. والجوع.. والحرمان

والموت.. عم يتلَذذو بشعبي

2

يا حَرق قلبي عليك يا لبنان

يا موطني.. يا اجمل البلدان

يا حب عمري.. يا حلم هربان

يا امَل عم بيضيع من دَربي

عا وَجَع اهلي.. وبقَهر حُبّي

كيف بقدر دَمعتي خَبّي؟

**

بيروت

مبارحه النجار قال: كعـيت

ما عدت لَحِّق اعمل توابيت

ببلاد صار الموت سيرتها

شَعبا غَفا وحكامها عكاريت

بيروت صار الليل حلّتها

وصارت مدينة رعب كيفما مشيت

ملَوّته بتشرب مويتها

ورجعت لعهد الكاز والكبريت

بلادي شعوب الارض حسدتها

مناخا الحلو بالكون ضارب صيت

بحكامها من زمان بلوتها

عملو السياسه لعبة عفاريت

بلادي جبين البدر طَلّتها

فيها حلا ايّام عمري ربيت

الله يساعِـد عا مصيبتها

عا وضعها من كل قلبي بكيت

مهما الظروف تزيد قسوتها

لا حَـلاها ولا غَـلاها نسيت

بلادي نواطير الكَـرم عـلّّتها

كلُّن لصوص وكلُّن عكاريت

**

عيش كرمالي

بحبَّك انا.. بالك عا حالك دير

توقّى المرض والخطر كرمالي

ان صابك اذى بزعل عليك كتير

كتير انتا عالقلب غالى

تسلمي.. ويسلم قلب لكبير

بحبّك الصادق الف نيّالي

إلّا اللي كتبو الرب ما بيصير

ورَح دير بالي كتير عا حالي

**

مشتاق

مشتاق اسمع صَوتِك الدّافي

وبَحَّه تقلّي: غِل بلحافي

ومتل العوايد ضَل طول الليل

تمرَق علَيكي وتسْكَر شفافي

شو بحترق لما بتجي عالـبال

بسمَـع بادنـي هَمسِـك الـدافي

عالعاشق ليالي الفراق طوال

بيطلع الصبح وبَعد مش غافي

بعدُن بقلبي الذكريات غماق

مهما افترقنا والـزَّمَـن قـأفي

ان قالو البُعـد بيدفن الاشواق

بَعدو بقلبي الشوق لا تـخافي

كتيـر فـيـهـا هالـدني اسـرار!!

مهما تقول عرفت.. مش كافي

صعبه بهواكي يكمل المشوار

وصعبه البعد عن شهدك الصافي

لا تخَبّريني بالبعد شو صار

انكَنّو عا قلبِك في حَدا لافي

بَعـدني عـليكي كـتيـر بغـار

وبحبِّك.. ومَحروق سلّافي

**

شعر للحلوين

قالو رجعت تكتب عن الحلوين

بخاطرك شعر الغزل منحوت

وبَعدَك بعشقَك متل لمجانين ..

ناسي المصيبة الحلِّت ببيروت

لا يا صحابي.. كتير غلطانين

قلبي معَتَّم عا زَمَـن ممقوت!.

حس الاسى مشارك المقهورين

وببلادنا كل ما انرَفَع تابوت

بندُب وببكي مع المحزونين

وبشعر بغَصّه بس دوق القوت

وفَكِّر في غيري ناس جوعانين

وناس صارت عايشه بلا بيوت

لا مال عندا ولا كسا ولا طحين

ببلاد ما في كهربا ومازوت

يا ما بشعري رجَوت الله يعين

ويا ما عن بلادي كتبت بيوت

ويا ما كتبت عن شعبها المسكين

الخرده بنَظَر حكّامها.. ومزتوت

وياما قلت : حكّامها شياطين

ووصَفتُن باحقَر حَكي ونعوت

ويا ما كتبت لا تفرّقو بالدين

كلّنا بـالـمَـركَـب المَـفـخـوت!

والشعر يا اصحاب يا محبّين

لمعة وَحي اغلى من الياقوت

لَمعه ما في إلها زمان وحين

ان ما نخَطِّت عالورق بتموت

بلادي يا جرح العاش فيي سنين

يا حزن عا فراح القلب بتفوت

ومع غمق جرحي بشد عالسكّين

بإيمان عندي من الاهل موروت

بلادي العَطت للكون قَدّيسين

بـيتـشـفَّـعـو بلبنان بالملكـوت

لا بيقهَرو ولا بيكسرو التنين

وجبالنا حصرم بعين الحوت

يا ما عا ارضو تبهدلو سلاطين

وياما انتصَر شعبو على الطاغوت

للابد بدو يضَل.. عالي جبين

ومَعهَد بطولة ومَدرسة لاهوت

**

من المستشفى

حط القدر عينو على بابي!!

تخمين ناوي يسكِّر حسابي

وما يعود يجمَع عالهويّه سنين

ولا عاد عم تفرق معو تخمين

دَمعِة حبابي وزَعَـل اصحابي

مبارحه رْجَوتو عليي يلين

ويتأخَّر بتأشيرة غيابي!!..

كاتب قصايد كلّهُن حلوين

تا يروق وَضع بلادنا المسكين

قاصد وطَـنّا اطبَع كتابي

خبَّرت اصحابي شو عم بيصير

وقلت القَدَر حايم حواليي

كلهُن قالو: بَعد بكّـير!!!

المتلك هَني بيعيش للميّه

بَعدها بتغويـك لفـرافـير

وبتحن كلما تشوف حوريّه

وبتحب انّو تقَلّد عْـصافير

العاشق ومَعشوق لَيليّه!!

وبالشعر متل النحل عم بتطير

تلملم أريج فْكار بـكـريّه

يا قَدر وجَّك عن طريقي دير

يـا مسَيَّـر بـقـدره إلـهـيّه

لا كبير قادر ترحَم ولا زغير

ولا في بقاموسَك كلمِة خْطَيّي

مخفي ما بتبَيِّن على نواطير

بتزورنا متل الـحـرامـيّـه

قَلّي طبيبي: كتير بالي دير

وآخد دوا عالوقت يَـوميّـه

وخَمر ما اشرب ولا سواكير

وما اتعَب ولا مِدّ سَهْـريّه

وتحت الشمس ما اعمل مشاوير

توقّى البرد لَـو الطقس شتويّه

وبطبختك خفِّـف الملح كتير

وعشق الحواري نْساه يا خيّي

صْرَخت: بيكَفّي تركني سير

صعَّـبتها.. هالـقَـد؟ ما فـيّي

الـمَـوت أستَر.. استُـر عـلَيّي

**

لوعة الاشواق

بحبِّك وفيكي دايب الخفّاق

وبكل هَـدس البال بتْضَلّي

وعا غيابك لوعة الاشواق

القلبو بـيقـدر يحملا يقلّي

ضاع العمر حَرقه وحَنين فراق

وبالحُب عشنا الجوع والقلّه

وخَوف الخطيّه وبدعة الاخلاق

جات الكورونا.. زادت البَلّه

شعري يا دَمعَه حارقه عا وراق

والليل لـمّا يطل؟.. يا دِلّي

عليي ساعاتو طوال ما بـتـنطاق

الفرشه إبَر ومْخَدّتي مسَلّه

مش بَس بالعين الدمع حرّاق

الغصَّه سهم بالقلب بتْخَلّي

النهدات ذكرى من عمر سرّاق

ضَغط القلب والرّوح بتْعَلّي

**

لا تضحك عليي 

شو باك بتْتَمتِم ومش موزون

لا بتسكت ولا الصَّوت بتعَلّي

تْطَلَّع وقَـلّي: حسبـها جـنـون

ومجنون هَل غير هَيْك بيقلّي

الما جَن متلي بلا عقل بيكون

الحاله ما إلها بها الوطَن حَلّه

الشعب جايع والحكم مَرهون

ايادي الخَفيّه الحكم محْتَلّه!!!

كلمن بيشد بميل بالكلسون!!!

احتَرنا عا ايّا ديـن مـنـصَلّي

وللي بيـقـلَّك: هَـوّنـا بـتهـون

نَصْحَك تـعَـبّي مَـي بـالسَـلّـه

الخَزنه نضيفه والوطن مَديون

والـدَّيـن؟ بجـياب الـحـرامـيّـه

ومش قادر الحاكم عا مَرتو يمون

الـكـرسه بـلا سلطَه وصلاحيّه

والناخب بإيـد الزعـيـم زْبـون

اللي اشترى صَوتو وطاعتو بميّه

ووزرا عا زوق المجلس الملعون

الصفـقـات بـحـسابُـن طَـبـيـعـيّه

تماسيح.. لا تصَدِّق دمـع لعيون

ولا كـلام بـتـصاريـح يَـومـيّـه

مجنون قلّي انما قلت مـجـنون

بـيـكون دَم وعَـقـل مـا فـيّـي!!

او انت عَـم تـتْـضَحَّـك عـلـيّـي

**

لوعة الاشواق

بحبِّك وفيكي دايب الخفّاق

وبكل هَـدس البال بتْضَلّي

وعا غيابك لوعة الاشواق

القلبو بـيقـدر يحملا يقلّي

شوفي الفكر لْوَين بيوَدّي

وكيف بيرَجِّع حكايا عتاق

تحرق بقلبي وجبهتي تنَدّي

من وَهج روحي ولوعة الاشواق

بيوم افـتَرَقْـنا وطالِـت المدّه

ودقت طَعم عْذاب ما بينطاق

لا قـدرت اتْغَـلَّب على الشدِّه

ولا قدرت انساكي رغم لفْراق

كلما لفي راسي على مخَدّه

بغَمِّض عيوني بلا غَفا وبشتاق

بْمَشّي حْلامي متل ما بدّي

دَردشِه وهَمس وقُبَل وعْناق

**

ظلم كورونا

قَولِك بعد موسم كورونا منلتقي

وبـتـرجَع الايام والحب النَقي؟؟

او عالتباعد بَعد بيطول الـزمان

بحجّة العدوى والسلامه والامان

منعيش عا اشواقنا العـمر البقي

مبارحه بجنينتي حْسَدت الطيور

ونحلات عم يتنَقَّلو بين الزهـور

يلمّو رحيق الورد ويشمو عطور

من زهور البَعل وزهور السَّقي

ولولا كورونا زادت علينا فجور

وتْكَسَّرو جناحات هالقلب الغيور

وصَيّر حبيبك اسم عَابلاط القبور

ولَـنّـو بعيد الحب عا قبري مْرَقي

**

عَصر الكورونا

تخميـن أحلا تْضَلِّـك بعيده!!

وما تخطر ببالك مواعـيـدي

ما دام حاكمنا الـقَـدَر اعـدام

محَرَّم علينا مصافحه بسلام

وما بْـفَـضِّل نـلـتـقـي ما دام

مـمـنـوع إنّـا تـلمسِك إيـدي

الله ما اقساكي يـا ها الايـام!

من هالـبَشَر شو بَعد بتريدي

بميّة حجج بتْحَطّمي الاحلام

وعالناس ظلم وقَهر بتزيدي

وبالشعر؟ لمّا بيحبَل الالهام

بيحبَل بدَمعه لـونهـا نـبيدي

وبتخْلَق بمَـهـد الألـم لـكـْلام

مـقَـمَّـطـه بمليون تـنـهـيـده

وكَنَّك بَطَل؟ جَرِّب يا عاشق نام

ووَدّي حلامَك عا دني جديده

لو بيدبحولك الف طَير حْمام

وغَـنّو تا تغفى الـف تغريـده

بعصر الكورونا.. وقَسوة الظلاّم

مـا بـيـرقـد جـفـن يـا سيـدي!

لأجل الوقايه شَدَّدو الأحـكـام

العمر عم يمرق قَـلَـق وهْـيام 

مَـمنوع المس.. ضَلِّك بعـيـده

**

حُب الصِّبا 

ما عاد ينقِـلّي حَكي الشبّاك

عَنِّك.. ومنو أعرف الاخبار

مَفتوح.. طِلّ القلب مسْتَنّاك

مَغلوق دَرفه.. ببَيتنا زوّار

ومسَكَّره درافو.. رحِت مشوار

وين رحت يا هاك العمر مَحلاك

وين راحو ساكنين الدار؟

من زْمان ما شِفت بسماك مْلاك

ولا شِفت نَجم بْجَوَّك ولا قمار

شو صار يا حُب الصبا شو صار

يا حُب ودَّعـتك.. وما بنساك

بـتـدِق بـاب البال.. ليل نهـار

كانت الذكرى بلا حَلا لولاك

ياحُب.. اجمل عمر مني طار

وبَعدَك بتِبعَد.. والزَمَن غـدّار

**

جرح لبنان

بيقولو كتوب.. شو بكتب حبيبي

وجرح مَـفـتوح ببلادي الكـئـيبه

وسواد الليل.. بَـعْـدو لـيـل تاني

ومصيبه بَـعـدها بتطلع مصيـبه

بْـجَـو الحـزن؟ بـتْـبَكّي الغـناني

وانـا مـعـتـاد ما صَوِّر نَحـيـبي

بْـخَـبّي الـدَّمـع وبـتـلمـَع سناني

بِـبَسمه.. وبسمة الباكي غَصيبه

أسى وآلام عم يـمْـرق زمـاني!

وحلم الـعـمر عم يقفى هَـريـبه

لأغلا بـلاد عـاطفتي وحـنـاني

وما بدّي بدَمع اكتب عن حبيبي

**

الى صديقة

الى صديقتي الغاليه الاستاذة ناديا بايع التي اقلقها انقطاعي عن الكتابة

يا ناديا شو بيكتب المجروح

وبلاد عشق ترابها بتنوح؟؟

العتمه قَدَرها وشعبها يئسان

والحكم سايب والعدل مدبوح

حكّامها من مدارس الشيطان

السرقه شطاره..  والنهب؟ مسموح

وما حـدا سائل عن الانسان!

ولا في امل بالجو عم بيلوح

متل السـفينه الما فِـيا ربّان..

كيف ما جَن البحر بتروح!!

هَيك.. عم اقشع وضع لبنان

طوفان..  لا في مركب ولا نوح

ما بحب صَوِّر حالتي حزنان

ولا الشعر يطلَع.. من انين الروح

**

شد حبال

بَعـدُن بلبنان شَد حْـبال

وسرقه ونَصب ونَهب وخْيانه

زعما لْدُوَل شَرق وغَرِب عمّال

ما ضَل غَـير الارز لبناني

**

ممنوع

ممنوع زورا واذكرا ممنوع

اللي مكَلّفِتني قَـد حبّا دموع

ما أَصعَبا الحَدّو الاكل والشرب

وعطشان قَلبو ومَيِّت من الجوع

**

زيارة عا لبنان 

رايح بشعري اليوم عا بلادي 

وبرحلتي آخد معي ولادي

يتعرّفو عا ضيعتي رشعين

والنبع يهدر والسحر بادي

ويترَوّقو بالكرم عِنْب وتين

ويحملو عالبيت زوّاده

ويكزدرو عا دروب لبساتين

يشمّو النسيم العاطر الهادي

ويوعو على تراتيل لحساسين

ويغفو عا صوت البلبل الشادي

وتاريخنا واثارنا مهمّين!..

المشوار عا آثارنا.. عادي

لازم يزورو بعلبك وصنين

والارز وجبيل والوادي

وصيدا وصور وقصر بيت الدين

وقلعة راشيا.. واشرح زياده

بلشت من عصر الفينيقيين

وكيف الوطن كان صاحب سياده

وعن الشهابي وحكم فخر الدين

حكّام حَبو ارضُن عـباده

ويوسف كرم ومطانيوس شاهين

يحاربو اللي شَعـبُن يعادي

وعا اهدن طلعنا وعلى الميدان

تغَدّو وكانو كتيرمرتاحين

وبمار جِرِس صلّو على جثمان

اصدق بطل ما كان عزمو يلين

اللي مع رجالو حارب العثمان

بالعزم.. والسيف والمرتين

وحكيت عن لبنان.. كان وكان

وكانو ولادي كتير مهتمّين

وسألو.. يا بيي ليش تا لبنان

اليوم صايـر مَسرح شياطين؟

افقر واردى واتعس البلدان

اهلو.. ولا الحكّام سئلانين

وابطال يللي ذكَرتُن من زمان

ماتو قبل ما خَلَّفو تخمين؟؟

يا رَجوتي شو بقلّكُن؟ خجلان

مَسكين ياولادي.. الوطن مسكين

الكانو بساحات الوغى مردان

ما يفزعو من الموت.. جبّارين

احفادهُن.. ما خَلّفو صبيان

كل اللي خلقو بَعدهُن خصيان

تجّار عملو من الوطن دكّان

وحكام طلعو كلّهُن" تنيان"

سمعتو يا بيي؟؟ لا تسبو الدين

**

عطر

شو نَوع هالعطر اللي لابستيه

دوَّرت كل السوق تا لاقـيه

تا ري علَيكي ريحتو اطْيَب

جسمِك النكهَه الطَّيبِه بيعـطيه

**

غمزه

تحَـرَّك شعـوري.. بَس من غَـمزِه

وبسمة رِضى من شفافِك الحلوين

قـدَّيش عِـنـدِك بالهـوى لـزّه؟؟

بطَعم العَسَل تـفّـاحـتِك تخمين!!

**

حظ

شو كان حَظّي كبير لمّا فيق

وانتي معي عا زات لمْخَـدّه

وانطر تا توعي غازلِك عالريق

واسكَر بلَهْـتِك قَـد ما بـدّي!!

**

سهام

كنتي توَدّي سهام سحريّي

كل ما يجو عـيونك بعينيي

اشعـر برَعشه غريبِه كتير

وحِس لَطْعِة كَهـربا فِيّي!!

**

من الزمن الجميل

ذكريات الطفولة والزمن الجميل لا تفارق البال بحلوها ومرها فتعود تكرارا كلما اختليت بنفسك او جالست صديقا ، بالامس زرت صديقي القديم الاعلامي الراقي الاستاذ طوني سعد ومن مرطبان العسل الصافي الذي اصر علي ان اتذوق منه انطلقنا الى ذكريات ايام الطفولة والشيطنة الى ان وصلنا الى حركشة اوكار الدبابير لتثور في هيجانها وتلدغ كل من يمر بقريها ولكن غالبا ما كنا اول الضحايا.

بعد عودتي الى البيت نظمت القصيدة التالية ولقد عمدت الى تغيير بعض الاسماء المذكورة تحاشيا ملامة من لا يروق لهم تسمبة اهلهم ، انما ما ورد فيها من اخبار فهي حقائق دامغة.

يا ذكرياتي عن تردّيني

لماضي حلو عشتو من سنيني

ولَد داير نَقِّف العصفور

عالتوت والعلّيق والتينه

وغافل صحاب الكَرم والناطور

واقطف فَرد عنقود.. يكفيني

من الحقل اهدي للبنات زهور

وحب اللي بوسة خَد تهديني

وبالقصب حركِش موكر الدبور

واهرب لا يعقصني ويئزيني

ودبّور أجكر.. جارتي "كتّور"

ما في حَدا منها يْنَجّيني!...

ياما وياما والتهايم زور

لاهلي عا طول الوقت تشكيني

وبيي يرَوِّق خاطرا المكسور

بشمطة ادن منو تبَكّيني

وبذكر "جميل" يشق ارض البور

هاك العا وجّو الشمس تلوينه

و"ميليا" ال تخبز على التنور

قلاّ: البركه.. طلم تعطيني

والناس عالاشغال شَق النور

والعيد فَرحه عامره وزينه

وابقى بأول طلعتي مغرور

ما عاد ايّا لبس يرضيني

البس على الموضه ورش عطور

وع الجسر حلاويه تلاقيني

كنت فيها مولّع ومسحور

وبُعدها لليوم كاويني

يا زْمان عا لوح القلب محفور

فكري لايامك بيوَدّيني!..

مهما نلف بهالدني وندور

بتْضَل ذكري طيّبه بالبال

ما بتنمحي تا الموت يمحيني

**

قالوا

قالوا: تا انسى موطني وارتاح

وريِّح من الدَمعات عينيّي!!

قلت الوطن روح وقلب وجْناح

ومن دونهُن عالعيش ما فيّي

تركني بَعد في دمعتين زغار

حطُّن عا هالورقه

صارت بلادي بالفكر تذكار

وبالقلب حَرقه!!

قالوا: لا تبكي موطنك باقي

ال الله معو ما بتهزمو الايام

قلت الدَّمع من فَيض اشواقي

واللي بيبكي شَوق ما بينلام

ببكي عا اهلي عا وطن موجوع

وعا حلم عمري ال طار من دَيّي

عا ناس تَعَّـبها المرض والجوع

هَـمُّن حَـرَق قَـلبي.. وعـينيّي

ببكي مع العينيه جرن دموع

بنتو مريضه وداب حنيّه

المشفى مْسَكَّر والدوا مقطوع

من جرم ايدين الحراميّه

**

صورة حبيبي 

ميتين مَرّه جَرَّب الرسّام

يصوّرِك صوره طَبيعيه

ويترك حلاكي عالقماش ينام

وينال عالصوره ميداليّه

فرحت الريشه وكَيّفو لقلام

جابـو الصورة الف بالميّه

وضَلِّت خجوله وباهته قدّام

رونق بهاكي والنعوميّه

وطلة عـيونِـك السحريّه

تـتمَجَّـد القـدره الالـهـيه

**

صورة

هالصورة العا الفايس حَطّتها

حَرَّك شعوري سحر بَسـمتها

وعيونها وخدودها الحلوين

شي الف مَرَّه بست غمزتها

المغروم متل حكايتي ومسكين

محروم وجّ بـوجّ.. شَوفـتها

لولا تخايـلها على السـكّـيـن

من دون وَعي بيبوس شَفرتها

عا جبهتي لَوَّح هوا تشرين

وشَدِّت صابيع البرد لَمستها

وبعدا عيوني بتسرق فساتين

والنحل بيفَتِّش عا زهـرتها

**

سهران

يا ساكنه بقلبي شو بعمل فيه

بيضَل قلب العاشق مْقَـلَّق

ان حبَّيت اغفا بترجعي تْوَعّيه

لا تسألي ليش فايق لْهَلَّق

بحب اسهر بَعد ما الجيران

يكونو بحيي كلّهُن نامو

ببقا انا وشعر الغزل سهران

بيعشَق سكون الليل الهامو

وبتخايلك حَدي بلا فستان

وعَم ساعِد تْفكّي الصدريّه

رح احترق من جسمك اللهبان

ومن وَهج قلبي يرجفو دَيّي

ما دام قَـلبي لخاطرِك مَرهـون

وبيتِك بعـيد ورسمِك قبالي

وعطرك بقلب الذاكرة مخزون

بضل شمّـو واسهر لحالي

والناس بيقولو الجنون فْـنون؟

يقولو بكلامُن ما عدِت بالي

عارف بحبِّك.. انـا مَجـنـون!!

قلبي سْكَنتي.. وشاغله بالي

**

مصطفى الحلوة

كبير انت.. وكلمتك مشعال

اللي بتذكرو بقلامك بيكبر

كتابك حَضَن كتبي وعني قال

بأول مقاعد للشعر بحضَر

خلَّدتني للشعر.. عا اجيال

شكري إلَك يا سيّد المنبر

الكتّاب زادو والاسامي تلال

وحَب الادب كومات عالبيدر

ولما الجنى بيمرق على الغربال

اللي بيشرقو بين الاسامي قلال

اسمك انت.. بيضَل يتغَندَر

ومتل الشمس مشعالك منَوَّر

التكريم.. يا حلوة بيلبقلك

عا حلا روحَك عا كبر عقلك

انت.. عا صدر الوطن نيشان

فكر وشهامة وللشرف عنوان

يا ريت كلُّن متلك بلبنان!!!

ولبنان؟؟ يا دموع انزلي طوفان

كيف صار الواقع وكيف كان

صار الحرامي سيِّد الميدان!

العدل ميِّت والشرف هربان

وبقرش صارت قيمة الانسان

يا ريت أهل الحكم عا شَكلَك

بيصادقـو بلا تفـرقة اديـان

واهل الفكر بيقَدّرو متلك!!

الحرف بيتك والادب حقلك

مبروك.. تكريمك.. بيلبَقلَك

**

شو عملت عالعيد؟

كتار اللي سألو شو عملت عالعيد؟

سهره بحفله؟ او رحت مشوار؟؟

والعيد..طقش.. وفقش.. وزغاريد

وشرب كاس.. وكاس تاني.. قمار

لالا.. ما عِيَّدت ولا قادر عيد

نفس الفرح بالعيد والـتـذكار

هالعيد دَمعه حارقه.. وتـنـهيـد

وسيف "الكورونا" عالبشر بتّار

سنتبن صَرلو بيكبر وبيزيـد

شَل الدني وغَيَّب احِبّا كتار

سفّاح حكمو البطش والتهديد

واللي بيوَدّو عالقمر مسبار

المَرّيخ زارو وحَدَّدو مواعيد

ما بصَدّقُن ما عندهُن افكار

يلاقو دوا شافي وعلاج يفيد

ينَجّي الخليقه من "طفل" جَبّار

عيَّدت؟ وَين العيد بالتحديـد؟

بأيّا وطَن؟؟ما في إلو انصار

جرَّبت عَـيِّـد.. ما طلع بالإيـد

والعيد كيف؟ ونشرة الاخبار

لبنان لل شَعبو السعاده بريـد

عايش على جوع وفقر ودْمار

وكل يوم بيصَبِّح عا هَم جديـد

بعد القتل.. بالمدفَع.. وبالنار

وعجقة جيوش وفوضة بواريد

صار قَتل العصر بالدولار

وقَطع الدوا والخبز والتبعيد

والكون كلّو بقبضة التجّار

عيدت جاري مبارحه من بعيد

مكمَّم  وقلقان.. ليل نهار!..

ايّا هَنا وأيّا فَـرَح بتريد؟؟

ولادي ما شفتُن.. ما شفت زوّار

من بعيد.. وتعيشو لتاني عيد

من بعيد: يجبر خاطرك يا جار

**

صرخة قلب

لما تصَفّي.. كم واحد مات؟

وبتجْمَد الـدَمعه من اللَّهفي

بتصرخ بقلبك حرقة الدمعات

يا رب!! نَجّي الناس بيكَفّي

والناس مرميّي على الطرقات

لا ضَل مَشفى ولا دوا يشفي!

تساوى الفقير وصاحب الثروات

تساوى الشعب مع قايد الدَّفي

بلكي لضَميرو تَقَّل الغَفـوات

بيوعى.. وحق الشعب بيوَفّي!

وتخمين الله زَوَّد الـضَربـات

تا نـقول الله.. وقلبنا نـصَفـّي

لما عـلَينا تصْعَـب الحالات

منندر الفقر.. منندر العـفّـّي

إقبَل يا ربّي التَّوب والصَّلْوات

واحمي البشر من شَر متْخَفّي

**

كوفيد 

غـدّار.. مادد ألـف إيـد وإيـد

تخطف صحابي

واهلي واحبابي

لابس شَبَح حامل لقب كوفيد

بيشِدّ عا رقابي

بيخنـق التـنهيد

وخـايِـف انـا اللي بعـيـد!!

يعمل حسابي

يـدِق عـا بـابـي!

ويـنطـوي كتابي

**

ما خَصّني

شو خَصّني؟.. ما قدرْت إيدي هَـدِّيا

تا وصْلِت لتنورتك

مْفَتَّح عيوني بَس مش قاشِع فِيا

وصارت غباشه صورتك

ومن صورتك طار الحَيا

وورودك.. ومنتورتك..

راحت صابيعي تْعَرِّيا!!

وبَوِّس مطارح قونتك

إيدي انا.. الحَق علَيا..

شو خَصّها بتنورتك

**

كترو خطايانا 

شو صار بين اليوم والتاني؟.

جار الرضى من بعيد حاكاني

ياما سهرنا للصبح سهرات

طاوله.. وطرنيب.. وقناني

شو صار لا مَلقى ولا زيارات

والناس قرب الناس خيفاني!!..

نْقَفلو لبواب.. وفاضيه الطرقات

وما انفتَح بالسوق دكانه

يا رب دخلك خَفِّف الضربات

انت القدير وفيك ايماني

كترو الخطايا وكبرت الويلات

كلُّن بيقولو غضب ربّاني

**

الله عا هالايام 

الله عا هالإيـام يا سَمـره!!!

وداع لا بوسه ولا غمره

متل الغرب ودَّعتك من بعيد

عالخَد كَرجِت دمعتي جَمره

فَرضو علينا بِ عهد كوفيد

لذّة الملقى ينقصف عمرا

وروزنامتي تبقى بلا مواعيد

محروم شم العطر من زهره

العيد شَرَّف موعدو بلا عيد

لا عيال مجموعه ولا سفره

عامره.. باكل وحلو و نـبـيـد

وصارت الجَمعه عالصلا خِطره

ايمتى رح شوفك من جديد؟

ومين البيضْمَن في إلو بُكرا

كل ما شهور البعاد تـزيـد

بحن الليالي حبّـنا الحمـره

علوّاه لو انو الفرج بالإيد

وبتنتهي هالحالة الـمُـرّه

الله عا هالايام يا سمره

**

مش ناسيك

بْـخير نحنا؟ واهلنا لْهَونيك؟

خَـيي.. وحبـيـبي.. كل لبناني

والقَـدَر سـابـق صياح الديك

عم يخطفُن واحد ورا التاني

يا وطن ناسيني ومش ناسيك

عايش بِـأفراحي.. وبِـأحزاني

وعايش باحلامي وبـوجـداني

خايف عليك.. ودمعتي بتبكيك

يا أمَل عم يوقَع شو صاير فيك؟

حْرَقت قلبي.. وجَف شرياني

الله على الباغي وعلى الجاني

**

شو صار؟

- شو صار تا عم تكتب وتمحي؟

لبالك المحتار

رح خَبّرِك شو صار:

فكَّرت انو الشعر رح يوحي

وينقِلِّك الاخبار

عن الشَّوق العايش بروحي

ولمّا على التكرار

ضاعت سِدى الاشعار

محيتها.. ورميتها بالنار

محيتها وشدَّيت عا جروحي

رميتها بالنار!!

قلبك طلِع غدّار

بعد بدِّك تسألي شو صار؟؟

**

ما عدت اسأل

كـنت اسأل.. ليش ببلادي؟

كيفما مشيت بيندَهَك شحّاد

حَسنه لألله.. جايعه ولادي

زيد العطا الله بعمرك زاد

وفي ناس مانّو فقرُن زياده

ورغيفهم من جَيبة الاسياد

تاري ببلَدنا.. مَـد لإيـادي!!

عاده ما منشوفا بغير بلاد

ببلاد عم يصرخ عم ينادي

لقراب حتى و لدُوَل لبعاد

حَسنِه.. ما عندي رغـيف زوّاده!!

ولا دوا والوطن لبس حداد

بـوادي الشعب.. وحكومتو بوادي

اكلت.. وسرقِت غَدا لعباد

والشعب كلو لازمو عياده

واكل وطبابه وكهربا وعياد

عادي.. بجَوّ بلاد شحّـأده

يربو فِيا عا هالنهج لولاد

كار الشحاده بعرفهم عادي 

متل ما بيربى الضَنا بيعتاد

بالفقر صرتي حامله شهاده

صرتي بَلَد عازه.. واستعباد

مين ضَيَّع التاريخ يا بلادي؟

الكان كلو مفخره وامـجاد

**

اوهـام

عا صفحتك عم فوت يوميي

قلِّب صُوَرها والمسا بْدَيّي

تا شوف كيف صرتي بها الايّام

ملقى الصُّوَر نَشوه لعينيّي

بجَرِّب تا انساكي.. النسي اوهام

قلبي عا بعدِك داب حنيّي

وكيف بنساكي انا ما دام

ساكنه بالـبال.. بالاحـلام

طيفِك رفيق الحلم.. ليليّي

آخ.. حبِّك شو عِمِـل فيّي

وشو طلعتي قاسيه عليّي

**

فالج لا تعالج 

تعـبو ايديي شِـد فـيكي طـلـوع !!

تا من جحيمك تطلعي

ومن حرقـتي اجبل حكي بـدمـوع

وعملت جهدي تـقـنعي

عند النصيحه.. تْغَيّري المَوضوع

نْصايح ما بدِّك تسمعي

تمشي معي غَصب وعا اول كوع

تغافـليني وتـرجَـعـي

ولأيش دخلِك.. خاطري مَوجوع؟

ما بقيت رح قـلِّك تَعي

بمْـطارح المِنها الشرف مَـنزوع!

ضَلِّك.. وضَلّي تمَتَّعي

لَومِك عا حالك.. والعتب مَرفوع

انتي اخترتي توقعي

لا عـاد قَـلبي بالـهوى مَـفـجـوع

ولا فارقه الشغله معي

**

دمعتَين زغار

باقي بعيوني دمعتَين زغار

ونتفة رجا وشويّة عباده !!

ترجَّيت تَا نْبحَّيت عَلّي صار

وصًلِّت دموعي للسما زياده

ابكي على تاريخ عم يـنـهار

ابكي وطَـن بـمْـعَـزِّة ولادي

غليِت الخبزِه الناشفه والنار

حرقت تلال الخضر والوادي

ومصايف الما شافت الزوّار

العا الفَرَح والكيف مـعـتاده

ابكي حلم رجعه وحلم مشوار

عاش العمر كلّو بْفؤادي !!

العمر طار وحلم عمري طار

والامل غيمه لونها رمادي

وشو بـتنفـع رجعة الخـتـيار

بميتين عـلِّّـه حامل شهاده!!

همّو وطن رايح على المهوار

هَـمَـو مَـعـو للـقَـبـر زوّاده

والشعب؟؟

 لا تسأل عن الـقـصّار!!

عميان ما بـيغَـيّرو الـعـاده

متل الغنم بَعدُن ورا لكبار

متل اللي بَعدا نقلتو دادي

وكبار؟ قلّي زمرة التجّار

نهبو ما خلّو لموطني سياده

بلا دَم هَودي قلوبُن من حجار

لولا منادي الـنَّـعي بينادي

وعن مَوتُن بتوصلّنا الاخبار

بستضيع البَصقه بهالكفّار

لباعو الضمير وفَقَّرو بلادي

**

 دمعة البي

تْطَلَّع بِحَسره بمعجنو الفاضي

 اليبقى بزمانو بالخبز مليان

ولو كان عايز خبز بالماضي

من دون كلفه يسأل الجيران

وزَت الطفل قنيـنـتو باكي

فاضيه ما اعـتاد يـحـمـلها

جوعان قَلَّق ميمتو شاكي

راحت بدمع العين تغسلها

وزغير ناداها انا جوعان !!

شوما طبختي اليوم طعميني

وشو طابخه؟ مش طابخه من زْمان

التاجر..  رَفَض بالدَّين يعطيني

وضعَك بيبَكّي الصَّخر يا لبنان

انت الكنت قطعه سماويه

صرت ارض الظلم والحرمان

صرت مرتَـع للحرامـيّه

والشعب صار مْخَدَّر وغـفيان

وعايش على وعود السياسيّه

الكلّا كذب ووعود وهميّه

**

فيق يا مخَدّر

ايمتى بيوعى الشعب..لمْخَدَّر

بنادي اللصوص.. بيحرق النادي

ايمتى الشبـل لبداخلو بـيكبَر

وترجع سنـيـن العـز يا بـلادي

**

الجمعه العظيمه

بهاليوم مش وحدك ظلم مصلوب

كل الوطن.. سقـيـوه خَل ومُـر

كل الشعب نزلت دموعو جَمر

كل الشعب جاع وشكي ومتعوب

وداق الوَجَع متلَك على الصلبان

وميّة يوضاس.. وما حدا ندمان!

وبالهيكل؟ التجّار عَـبّـو جيوب

وعَن القاضي؟ ما حدا سئـلان

اللـص.. مـا بـيـتـحاكم بـلـبـنـان

من هَيك مش رح يرجَع المسلوب

بتقوم وبيبقى الشعب مَصلوب

بتقوم وبيبقى الوطن مصلوب

**

عشقان

عشقان ناطر عا رصيف الوقت

حلم الهوى يقرب

كل ما روحو تقول اشتَقت

كل ما الأمل يهرب

**

قلبك

قلبك بلا بواب وبلا شبابيك

منين بدِّك تطلّي

قلبي عم يقلّي

اقسا كفى اتعذَّب وناجيك!!

وقَضّي العمر صَلّي

ودَوِّر وما لاقيك

ابعد شو بدّي فيك

آخ وشو بدّي فيك

**

تفاح الجنة

آدم لَـولا من التفّـاح 

لهَلَّق كان عايش مرتاح

لا في هَم ولا في غَم 

ولا وجعة راس ولا نواح

آدم نفسو مْدَنيها 

ما كان قـادر ينهيها

الشجره العَنها حرمو الرَّب 

بالجنة تعَمشَق فيها

يحكي مع حالو جدّي 

لْوَحدي عايش من مدّه

ما بدَّو دوق التفاح 

لشو يخْلَقـلي هالعدّه

**

سطل وابريق

كنا في ايام الصيف نقصد حنفية "نظيمة"لملئ مياه الشرب لان بيتها يقع الى جانب جدول المياه حيث يمر القسطل العام فتبقى المياه باردة منعشة. قلت انني لم اكن بريئاً في طفولتي، خرج والدي عصرية نهار وناداني وانا ملهواً بلعب الكلة مع رفاقي لاملئ ابريق الماء من حنفية "نظيمة" وكان بيت نظيمة يبعد عن بيتنا قرابة مئة من الامتار وكي لا اتوقف عن اللعب ناديت اخي بربر سائلا اياه ان كان يرغب ان يملأ السطل او الابريق من حنفية نظيمة فاختار الابريق لانه اخف وزنا رجوته ان ياخذ السطل فرفض وحمل الابريق مسرعا وبعد قليل لاحظ والدي انني ما زلت العب ولم استجب لطلبه فاخبرته بان شقيقي بربر قد ذهب بدلا مني فتعجب لاستجابة بربر لطلبي وهو الذي كان في صغره اي بربر لا يستجيب لطلبات والده ولكن بربرحينما عاد قال لوالدي هاك الابريق ولكن روميو لم يملئ السطل كما طلبت، علم والدي انني قد خدعت شقيقي، فرمقني بنظرة فيها ملامة واعجاب وهز رأسه ودخل المنزل اما اخي فاتى بالسطل ليجبرني ان اذهب واملأه وعندما اشتد الشجار خرج والدي وانهى المشكل بشمطة اذن لكل منا. رحم الله نظيمة و والدي واخي واطال الله بعمر القراء الاكارم. قصصي مع اخي ورفيقي بربر كثيرة ومتنوعة، ولكل منا ذكرياته مع اخوة له ورفاق طفولة اكتفي بهاتين الحادثتين واوجه لاخي حبيبي بربر الذي غادر هذه الدنيا باكرا القصيدة التالية:

بكَّرت يا خيي بـمشوارك!!

الحبيت الله واهلك وجارك

وكنت خي وكنت اغلا رفيق

نتزاعل، ونرضى، ونتعارك

عشنا سوى ايّام فيها ضيق

لقمة البالصحن نـتشارك!!

ياما زعَجتَك من قَبل ما تفيق

من صبح الله عَكِّر نهارك

يا بربر الهادي وقلبو رقيق

الحبّوك اصحابك وزوّارك

محب كنت وآدمي وصدّيق

بكّير الله للسما اختارك!!!

ببالي انت باقي.. ليوم الديـن

وصارت وراق العمر مصْفَرَّه

فيني عن يمرجح هوا تشرين

من سنين عمري قربت اتعَرّى

ولو مَر عا ذكرى الطفوله سنين

بيبقى عليها البال يتـمَـرى

كنت انت الطيِّب المسكين

ومنّي انا الشيطان يتبرّا !!

ذكرى غيابك بالقلب سكّين

كاس قاسي.. طعمـتـو مرّه

**

رمان ملغوم 

بلبنان.. مين اللَغَّم الرمان؟

وشَغَّل الدوله عليه تتحَرّى

وفلان يتهم بالجريمه فلان

وفلان؟ من هالـتهَـم يتبرّا

وما دام مش متسَوَّق بلبنان

مَبعـوت حتى ينصرف بَرّا

شو خصّهُن؟ ويكون مين ما كان

ليش تا عيونن هيك محمَرّه

ورمان حَبّو بيدوِخ الانسان

ان داقو بيصير يعَدِّد الكَرّه

وللتعاطي مدمن.. وهيمان

وبتصير روحو ليه منجَرّه

يا ملغّمي رمانك من زْمـان

دابت عيوني عليه تـتمـرّى

صار عندي لسكرتو ادمان

دَخلو مخَبّا بالقـفـص دفيان

وأكتَر بحبو ان كان متعَرّى

**

شعر عن لبنان

طلب احد الشعراء ان تكون قصائد هذه المرحلة الصعبة من تاريخ لبنان تحاكي الاوضاع المؤلمة وتصف الزمن الرديء وان نبتعد عن قصائد الحب والغزل والتغني بالجمال، من جهتي كنت قد كتبت العديد من القصائد عن اوضاع لبنان ومفهوم السياسة وممارسات الساسة فيه منذ  زمن بعيد  لان من يعيش مناخات الحرية واحترام القوانين في بلدان الاغتراب يرى الفارق البعيد بالتعاطي بالشأن العام وعمل اهل الحكم واحترام الفرد والمجتمع والتباري في تقديم الافضل للوطن والمواطن ، ونزولا عند رغبة زميلي الشاعر المحترم البي طلبه بقصيدتي التالية وان كانت فصولها مكرره حيث كما ذكرت كنت قد كتبت حول نفس الموضوع مرارا.

قالو تا نكتب شعر عن لبنان

يوصف الحاله متل ما هيي!..

وننسى الغزل والعشق والغزلان

والحب .. وليالي المَوَرديّه

ايّا وطن هَيدا؟ انفتح دكان

لتجّار.. ومدارس سياسيي

للظلم.. والجور.. والطغيان

ونهب المواطن.. والعبوديّه

وبيكفّرو وبيفرّقو الاخوان 

باسم الديانات السماويّه..

يا ريت كنّا منعبد الاوثان 

وضلّيت يا ابن الوطن خَيّي

ياما وياما بالدني بلدان

ايمانها ديانات وهميّه

وشعوبها متعدده الالوان

دياناتها زادت على الميّه

فيها التآخي والعدل ميزان

وما في حدا مغطّى بشمسيّه

يا موطني المحكوم من حيتان

شطّار بفـنـون اللصوصيّه..

اكلو المعاجن والشعب جوعان

وسرقو الشعب.. كلُّن حراميّه

 ايّا وطن يا جنّة الرحمان؟

صرت عا ايادي الافنديّه

ايّا وطن محكوم من زعران

زعران.. بالقانون محميّه

منكن بري الانجيل والقرآن

وكل الديانات السماويّه..

يا موطني يا زينة الاوطان

مبارحه غمَّضت عينيي

ونمت نوم منهنه ونعسان

وحلم البيضَل يطلطل عليي

طل ونقلني.. حلمت يا لبنان

بيي ندهلي.. ما شفت بيي

ولا شفت امي ولا شفت جيران

ولا شفت خيّاتي ولا خَيّي

ما كنت اسمع غير بكي نسوان

وطفال عالطرقات مرميّ

وشفت الفزَع مرسوم عالحيطان

من سوادا تشحترو دَيّي!..

فتحت عينيي وانا خـيفـان

يا رب دخلك ساعد الانسان

لبنان تا يرجع متل ما كان

لازمو قدره إلهيّه

**

انت لبناني؟ 

جاري سألني انت لبناني؟؟

مأكَّد يا جاري سامع الاخبار

تقلَّدت بَسمِه.. ترَبَّط لساني!

بين النفي وبين النَّعَم محتار

جاري بيعرف اصل اوطـاني

وعارف انا شو كان قصد الجار

يا مصيبتي اخجل بعنواني!!

ويصير تاج المجد وصمة عار

بـلَّشت ارويـلـو عن زْمـاني

وفلفش تاريخ المجد والثوّار

و كَمّ زَلمه وبطل هدناني

دحرو العدا وسيف البطوله نار

وعزم"الشهابي"و"ميرنا التاني"

وتاريخ ناصع كان فيه كبار

لا ضل لا فْرَنسي ولا عثماني

ولا غَيرُن وكان الشعب جبّار

جاوب يا جاري بعرفَك مسكين

فـيـق من نَشوة فعل ماضي!!

وحكم الشهابي وعزم فخر الدين

ورجال كانو وسَيفهُن ماضي

ويوسف كَرم ومطانيوس شاهين

واليوم؟ قلّي عالوضع راضي؟؟

تبلكم لساني.. يا ربي تْـعـين!!!

وعّي الشعب لنايم من سنين!!!

وكون مع شَعب الوطن قاضي

**

من المستشفى - اليوم الثاني

 بعد عشرة ايام خرجت مساء امس من المستشفى لله الحمد وكي لا انقطع عن الكتابة ما يسبب كسلا في الذهن كنت اجمع اوراق وجبات الطعام وطلبت قلما من الممرضة لتدوين ما يخطر بالبال فكانت يوميات تؤنس وحشتي اذ ان الزيارات ممنوعة في عصر كورونا اللعينة، سانشرها تباعا فهي تعبر عن احاسيسي يوما بيوم واليكم اليوم الثاني لوصولي المستشفى اذ ان اليوم الاول كان بمجمله فحوصات مخبرية وتصوير اشعة وكشوفات طبية.

خايف من جهنم

اكل وشرب يمكن عليي الدهر

شايف ملاك الموت قدّامي

كم سنه باقي عيش او كم شَهر

بيترحَّمو الاصحاب عا عضامي

بتخطر على بالي سنين الزهر

الورد.. والزَنبَق.. والخْزامي

والحب يبقى متل دَفق النهر

زرار الزهر.. والتمر.. والشامي

الذكرى وجَع قَلب وحنين وقَهر

ومحاسبه.. ودموع.. وندامه

وخايف يكون العقاب الجَّمر

ودَخلة جهنَّم حكم الزامي!!

ولمَّا المرض بَلَّش يهزّ العمر

رجَّف ركابي وزاد اوهامي

ولمحة رجا بشوفا بتاني أَمر

تخفِّف عليي.. تْشَدِّد عْـزامي

ما قْتَلت ما بعمري هويت الخَمر

ولا كنت لا مقامِر ولا حْرامي

**

من المستشفى -" اليوم الثالث "

خَف الوجَع

خَف الألم ، والضغط كان عالي

عاد لحدودو الطبيعيه

وقَبل ما تطمَّنت عن حالي

من الاطبا المشرفه عليي

طَيفك وقِف بيغرفتي قبالي

رَد روح العاطفه ليي

وقَبل ما سألتي عن حوالي

سألت عن حالك يا عينيي

تطمنت عن حالك بهالحاله

بموجات كورونا القاتوليه

وابعت قُبَل لَرسمِك الغالي

لغمزاتك.. الكلّا نعوميّه

يا حامله الوردات كرمالي

مْشَكَّله حمرا وزَهريّه

شو عَذَّبِك.. بالورد لا تبالي

طيفك لوحدو اجمل هديّه

**

 من المستشفى - "اليوم الرابع"

 تلفَنِت

حسَّيت انو قلبها مشتاق

لم تلفنت تطمَّن عليي

من لهفتا من لهتها الخفاق

من صوتها المجبول حنيّه

وقدَّرت كبر الحب والاخلاق

من زَعَلها عالبلى الفيّي

قلتلّها انو العمر سرّاق

زيارة طبيبي امور يوميّه

قالت النكسه ما بتمحي الحب

لا تخاف خلّي الحب بمحَلّو

بحبك ما في غيرك حدا بالقلب

من لَمستي بكرا بترجَع شَب

وبيرجَع الماضي الحلو كلّو

**

من المستشفى - " اليوم الخامس "

   لوين يا زعران؟

اليوم من لبنان حاكوني

بجوو الحزين كتير حطوني

كل البشر من غد فزعانين

لا كهربا.. لا دوا.. لا مـونه

الافران ما فيها خبز وطحين

ووقف الشغل والناس مديونه

لشغلو ما عطَّل عَطَّلو البنزين

وسيارتو بالبيت مَـركونه

لوين يا حكّام يا مجانين؟

لوين نشف الدمع بعيوني

لصوص عم تتناوبو من سنين

عا خزينة وطَن مَرهونه

سرقتو الودايع والشعب مسكين

سرقتو ضحايا ظلم مَدفونه

لوين؟ يا زعما ما الكُن دين

لوين يا يوضاس يا قايين؟؟

لوين يا زعران محترفين؟؟

لوين ياخوّان دلّوني؟؟

**

من المستشفى - "اليوم السادس"

 فلّي من قبالي

قولي لطيفِك يترك مْـجالي

من صبح الله واقف قبالي

وشايف بعينيكي حزن ودموع

وموجوع جسمي وحالتي حالَه

ان مدَّيت ديي تصافحك والكوع

يغمر برقَّه عنق لغزاله!!

و ممَرضه اشتلقت على الموضوع

شهاداتها اصدق من قْوالي

مأكَّد بيقولو عالوجَع ملطوع

بغمر هوا وبحكي مع خيالي

روحي من قبالي باسم يسوع

والانبيا والخالق العالي

روحي من قبالي دَبَحني الجوع

لشفافك.. ولنهود قتّاله

ومَرقه على جسمك نزول طلوع

وحَوِّش من الكَرم.. اللي يحلالي

روحي لا يصبح للملا مسموع

عن حالتي.. وتتغَيَّر الهاله

ومجنون صَفّي والعتب مَرفوع

مش هَيّني.. فلّي من قبالي

**

قلوبنا بلبنان

 من المستشفى - " اليوم السابع "

ما منغفى ىشوق عالفرقه

وقلوبنا عالوضع محترقه

من يوم ما تركنا ارض لبنان

الرجعه املنا وحلمنا الملقى

انتو لبقيتو غصب بالاوطان

وعم تدّعو الاخلاص والجرأة

نصّكُن كان هاجر من زْمان

بقاموسكُن فيزا السفر رزقه

انتو لبقيتو ما لكُن غفران

خَرج الحكي والسَّب والعجقه

وخَرج لزق الصُّوَر عالحيطان

لزعما القتل والغدر والسرقه

بْحَبِّة قمح بيبرطلو الصيصان

بكمشة قمح بيسَكّتو القرقه

انتو انتخبتو التاجر الخَوّان

وخوّان كلما تْصَوّتو بورقه

نحنا اللي دَينا لنصرة الجوعان

بدافع الاخلاص مش رفقه

نحنا لمنبْعَت لبس للعريان

اللاحرام في عندو ولا خِرقه

منغص من شَوفة شعب غفيان

سكران بالمَي وسما الزرقه

ومفروض تطْلَع ثورتو بركان

ما تكون عالطرقات والدكّان

ثاير عا سمكه وتارك الحيتان

وبالشتايم.. والكسر غضبان!!

بس اصل الفـقـر والطغيان!!

اللي تاجرو بالشعب والاديان

ما مَرَق صَوب بيوتهُن مَـرقه

**

من المستشفى - " اليوم الثامن "

لطفل لبناني عريان

لا تخاف في متلك كتير طفال

بأثيوبيا.. بالهند.. بالصومال

لا تخاف بكوانين لو عريان

وعندك ما في كنزه و لَفَّك شال

ابن اللي بيَّك لاحقو من زْمان

قاعد بحضن الخادمه دفيان

بَيَّك انت؟.. باعك بنتفة مال 

لما انتخَب انسان مش انسان

لما انتخب مجرم وطن دجّال

لما انتخب لص ولحق زعران

عرّوك يبني يا ضعيف الحال

وعرّو الوطن تا يلبسو تيجان

لبنان يبقى بالشرق مشعال

ويبقى سراج النور للعربان

متلك صفي متسوِّل وجوعان

مخزنو ما ضَل فيه غْلال

انشالله تدور وترجَع الازمان

وتشوف فجر جديد.. يا لبنان

**

من المستشفى - " اليوم التاسع "

ضجران 

طلّي على المشفى وشوفيني

خَلّي الطبيب يقول شو فيني

طلّي عليي وغَيّري الميزان

ريحة عطر عنقك.. بتشفيني

احكي حكايا.. كان يا ما كان

لوحدي انا ضجران سَلّيني!!

من لسانِك العندو حَكي فتّان

حَدّي قْعَدي بالهمس حاكيني

بَعرفِك.. قلبك حلو وحنّان!!

ما بينسى الحب عا الهينه!!

بجاه السما والخالق الاكوان

لـنّـو دقيقـة وَقت زوريني

**

بدها غزل

قالت كتبلي شعر.. غـازلني

مـتل الحلم والسحر ينقـلني

قلتلها: للحب ما في مجال!!

هَم الوطَن ع طول شاغلني

وجرحو لكبير كتير.. قاتلني

من وين بيجيني الغَزَل ما زال

غَرَّق عيوني البكي؟

وكيف بدو يطلع الموّال؟

من حنجره عم تشتكي؟؟

من وين بخلقلك غَزَل وجْـبـال

هموم وعَ صدري مْسَمَّكي

هم الوطن فوق الكتاف حْـمال 

روقي عليّي.. شو بكي؟ 

تا يجفّ من جفني البكي

ويطلع على لساني حَكي

**

اضحى مبارك

كل عيد وانتي بخير ياعيوني

يا مْشَغّلي الافكار بسْكوني

انشالله تضَلّي كل عيد بخير

واحلى واغنى وأهضَم تكوني

" بَعدني بحبِّك يا مَجنوني "

**

بقدَّيش بعتيني

لو بَـعـرِف بـقـدَّيش بعتيني

من بَعد ما ببَحرِك رمَيتيني

انكنو البعد مش بَس نحنا بعاد

بقصد ربوعِك رَكض لو فيني

هَجمِـت كورونا وسَكَّرو لبلاد

متل البشَر مَحروق مَسّيني

راحو وإجو وراحو وإجو لعياد

كنتي الحلو عالعيد تهديني

وجبلك عطر.. اكتب كلام جداد

قصايد ولا احلى.. تقبريني

اليوم بُعدِك زاد.. جرحي زاد

ودَمعي عطـر أحمر بقَـنّـيـني

**

من المستشفى - "اليوم العاشر" قصيدة قصيرة، لقد طمأنني الطبيب بانني ساخرج و علَي متابعة العلاج من المنزل.

ضَلّي معي 

سمعتي الحكيم شو كان عم بيقول؟

قَول الاطبا مْدَوزَن ومعقول

لمّا قْعَدتي عالتخت حَدّي

حرارتي.. والضغط.. كرجو نزول

يمكن وراكي يرجَع يْوَدّي

تزوري مَريضك.. والزياره تْطول

يا ريت لو بيطَوّلو المدّه

كنت بشفى.. والـوَجَـع بـيـزول!!

**

وَجَع 

زاد الوَجَع والحزن يا بيروت

وبَعدِك دَمع وخْراب

زاد الوَجَع.. والحق ما بيموت

الحَق خَلفو صحاب

عين الحزن تابوت!

ما بـيـندفن بـتـراب

تابوت.. عا جرح الالم مَزتوت

والألم جـرحو غياب

بـقـلوبـنـا مَـنحوت!!

بـدمـوعـنـا مَنحوت!

دَفـن الحقيقه عْـذاب

والكَون كلو سْكوت!

الحق؟ بَلعو الحـوت

وضاع بْبَحر بيروت

**

جرح لبنان

وكيف بدّي دَمعتي خَبّي؟

ما الدَمع نَزْف الجرح لبقـلبي

عا مَوطني البمصايبو غرقان

والفقر.. والجوع.. والحرمان

والموت.. عم يتلَذذو بشعبي

يا حَرق قلبي عليك يا لبنان

يا موطني.. يا اجمل البلدان

يا حب عمري.. يا حلم هربان

يا امَل عم بيضيع من دَربي

عا وَجَع اهلي.. وبقَهر حُبّي

كيف بقدر دَمعتي خَبّي؟

**

رشعين

قولك بعد رح عود يا رشعين

زورك، وبوِّس تربة بلادي؟؟

وبكير اغدي عا كروم الـتيـن

واحمل معي عالبيت زوّادي؟

فيق الصبح عَ نغمة حساسبن

ويطرب فؤادي البلبل الشادي

واشرب من مويّاتك الحـلويـن

وكزدر عَدرب النهر والوادي

ولّا منبقى بْـعـاد مَـزروبـيـن؟

ويمكن الزربي تطول سنين!!

واللي بيمرَق عَـتْـبِـة السبعين

ايّـام عـمـرو بيشحدا شحادي

**

وَيـن الـحَـدا؟؟

الناس بعدا ناطره يطلع حَدا

بِ هالوطَن..

من شي رَحَم.. من شي مَدى

صارو الزعما بالاسم زعما كبار

حَرقو الوطن..

ضاع الوطَن..

ووجودهُن خَي الصدى

والشعب.. بالعَتمه!!

بلا مال!! ولا غَدا!!

وكل الحكي رايح سدى

عا قلوبهُن سِمك الصدا..

وع دماغهُن سمك الصدا

بيلبَقلُن تراب الردى

**